រាជធានីភ្នំពេញ ៖ ថ្វីដ្បិតតែឱកាសបានក្លាយជាម្ចាស់ផ្ទះនៅក្នុងព្រឹត្តិការណ៍ស៊ីហ្គេមឆ្នាំ២០២៣ គឺជាអ្វីដែលកីឡាករ និងគណៈកម្មការភាគច្រើនអបអរសាទរ ប៉ុន្តែព្រឹត្តិការណ៍មួយនេះ កំពុងត្រូវបានគេចាត់ទុកថា គឺជាពេលវេលាដ៏តានតឹងមួយ ដែលត្រូវមានការត្រៀមខ្លួនខ្លាំង។
ក្នុងនោះ ក្រៅពីយកចិត្តទុកដាក់លើការបង្វឹកកីឡាករដើម្បីបង្កើតធនធាននីមួយៗ គោលការណ៍សំខាន់ៗក៏ត្រូវតែចាត់ចែងផងដែរ ដើម្បី
ត្រៀមខ្លួនដណ្ដើមយកមេដាយសម្រាប់ព្រឹត្តិការណ៍ ។ ជាក់ស្ដែង សហព័ន្ធខ្មែរកីឡាអត្តពលកម្មស្ម័គ្រចិត្ត ក្រៅពីពង្រឹងសមត្ថភាពកីឡាករកីឡាការិនីជួរមុខ ក៏នៅតែបន្តយកចិត្តទុកដាក់ លើគោលការណ៍សំខាន់ៗផងដែរ ខណៈដែលគោលការណ៍ទាំងនោះ ត្រូវបានមន្ត្រីសហព័ន្ធយល់ថា បើធ្វើមិនបានជោគជ័យ ឱកាសដណ្ដើមមេដាយក៏មិនមែនងាយស្រួលនោះដែរ។
លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា និងជាប្រធានសហព័ន្ធខ្មែរ កីឡាអត្តពលកម្មស្ម័គ្រចិត្ត នៅបន្តបើកកិច្ចប្រជុំ វឌ្ឍនភាពការងារ និងទិសដៅការងារបន្ទាប់ របស់សហព័ន្ធក្នុងការត្រៀមខ្លួនចូលរួមការប្រកួតកីឡាសុីហ្គេមលើកទី៣១ឆ្នាំ២០២១ នៅប្រទេសវៀតណាម និងត្រៀមការប្រកួតសម្រាប់ស៊ីហ្គេមក្នុងឆ្នាំ២០២៣ខាងមុខ ។
លោកថា ការប្រកូតទាំងពីរព្រឹត្តិការណ៍សុទ្ធតែជាអ្វីដែលបង្កឱ្យមានការព្រួយបារម្ភ ព្រោះបើសិនជាមិនទទួលបានលទ្ធផលល្អទេ គឺពិតជាមិនងាយស្រួល ជាពិសេសសម្រាប់ការប្រកួតស៊ីហ្គេមក្នុងអំឡុង ខែវិច្ឆិកា នៅប្រទេសវៀតណាម ដែលជាជំហានទី១ត្រូវតែគិតគូរជាមុននោះ ។ លោកបន្តថា ដើម្បីកែប្រែនូវស្ថានភាពដែលភ័យបារម្ភរឿងមិនទទួលបានលទ្ធផលសម្រាប់ការប្រកួតនោះ សហព័ន្ធខ្មែរកីឡាអត្តពលកម្មស្ម័គ្រចិត្តបានដាក់ចេញនូវទិសដៅការងារចំនួន៥ចំណុចដដែល ដែលចំណុចទាំង៥នេះ លោកយល់ថា នៅតែមានភាពសំខាន់ខ្លាំងសម្រាប់ការត្រៀមខ្លួនក្នុងការចូលរួមព្រឹត្តិការណ៍ការប្រកួតកីឡាស៊ីហ្គេមលើកទី៣១ឆ្នាំ២០២១ដែលគោលការណ៍ទាំង៥ចំណុច គឺបើអនុវត្តបាន យ៉ាងហោចណាស់ក៏ទទួលបានមេដាយក្នុងពេលកម្ពុជាធ្វើជាម្ចាស់ផ្ទះស៊ីហ្គេមផងដែរ។
លោក ហ៊ុន បូរី អគ្គលេខាធិការសហព័ន្ធ ខ្មែរកីឡាអត្តពលកម្មស្ម័គ្រចិត្ត បានចាត់ទុកថា វិធានការទាំង៥ គឺជាគន្លឹះ ឬជាការនាំផ្លូវឆ្ពោះ
ទៅរកមេដាយមាស ដែលនេះគឺជាអ្វីដែលសហព័ន្ធចង់បាន ។ លោកថា វិន័យ និងការពង្រឹងផ្លូវចិត្តគឺជាអ្វីមិនអាចខ្វះបាន ហើយបើគោល
ការណ៍ក្នុងការជំរុញទាំងនោះមានសម្រាប់កីឡាករគឺល្អបំផុត ក្នុងការដណ្ដើមយកផ្លែផ្កា ។ ទិសដៅ៥ចំណុច ដែលសហព័ន្ធកំពុងតែបន្តពង្រឹងនោះរួមមាន៖
១-ត្រៀមខ្លួនចូលរួមព្រឹត្តិការណ៍ការប្រកួត កីឡាស៊ីហ្គេមលើកទី៣១ ឆ្នាំ២០២១នៅប្រទេសវៀតណាម។
២-បណ្តុះបណ្តាលមន្ត្រីបច្ចេកទេសឲ្យគ្រប់ចំនួនការប្រកួតកីឡាស៊ីហ្គេមលើកទី៣២ឆ្នាំ២០២៣ដែលកម្ពុជាធ្វើជាម្ចាស់ផ្ទះ ដោយត្រូវ កំណត់ចំនួនគណៈកម្មការបច្ចេកទេស អ្នកស្ម័គ្រចិត្ត ការប្រកួតផ្សេងៗ។
៣-ត្រៀមបញ្ជូនក្រុមកីឡាករ-កីឡាការិនី អត្តពលកម្មទៅហ្វឹកហាត់នៅក្រៅប្រទេស ដើម្បីទទួលបានលទ្ធផលមេដាយក្នុងការប្រកួតនានា ។
៤.ពង្រឹងវិន័យដល់ក្រុមកីឡាករ- កីឡាការិនីកុំឲ្យធ្លាក់កំណត់ត្រា និង
៥-ត្រៀមការប្រមូលផ្តុំកីឡាករ-កីឡាការិនី ជម្រើសជាតិឆ្នាំ២០២១៕
ចែករំលែកព័តមាននេះ