ស៊ែប ៖ ស្លាកប្រធានក្រុមជម្រើសជាតិព័រទុយហ្គាល់ដែលកីឡាករ Cristiano Ronaldo បោះចោល អំឡុងការប្រកួតទល់នឹងក្រុមជម្រើសជាតិស៊ែបបានជួយស្រោចស្រង់ជីវិតទារកម្នាក់។ Ronaldo បានបង្ហាញការខឹងសម្បារយ៉ាងខ្លាំងក្នុងការប្រកួតជម្រុះ World…
ស៊ែប ៖ ស្លាកប្រធានក្រុមជម្រើសជាតិព័រទុយហ្គាល់ដែលកីឡាករ Cristiano Ronaldo បោះចោល អំឡុងការប្រកួតទល់នឹងក្រុមជម្រើសជាតិស៊ែបបានជួយស្រោចស្រង់ជីវិតទារកម្នាក់។
Ronaldo បានបង្ហាញការខឹងសម្បារយ៉ាងខ្លាំងក្នុងការប្រកួតជម្រុះ World Cup ដែលធ្វើឡើងកាលពីថ្ងៃទី២៧ ខែមីនា កន្លងទៅ ទល់នឹងម្ចាស់ផ្ទះស៊ែប។ ក្រោយពេលដែលខ្សែប្រយុទ្ធក្រុមសេះបង្កង់ Juventus រូបនេះ មានឱកាសរកគ្រាប់បញ្ចូលទីយកឈ្នះនៅចុងម៉ោង ប៉ុន្តែត្រូវបដិសេធដោយអាជ្ញាកណ្តាល ដែលធ្វើឱ្យការប្រកួតបញ្ចប់ទៅដោយលទ្ធផល ២-២។
Ronaldo បានដោះស្លាកប្រធានក្រុមហើយបោះចោល និងដើរចេញពីទីលានប្រកួតមុនអាជ្ញាកណ្តាលផ្លុំកញ្ចែបញ្ចប់ការប្រកួត។ ភ្លាមៗនោះស្លាកប្រធានក្រុមនេះ ត្រូវបានបុគ្គលិកក្នុងកីឡដ្ឋានម្នាក់រើសវាទុក។
ខណៈដំណឹងចុងក្រោយបានអះអាងថា បុគ្គលិកខាងលើបានផ្តល់ស្លាកប្រធានក្រុមនេះ ដល់អង្គការសប្បុរសធម៌មួយ ដើម្បីដាក់ដេញថ្លៃយកប្រាក់ជួយបង់ថ្លៃព្យាបាលទារកជនជាតិស៊ែបឈ្មោះថា Gavril Djurdjevic ដែលមានអាយុ៦ខែ មកពីទីក្រុងKragujevac ដែលកំពុងមានបញ្ហាសាច់ដុំឆ្អឹងខ្នង។ ហើយបច្ចុប្បន្នអង្គការសប្បុរសធម៌ខាងលើកំពុងតែស្វះស្វែងរកប្រាក់ចំនួន ៣,៤លានដុល្លារសម្រាប់ការព្យាបាលទារករូបនោះ៕ (ដកស្រង់ចេញពី Mirror)
ចែករំលែកព័តមាននេះ