រាជធានីភ្នំពេញ ៖ ខុសពីសហព័ន្ធកីឡាផ្សេងទៀតដែលខ្វល់តែបណ្ដុះបណ្ដាលកីឡាករកីឡាការិនីតែមួយមុខ សហព័ន្ធកីឡាជិះសេះ មិនមែនគ្រាន់តែពិបាកក្នុងការពង្រឹងកីឡាករដើម្បីបំពេញតម្រូវការ និងដើម្បីត្រៀមខ្លួនសម្រាប់ស៊ីហ្គេម២០២៣ប៉ុណ្ណោះទេ តែក៏ត្រូវខ្វាយ ខ្វល់ក្នុងការស្វែងរកថវិកាក្នុងការទិញសេះល្អៗឱ្យបានច្រើន និងត្រូវបង្ហាត់សេះទាំងនោះ ដើម្បីបម្រើឱ្យវិស័យកីឡាមួយនេះផងដែរ។…
រាជធានីភ្នំពេញ ៖ ខុសពីសហព័ន្ធកីឡាផ្សេងទៀតដែលខ្វល់តែបណ្ដុះបណ្ដាលកីឡាករកីឡាការិនីតែមួយមុខ សហព័ន្ធកីឡាជិះសេះ មិនមែនគ្រាន់តែពិបាកក្នុងការពង្រឹងកីឡាករដើម្បីបំពេញតម្រូវការ និងដើម្បីត្រៀមខ្លួនសម្រាប់ស៊ីហ្គេម២០២៣ប៉ុណ្ណោះទេ តែក៏ត្រូវខ្វាយ ខ្វល់ក្នុងការស្វែងរកថវិកាក្នុងការទិញសេះល្អៗឱ្យបានច្រើន និងត្រូវបង្ហាត់សេះទាំងនោះ ដើម្បីបម្រើឱ្យវិស័យកីឡាមួយនេះផងដែរ។
កីឡាករជិះសេះវ័យក្មេងប្រមាណជា២០រូប កំពុងតែត្រូវបានបង្វឹក ហើយកីឡាករផ្សេងទៀតក៏កំពុងត្រូវបានបណ្ដុះផងដែរ ខណៈដែលអ្នកទាំងនោះ គឺមានសមត្ថភាពកាន់តែល្អក្នុងការជិះសេះ ហើយភាពក្លាហានរបស់ពួកគេនៅក្នុងកម្មវិធីប្រកួតជិះសេះ នាពេលកន្លងមកតាមរយៈការប្រឡង គឺកាន់តែបង្ហាញយ៉ាងច្បាស់ថា ពួកគេគឺជាធនធានដ៏ល្អ និងមានលទ្ធភាពច្រើនសម្រាប់ស៊ីហ្គេម២០២៣។
លោក ហ៊ូយ សុផារិទ្ធ ជាគ្រូបង្ហាត់ជិះសេះ ដល់ក្មេងៗ ដែលបានមកចូលរួមការប្រកួត នេះ បានឲ្យដឹងថា កីឡាជិះសេះនេះមិនទាន់ មានប្រជាប្រិយភាពនៅឡើយទេសម្រាប់ ប្រទេសកម្ពុជា ដោយសារមនុស្សភាគច្រើនយល់ថា កីឡាមួយនេះប្រឈមគ្រោះថ្នាក់ ហើយក៏ពិបាកផងដែរក្នុងការទាក់ទាញឱ្យអ្នកស្រឡាញ់កីឡានេះចង់ប្រឡូក ។ យ៉ាងណាមិញលោកថា យុវវ័យក្មេងៗគឺនៅតែទទួលយកការបណ្ដុះបណ្ដាលកីឡានេះ ដោយក្នុងរយៈពេលក្រោយៗ គឺអ្នកមកហាត់ជិះសេះ ហើយមានចំណូលចិត្តក៏បន្តធ្វើជាកីឡាករ ។ លោកថា «បើ និយាយរឿងកីឡាប្រភេទនេះ គេមិនសូវចូល ចិត្តទេ តែបើនិយាយរឿងប្រណាំងដាក់លុយ អាហ្នឹងមានប្រជាប្រិយភាពវិញ តែការប្រណាំង ដែលមានគេចាក់ភ្នាល់ហ្នឹង គឺអត់នៅក្នុងក្រប ខណ្ឌកីឡាទេ គឺគេប្រណាំងដើម្បីស្ទាបស្ទង់សេះ និងកីឡាករ ហើយក៏មានការភ្នាល់ ដែលនោះគឺវាពាក់ព័ន្ធនឹងការលេងល្បែងស៊ីសង និងការ ប្រថុយ » ។
លោក ហ៊ូយ សុផារិទ្ធ បន្តថា សម្រាប់ កីឡាជិះសេះនេះ ខាងសហព័ន្ធកីឡាជិះសេះ កម្ពុជាបាននិងកំពុងខិតខំពង្រឹងនិងអភិវឌ្ឍកីឡា ជិះសេះឲ្យមានការរីកចម្រើន ដើម្បីត្រៀមជា ម្ចាស់ផ្ទះរៀបចំកីឡាស៊ីហ្គេម ២០២៣ ព្រោះថា វិញ្ញាសាជិះសេះនេះ ក៏ត្រូវបានគេដាក់បញ្ចូល ទៅក្នុងកីឡាស៊ីហ្គេមនេះដែរ ។ ហើយអ្វីដែលយើងត្រូវគិតគូរក្រៅពីកីឡាករ គឺត្រូវមានសេះដែលមានគុណភាព មានស្ដង់ដា និងគ្រប់គ្រាន់ផងដែរ។ អតីតគ្រូជម្រើសជាតិ និងជាគ្រូបង្វឹកសិស្សនៅក្លិបជិះសេះCCC រូបនេះ បន្តថា មកដល់ពេលនេះ ក្លិបរបស់លោកបាននាំចូលសេះថ្មីមកពីបរទេសចំនួន៤ក្បាល ដោយក្នុងចំណោមសេះថ្មីទាំងនោះ គឺមានសេះខ្លះត្រូវបានបង្វឹករយៈពេល១ឆ្នាំរួចមកហើយ និងខ្លះទើបតែបានប៉ុន្មានខែ តែសេះទាំងនេះ គឺតម្រូវឱ្យយកមកបង្វឹកនៅក្នុងក្លិបបន្ថែមទៀត ដោយសេះទាំងនេះ ក៏នឹងរួមចំណែកឱ្យសហព័ន្ធមានសេះគ្រប់គ្រាន់សម្រាប់ការហ្វឹកហាត់ផងដែរ ។ ក្លិបមានគម្រោងបន្តទិញសេះធំៗ យកមកកម្ពុជាបន្ថែមទៀត ដោយតាមគម្រោងគឺនឹងអាចនាំឱ្យគ្រប់ចំនួនពី២០ទៅ៣០ក្បាល ទើបអាចឱ្យកម្ពុជាមានសេះគ្រប់គ្រាន់ដើម្បីហ្វឹកហាត់ និង ដើម្បីអាចទទួលស៊ីហ្គេមបាន ។ ប៉ុន្តែបញ្ហានេះ ក៏ជាកង្វល់ផងដែរ ដោយសារតែសេះដែលក្លិប ក៏ដូចជាសហព័ន្ធត្រូវការ គឺមានតម្លៃខ្ពស់ ហើយបើសេះដែលមានការបង្វឹកកាន់តែល្អគឺកាន់តែថ្លៃ។
លោកស្រី ទេព ម៉ូណា ប្រធានសហព័ន្ធ កីឡាជិះសេះកម្ពុជា បានបញ្ជាក់ដែរថា សព្វ ថ្ងៃនេះ សម្រាប់សហព័ន្ធកីឡាជិះសេះកម្ពុជា នៅក្នុងពេលនេះ គឺមានលទ្ធភាពគ្រប់គ្រាន់ហើយក្នុងការបញ្ជូនកីឡាករឱ្យចេញប្រកួតនៅក្រៅប្រទេស តែនៅមិនទាន់មានសមត្ថភាពនាំយកសេះដែលថ្នឹកនឹងកីឡាករ យកទៅជាមួយនោះទេ គឺបានត្រឹមតែជួលសេះរបស់ម្ចាស់ផ្ទះ ដើម្បីឱ្យកីឡាករជិះប្រកួតប៉ុណ្ណោះ។ ដូច្នេះហើយទើបការប្រកួតស៊ីហ្គេមនៅក្នុងឆ្នាំ២០២៣ខាងមុខ គឺកម្ពុជារំពឹងច្រើនដោយសារតែកីឡាកររបស់កម្ពុជា ត្រូវជិះសេះដែលខ្លួនឯងធ្លាប់ជិះមិនពិបាកដូចជួលសេះគេប្រកួត។
លោកស្រីបន្តថា៖«យើងត្រូវការបន្សាំកីឡាករវ័យក្មេងទាំងនេះឲ្យហើយ ដោយបច្ចុប្បន្ន នេះ យើងឲ្យពួកគេជិះសេះ ហើយផ្លោះរបង ត្រឹមតែកម្ពស់ល្មមមួយ ដែលស័ក្ដិសមនឹងវ័យ របស់ពួកគេ ប៉ុន្តែនៅពេលប្រកួតក្នុងកីឡាស៊ី ហ្គេម ការលោតផ្លោះនឹងកាន់តែខ្ពស់ជាងនេះទៀត ។ ដូចនេះ វាមិនមែនជាការងាយស្រួល នោះទេ ។ ម្យ៉ាងទៀត យើងមានពេលវេលា មិនច្រើនទេ ដូច្នេះយើងត្រូវតែប្រឹងប្រែងបង្វឹកកីឡាករវ័យក្មេងទាំងនេះឲ្យខ្លាំងដើម្បីអាចឲ្យពួកគេមានឱកាសចូលរួមការប្រកួតដ៏ធំនេះបាន »។
ទោះបីជានៅកម្ពុជា មិនទាន់មានការ ពេញនិយមខ្លាំងចំពោះកីឡាជិះសេះមែន តែប្រធានសហព័ន្ធកីឡាជិះសេះកម្ពុជារូបនេះ ចង់ ឱ្យមានការលើកកម្ពស់កីឡានេះ តាមរយៈការ បញ្ជ្រាបចូលក្នុងវិស័យទេសចរណ៍ ដោយ លោកស្រីបានលើកឧទាហរណ៍ថា បើសិនជា នៅតាមរមណីយដ្ឋានធម្មជាតិនានាក្នុងប្រទេសកម្ពុជាមានការជិះសេះកម្សាន្ដ អ្នកស្រីគិតថា ភ្ញៀវទេសចរប្រហែលជាចាប់អារម្មណ៍ជាងការប្រើមធ្យោបាយយានយន្តផ្សេងៗ ថែមទាំងអាចធ្វើ ឲ្យកីឡានេះ កាន់តែមានប្រជាប្រិយភាពផង ដែរ ៕
ចែករំលែកព័តមាននេះ