រាជធានីភ្នំពេញ ៖ អ្នកឃើញហេតុការណ៍មានការភ័យព្រលឹងចុងសក់ជំនួសបុរសម្នាក់គ្រប់ៗគ្នា ខណៈឃើញបុរសនោះកំពុងជិះម៉ូតូសុខៗ ស្រាប់តែមានរថយន្តដឹកឥដ្ឋ១គ្រឿងបើកទៅដល់បុកពីក្រោយពេញទំហឹង រួចកិនម៉ូតូជាប់នឹងអូសជាង៣០ម៉ែត្រ ។ ប៉ុន្តែជាសំណាងមួយក្នុង១ពាន់គ្រោះថ្នាក់ ដែលបុរសខាងលើលោតចេញទាន់ ទើបមិនត្រូវរថយន្តកិនស្លា.ប់ ឬរងរបួសធ្ងន់ឡើយ ។
ឧប្បត្តិហេតុគ្រោះថ្នាក់នេះ កើតឡើងកាលពីវេលាម៉ោងប្រមាណ៦និង៤០នាទីព្រឹកថ្ងៃទី២៨ខែមីនា ឆ្នាំ២០២១ នៅលើកំណាត់មហាវិថីឈ្នះឈ្នះ ស្ថិតក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ ។ បុរសរងគ្រោះមិនត្រូវបានគេស្គាល់ឈ្មោះឡើយ ជិះម៉ូតូហុងដាវ៉េវ ពណ៌ខ្មៅលាយក្រហម ពាក់ផ្លាកលេខ ភ្នំពេញ ១FX-២៧៤២ ។ ចំណែករថយន្តដឹកឥដ្ឋម៉ាកហ៊ីយ៉ាន់ដាយ ពណ៌ស ពាក់ផ្លាកលេខកណ្ដាល ៣A-០៩៦៦ បើកបរដោយបុរសម្នាក់។
អ្នកឃើញហេតុការណ៍និយាយថា បុរសរងគ្រោះជិះម៉ូតូធ្វើដំណើរពីខាងជើងទៅខាងត្បូង ចំណែករថយន្តក៏ធ្វើដំណើរស្របទិសគ្នាដែរ ។លុះពេលទៅដល់ចំណុចខាងលើ ស្រាប់តែរថយន្តនេះជ្រុលទៅបុកម៉ូតូពីក្រោយតែម្តង ប៉ុន្តែពុំបានដួលភ្លាមៗទេ គឺចម្ងាយប្រមាណ៣ទៅ៤ម៉ែត្រទើបដួល ហើយបុរសអ្នកជិះម៉ូតូបានលោតចេញទាន់ ។
ប្រភពដដែលបន្តថា ពេលនោះម៉ូតូបានកៀបជាប់ក្រោមរថយន្ត ហើយត្រូវរថយន្តអូសប្រហែលជាង៣០ម៉ែត្រ និងឮសំឡេងកកិតបែកផ្កាភ្លើងគួរឲ្យខ្លាច ហើយគាត់ពិតជាមានការតក់ស្លុតនិងភិតភ័យខ្លាំងណាស់នៅពេលឃើញបែបនេះ ។ មិនតែប៉ុណ្ណោះ ពុំនឹកស្មានថា បុរសអ្នកជិះម៉ូតូអាចលោតចេញទាន់រួចផុតពីគ្រោះថ្នាក់ដល់ជីវិតបែបនេះឡើយ ។ នេះពិតជាសំណាងមួយក្នុង១ពាន់គ្រោះថ្នាក់ ចំណែកអ្នកនៅជិតៗនោះបានស្រឡាំងកាំងគ្រប់ៗគ្នាតែម្ដង ។
ក្រោយពេលកើតហេតុ នគរបាលប៉ុស្តិ៍សំរោងក្រោមបានទៅកាន់ទីនោះ រួចឲ្យភាគីទាំង២សម្របសម្រួលគ្នា ហើយភាគីខាងរថយន្តក៏បានចេញសំណងថ្លៃជួសជុលម៉ូតូដល់ជនរងគ្រោះដើម្បីបញ្ចប់រឿង ៕
ចែករំលែកព័តមាននេះ