រាជធានីភ្នំពេញ ៖ ស្ថានការណ៍បង្ហូរឈាមនៅក្រុងបាងកក បានក្លាយជាបច្ចុប្បន្ន ភាពមួយនៅកម្ពុជាផងដែរ ។ រាល់ព័ត៌មាននានាទាក់ទិនទៅនឹងការប្រឈមមុខគ្នារវាងកំលាំងទាហានរបស់រដ្ឋាភិបាលជាមួយក្រុមបាតុករអាវក្រហមតែងតែជាការចង់ដឹង។ ទោះបីជាបែបណាជំរើសចុងក្រោយដែលរដ្ឋាភិបាលលោកអាប់ភីស៊ីត ប្រើកំលាំងទាហានឱ្យបាញ់សម្លាប់បាតុករមិនញញើតដៃ ក៏ទទួលបាននូវការថ្កោលទោសដែរ ។ នេះមិនមែនជាការលូកដៃលូកជើងចូលកិច្ចការផ្ទៃក្នុងរបស់ថៃនោះទេ តែជាបញ្ហាមនុស្សធម៌ ។សេចក្ដីថ្លែងការណ៍របស់អ្នកនាំពាក្យក្រសួងការបរទេស និងសហប្រតិបត្ដិការអន្ដរជាតិ ចុះថ្ងៃទី១៧ ឧសភា បានសរសេរថា ឆ្លើយតបទៅនឹងសំណួររបស់ទីភ្នាក់ងារព័ត៌មានជាច្រើន ស្ដីពីប្រតិកម្មរបស់រាជរដ្ឋាភិបាលកម្ពុជា ពាក់ព័ន្ធនឹងការវិវត្ដន៍កាន់តែតឹងតែងនូវអំពើហិង្សាក្នុងប្រទេសថៃ នាពេលបច្ចុប្បន្ននេះ អ្នកនាំពាក្យក្រសួងការបរទេស និងសហប្រតិបត្ដិការអន្ដរជាតិកម្ពុជា បានធ្វើសេចក្ដីថ្លែងការណ៍ដូចតទៅ ៖
១-ក្នុងនាមជាប្រទេសជិតខាង និងជារដ្ឋសមាជិកអាស៊ាន ប្រទេសកម្ពុជាមានការព្រួយបារម្ភជាខ្លាំងចំពោះអំពើហិង្សាដែលមានសភាពកាន់តែស្រួចស្រាវឡើងៗ នៅប្រទេសថៃ ។ ស្ថានការណ៍ដ៏អាក្រក់នៅប្រទេសថៃ បានជះឥទ្ធិពលយ៉ាងធ្ងន់ធ្ងរ មិនត្រឹមតែចំពោះមុខមាត់របស់ថៃប៉ុណ្ណោះទេ តែក៏ប៉ះពាល់ដល់មុខមាត់របស់អាស៊ានផងដែរ ។
២-រាជរដ្ឋាភិបាលកម្ពុជា សូមអំពាវនាវ ឱ្យគ្រប់ភាគីពាក់ព័ន្ធទាំងអស់នៅប្រទេសថៃ ចាប់ផ្ដើមធ្វើការពិភាក្សាគ្នាដោយសន្ដិភាពឡើងវិញ ដើម្បីរកដំណោះស្រាយនយោបាយចំពោះការប្រឈមមុខដាក់គ្នានាពេលនេះ ព្រមទាំងដើម្បីស្ដារឡើងវិញនូវសន្ដិភាព និងប្រក្រតីភាពជូនប្រជាជនថៃ ក៏ដូចជាស្ថិរភាពនៅក្នុងតំបន់ ។
៣-ប្រជាជនកម្ពុជាមានសេចក្ដីប្រាថ្នាតែមួយគត់ គឺចង់ឱ្យប្រជាជនថៃជាមិត្ដមានជីវភាពរស់នៅដូចប្រក្រតីក្នុងសុខសន្ដិភាព ។
នេះមិនមែនជាលើកទី១នោះទេ ដែលកម្ពុជាជាប្រទេសសមាជិកអាស៊ានបានធ្វើសេចក្ដីថ្លែងការណ៍នេះ។ កាលពីខែមុនក៏មានការអំពាវនាវឱ្យមានជំនួបកំពូលអាស៊ានមួយស្ដីពីវិបត្ដិផ្ទៃក្នុងរបស់ថៃដែរ ។
កាលពីថ្ងៃទី១០ មេសា កន្លងទៅ ក្រសួងការបរទេសបានផ្ញើលិខិតមួយច្បាប់ទៅរដ្ឋាភិបាលវៀតណាម ដែលពេលនេះជាប្រធានអាស៊ាន ដោយនិយាយថា អាស៊ានគួរកោះប្រជុំបន្ទាន់មួយ ដោយសារវិបត្ដិនេះ០បានធ្វើឱ្យរដ្ឋជាសមាជិកទាំង១០ប្រឈមនឹងផលប៉ះពាល់ ។
យោងតាមប្រភពព័ត៌មានថា កាលពីថ្ងៃសៅរ៍ចុងសបា្ដហ៍មុន ក្រសួងការបរទេសវៀតណាម បានចេញសេចក្ដីថ្លែងការណ៍មួយដោយនិយាយថា សាធារណរដ្ឋសង្គមនិយមវៀតណាម “ព្រួយបារម្ភអំពីស្ថានភាពកាន់តែអាក្រក់ទៅនៅក្នុងប្រទេសថៃ” ហើយបានអំពាវនាវឱ្យមានការបញ្ឈប់អំពើហិង្សា ។ក្រុងបាងកកបានរើបឡើងវិញនូវការការបង្ហូរឈាមគ្នារយៈពេល៥ថ្ងៃ ដែលតាមព័ត៌មានថា មានមនុស្ស៣៥នាក់ស្លាប់នៅក្នុងការប៉ះទង្គិចគ្នារវាងកម្លាំងទាហាន និងក្រុមអ្នកតវ៉ា “អាវក្រហម” នោះ ។ លោកកុយ គួង ត្រូវបានដកស្រង់សំដីដោយព្រឹត្ដិបត្រព័ត៌មានថា “ដូចដែលលោកប្រហែលជានៅចាំ អ៊ីចឹង ភាគីថៃបានបដិសេធមិនឱ្យអាស៊ានធ្វើអន្ដរាគមន៍ទេ បន្ទាប់ពីមានសំណើចុងក្រោយរបស់យើង” ។ “ដូចដែលក្រសួងការបរទេស បានថ្លែងនៅក្នុងលិខិតកាលពីខែ មេសា យើងជឿថា ស្ថានភាពនៅក្នុងប្រទេសថៃអាចប៉ះពាល់ដល់មុខមាត់របស់សមាជិកអាស៊ានទាំងអស់ ។ រដ្ឋជាសមាជិកមិនគួរនៅស្ងៀម ខណៈដែលវិបត្ដិនេះកាន់តែធ្ងន់ធ្ងរទៅទេ” ។
កាលពីម្សិលមិញ (១៦ ឧសភា) លោក កុយ គួង បានបញ្ជាក់ឡើងវិញពីការដាស់តឿនរបស់រដ្ឋាភិបាល កាលពីថ្ងៃទី២២ កុម្ភៈ ចំពោះប្រជាជនដែលធ្វើដំណើរទៅប្រទេសថៃ ដោយលើកឡើងថា ប្រសិនបើការធ្វើដំណើរនោះ មិនចាំបាច់ទេ ប្រជាជនមិនគួរឆ្លងព្រំដែនឡើយ។ លោកបានមានប្រសាសន៍បន្ថែមទៀតថា ស្ថានទូតកម្ពុជានៅសង្កាត់ វ៉ាងថងឡាង ក្នុងទីក្រុងបាងកក គឺស្ថិតនៅឆ្ងាយពីទីតាំងនៃសង្កាត់រាជប្រាស៊ុង ដែលអំពើហិង្សាថ្មីបំផុតកំពុងកើតឡើង ។ លោក កុយ គួង បានមានប្រសាសន៍ថា “ស្ថានភាពនៅជុំវិញស្ថានទូតគឺគ្មានបញ្ហាទេ ហើយបុគ្គលិកធ្វើការនៅទីនោះក៏មិនបានរងការប៉ះពាល់ដែរ” ។ លោកបានបន្ថែមថា ប្រជាជនកម្ពុជាដែលរស់នៅក្នុងទីក្រុងបាងកក អាចទាក់ទងសុំជំនួយពីស្ថានទូតរបស់ខ្លួនបាន ។
លោកសម សុត្ថា អ្នកនិពន្ធសៀវភៅមួយរូបបានចាត់ទុកថា សភាពការណ៍នាពេលបច្ចុប្បន្ននេះមិនអាចទទួលយកបានទេ ដោយសារតែសភាពការណ៍នេះវានឹងបញ្ចប់ទៅ ដោយអំពើឃោរឃៅមួយដែលចៀសមិនផុតដែលស្រដៀងទៅនឹងការបង្ក្រាបក្រុមអ្នកធ្វើបាតុកម្ម អ្នកតវ៉ាក្នុងសម័យកាល “ឧសភា ខ្មៅ” (Black May) កាលពីថ្ងៃទី១៧-១៩ ខែឧសភា ឆ្នាំ១៩៩២ នៅពេលដែលនាយឧត្ដមសេនីយ៍ សុចិន្ដា ក្រាប្រ៉ាយូន បានបញ្ជាទាហានឱ្យបំបែកជួរបាតុករ ហើយបានដាក់ខ្នោះលោកចំឡងស្រ៉ីមឿង ដែលជាមេដឹកនាំបាតុករ ដែលនោះគឺជាការសំរេចចិត្ដមួយជំរុញនាំឱ្យមានអំពើឃោរឃៅមួយដ៏គ្រោះថ្នាក់បំផុត ។ ការប៉ះទង្គិចគ្នា៣ថ្ងៃ៣យប់នោះ បានបណ្ដាលឱ្យមានការបាត់បង់ជីវិតយ៉ាងហោចណាស់៥២នាក់ របួសរាប់រយនាក់ ឃាត់ខ្លួនជាង៣.៥០០នាក់ និងបាត់ខ្លួនជាច្រើននាក់ផ្សេងទៀត ។
គេបាននិយាយថា អ្នកដែលគេឃាត់ខ្លួនភាគច្រើនត្រូវបានទទួលរងនូវការធ្វើទារុណកម្មយ៉ាងឃោរឃៅជាទីបំផុត ។ ព្រឹត្ដិការណ៍នោះត្រូវបានប្រទេសលោកខាងលិចហៅថា កោលាហលសង្គម ។ស្រដៀងគ្នានឹងព្រឹត្ដិការណ៍ដែលបាន រំលឹកមកខាងលើ គឺសភាពការណ៍នៅប្រទេសថៃនាពេលបច្ចុប្បន្ន ពិសេសចាប់តាំង ពីដើមខែមីនា ឆ្នាំ២០១០នេះមក គេអាចយល់បានពីតំរូវការរបស់អ្នកតវ៉ា និងការឆ្លើយតបរបស់មេដឹកនាំរដ្ឋាភិបាល ។ មានក្រុមអ្នកនយោបាយជាច្រើនក្រុមនៅប្រទេសថៃ តែបញ្ហាដែលប្រទូស្ដរ៉ាយនាពេលនេះ អាចសរុបបានក្រុមទាំងនោះជា២ក្រុមធំៗ គឺក្រុមបក្សប្រជាធិបតេយ្យដែលដឹកនាំរដ្ឋាភិបាលចំរុះ និងក្រុមប្រឆាំងដែលដឹកនាំដោយបក្សភឿថៃ ដែលដឹកនាំដោយអតីតនាយករដ្ឋមន្ដ្រីឆាវ៉ាលីត យុងឆៃយុទ្ធ ។
ចែករំលែកព័តមាននេះ