រាជធានីភ្នំពេញ ៖ រដ្ឋបាលរាជធានីភ្នំពេញ ក្រោមការដឹកនាំរបស់ឯកឧត្តម ឃួង ស្រេង អភិបាលរាជធានីភ្នំពេញបានយកចិត្តទុកដាក់យ៉ាងខ្លាំងក្នុងការកសាងហេដ្ឋារចនាសម្ព័ន្ធនានានៅក្នុងរាជធានីភ្នំពេញ មានទាំងការស្តារប្រឡាយ លូ ការស្ថាបនាលូថ្មីៗ ដែលមានទំហំមុខកាត់ ១ម៉ែត្រ ១ម៉ែត្រកន្លះ ២ម៉ែត្ររហូតដល់ ២ម៉ែត្រខ្លះជាដើម។ ទោះបីពេលនេះរដ្ឋបាលរាជធានីភ្នំពេញជាប់ដៃប្រយុទ្ធ និងទប់ស្កាត់ការរីករាលដាលដោយជំងឺកូវីដ-១៩ ក៏ដោយជាក់ស្ដែងសម្រាប់ពេលនេះ ក្រុមការងាររបស់ រាជធានីភ្នំពេញ បានធ្វើសកម្មភាពស្តារអាងស្តុកទឹកកខ្វក់នៅក្រោមសួនច្បារតាមបណ្តោយដងទន្លេសាប ឬសួនច្បារមុខវាំងចាប់ពីមុខផ្សារចាស់រហូតដល់សាលសន្និទចតុមុខ និងនៅរោងដំរី ខាងត្បូងព្រះបរមរាជវាំង និងកំពុងស្តារលូនៅតាមបណ្តោយផ្លូវព្រះមុនីវង្សផងដែរ ដើម្បីសម្រួលផ្លូវទឹកហួរ បញ្ចៀសការលិច ក្នុងរដូវវស្សាខាងមុខនេះ។
លោក ដួង ចាន់សារ៉ាត់ ប្រធានអង្គភាពលូទឹកបូមទឹកនៃមន្ទីរសាធារណការ និងដឹកជញ្ជូនរាជធានីភ្នំពេញបានឱ្យដឹងនៅព្រឹកថ្ងៃទី២៦ មីនានេះថា ក្រុមការងារអង្គភាពលូទឹកបូមទឹកនៃមន្ទីរសាធារណការ និងដឹកជញ្ជូនរាជធានីភ្នំពេញ ក្រោយពីមានការណែនាំពីលោក ឃួង ស្រេង អភិបាលនៃគណៈអភិបាលភ្នំពេញ អង្គភាពលូទឹកបូមទឹក បាន និងធ្វើសកម្មភាពស្ដារអាងស្តុកទឹកកខ្វក់នៅតាមបណ្តោយដងទន្លេសាបចាប់ពីផ្សារចាស់រហូតដល់សាលសន្និសីទចតុមុខ និងនៅរោងដំរីដែលមាន ចំនួន៥អាង ក្នុងនោះនៅតាមបណ្តោយដងទន្លេសាប ចំនួន៤អាង និងនៅរោងដំរីចំនួន១អាង ហើយការងារនេះបានបញ្ចប់ហើយកាលពីល្ងាចថ្ងៃទី២៥ ខែមីនា។ ជាមួយគ្នានេះដែរ ក្រុមការងារមួយក្រុមទៀតក៏បាន និងកំពុងស្តារលូនៅតាមបណ្តោយផ្លូវព្រះមុនីវង្សផងដែរ ដើម្បីសម្រួលផ្លូវទឹកហួរ បញ្ចៀសការលិច ក្នុងរដូវវស្សាខាងមុខនេះ។
ពាក់ព័ន្ធពាក់ព័ន្ធនឹងការស្ដារប្រព័ន្ធលូ ក្នុងរាជធានីភ្នំពេញនេះ លោក ដួង ចាន់សារ៉ាត់ ក៏បានធ្វើការអំពាវនាវឲ្យបងប្អូនប្រជាពលរដ្ឋចូលរួមសហការដោយកុំទុកដាក់សំរាម នៅមាត់លូ លើគម្របលូ ឬនៅមុខលូជាដើម ដែលធ្វើសំរាមទាំងនោះ ហូរមកបាំងមុខលូពេលមានភ្លៀងធ្លាក់ម្ដងៗ។ លោកបានអំពាវនាវឲ្យបងប្អូនប្រជាពលរដ្ឋចូលរួមសហការដោយកាយសំរាមចេញពីមុខ ឬមាត់លូ និងចៀសវាងឲ្យបាននូវការបិទមាត់លូ ឬបោសសំរាមចូលក្នុងលូ ឬប្រឡាយជាដើម៕ ដោយ ៖ ចន ណារិទ្ធ
ចែករំលែកព័តមាននេះ