រាជធានីភ្នំពេញ ៖ កាលពីព្រឹកម្សិលមិញនេះ សហព័ន្ធកីឡាបាល់ទាត់កម្ពុជា(FFC)បានបង្ហាញមុខគ្រូបង្វឹកថ្មីរបស់ក្រុមបាល់ទាត់ជម្រើសជាតិកម្ពុជា(ក្រុមគោព្រៃកម្ពុជា) សញ្ជាតិជប៉ុន RYU HIROSE ដែលត្រូវមកជំនួសកន្លែងលោក Felix Gonzalez…
រាជធានីភ្នំពេញ ៖ កាលពីព្រឹកម្សិលមិញនេះ សហព័ន្ធកីឡាបាល់ទាត់កម្ពុជា(FFC)បានបង្ហាញមុខគ្រូបង្វឹកថ្មីរបស់ក្រុមបាល់ទាត់ជម្រើសជាតិកម្ពុជា(ក្រុមគោព្រៃកម្ពុជា) សញ្ជាតិជប៉ុន RYU HIROSE ដែលត្រូវមកជំនួសកន្លែងលោក Felix Gonzalez Dalmas បន្ទាប់ពីគ្រូបង្វឹកសញ្ជាតិអាហ្សង់ទីនរូបនេះមិនទទួលបានកិច្ចសន្យាដឹកនាំបន្ត។
គ្រូបង្វឹកក្រុមគោព្រៃថ្មី វ័យ ៦៥ឆ្នាំ សញ្ជាតិជប៉ុនរូបនេះ ធ្លាប់មានបទពិសោធន៍ដឹកនាំក្រុមជាច្រើន ដូចជា ធ្លាប់កាន់តំណែងជានាយកក្រុម Teiyo University ពីកម្រិតទី៣ ដល់ទី១, ជាអ្នកចាត់ការទូទៅនៃក្រុម Seoul Digital University និងធ្លាប់មកដឹកនាំក្រុម Samut Prakan នៃលីគទីពីរថៃ ដែលបច្ចុប្បន្នក្លិបមួយនេះបានឡើងមកកាន់លីគកំពូលថៃ។
អតីតកីឡាកររបស់ក្រុម Teikyo High School-Chuo University រូបនេះ កំពុងតែកាន់នូវអាជ្ញាប័ណ្ណ JFA Official S-Class
License របស់ប្រទេសជប៉ុន ក្នុងនាមជាគ្រូបង្វឹក។
អ្វីដែលពិសេសជាងនេះទៅទៀតនោះគឺលោកRYU HIROSE ធ្លាប់កាន់ការងារជាគ្រូយុវជនក្លិប Guangzhou R&F ដែលជាក្លិបយក្សមួយនៅក្នុងប្រទេសចិនផងដែរ។
គួរបញ្ជាក់ថា ស្ថិតក្នុងតំណែងជាគ្រូបង្វឹកនេះលោក RYU HIROSEត្រូវទទួលខុសត្រូវបង្វឹកក្រុមគោព្រៃកម្ពុជាចូលរួមប្រកួតស៊ីហ្គេមលើកទី៣១ឆ្នាំ២០២១ នៅប្រទេសវៀតណាម និងដឹកនាំក្រុមចូលប្រកួតពានរង្វាន់ធំៗបន្តដូចជា ការប្រកួតជម្រុះ World Cup 2022, ការប្រកួតជម្រុះពានរង្វាន់ AFC Asian Cup, AFF Suzuki Cup និងព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះជាលើកដំបូង ៕
ចែករំលែកព័តមាននេះ