រាជធានីភ្នំពេញ ៖ ក្រោយពីមានករណីសត្វស្លាបងាប់ជាបន្តបន្ទាប់ នៅតំបន់បឹងស្នេហ៍ទួលពាន់តាឡី ស្ថិតនៅឃុំធាយ ស្រុកបារភ្នំ ខេត្តព្រៃវែង ត្រូវបានមន្ត្រីបសុពេទ្យចុះយកសំណាក កាលពីម្សិលមិញនេះ ដើម្បីត្រួតពិនិត្យមើលរកមូលហេតុរួចមក នៅថ្ងៃទី២៣ មីនានេះ មន្ត្រីបសុពេទ្យសន្និដ្ឋានថា សត្វទាំងនោះងាប់ដោយសារពុលទឹកបឹង ។
លោក សាយ សំអាល់ រដ្ឋមន្ត្រីក្រសួងបរិស្ថាន បានឲ្យដឹងនៅលើបណ្ដាញសង្គមហ្វេសប៊ុកយ៉ាងដូច្នេះថា «មន្ត្រីបសុពេទ្យចុះយកសំណាក ដើម្បីត្រួតពិនិត្យមើល រកមូលហេតុអ្វី បណ្តាលឱ្យសត្វស្លាបបឹងស្នេហ៍ ខេត្តព្រៃវែងងាប់ ។ ហើយសូមរងចាំលទ្ធផល ធ្វើតេស្តសំណាក ២២/០៣/២០២១» ។
ប្រភពពីមន្ទីរព័ត៌មានខេត្តព្រៃវែង បានប្រកាសថា សត្វស្លាបដល់ទៅជាង ១ពាន់ក្បាល ដែលរស់នៅក្នុងបឹងស្នេហ៍ បានងាប់ជាបន្តបន្ទាប់រយៈពេល ៧ថ្ងៃចុងក្រោយនេះ (ចាប់ពីថ្ងៃទី១៧ ដល់ទី២៣ ខែមីនា ២០២១) មន្ត្រីជំនាញនៃមន្ទីរកសិកម្ម រក្ខាប្រមាញ់ និងនេសាទខេត្តព្រៃវែង សន្និដ្ឋានថា សត្វទាំងនោះងាប់ ដោយសារពុលទឹកបឹង ។
តំបន់អភិរក្សបឹងស្នេហ៍ ទួលពាន់តាឡីនេះ មានទំហំដីជាង ៨២ហិកតា ហើយមានសត្វជាច្រើនប្រភេទ កំពុងរស់នៅដូចជា ៖ ទុង ននៀលខ្យង កុក ខ្វែក ទាព្រៃ សត្វក្អែកទឹក ក្អែកគោក និងសត្វប្រភេទផ្សេងៗទៀតផងដែរ ៕
ចែករំលែកព័តមាននេះ