រដ្ឋធានីណៃពិដោ ៖ យោធាមីយ៉ាន់ម៉ា បានចោទប្រកាន់ក្រុមអ្នកតវ៉ាប្រឆាំងនឹងរបបយោធា អំពីការបង្កអំពើហិង្សា ខណៈប្រទេសលោកខាងលិច បានដាក់ទណ្ឌកម្មបន្ថែមទៀត លើបុគ្គល និងក្រុមដែលជាប់ទាក់ទងនឹងរដ្ឋប្រហារកាលពីខែមុននិងការបង្ក្រាបដ៏ឃោរឃៅមួយ ប្រឆាំងនឹងក្រុមបាតុករ…
រដ្ឋធានីណៃពិដោ ៖ យោធាមីយ៉ាន់ម៉ា បានចោទប្រកាន់ក្រុមអ្នកតវ៉ាប្រឆាំងនឹងរបបយោធា អំពីការបង្កអំពើហិង្សា ខណៈប្រទេសលោកខាងលិច បានដាក់ទណ្ឌកម្មបន្ថែមទៀត លើបុគ្គល និងក្រុមដែលជាប់ទាក់ទងនឹងរដ្ឋប្រហារកាលពីខែមុននិងការបង្ក្រាបដ៏ឃោរឃៅមួយ ប្រឆាំងនឹងក្រុមបាតុករ នេះបើយោងតាម Channelnewsasia ចុះផ្សាយនៅថ្ងៃទី២៣ មីនា ២០២១នេះ ។
អ្នកនាំពាក្យរបបយោធាលោក Zaw Min Tun បាននិយាយថា ក្រុមបាតុករ ១៦៤នាក់ ត្រូវបានស្លា.ប់នៅក្នុងអំពើហិង្សាហើយលោកបានសម្តែងការសោកស្តាយ ចំពោះមរណភាពទាំងអស់នេះ ។
លោកបានថ្លែងប្រាប់ក្នុងសន្និសីទសារព័ត៌មាននៅរដ្ឋធានីណៃពិដោ កាលពីថ្ងៃអង្គារ ទី២៣ មីនានេះថា “ពួកគេ(ក្រុមបាតុករ)ក៏ជាពលរដ្ឋភូមាដែរ” ។
ដោយឡែកក្រុមសកម្មជនបាយនិយាយថា យ៉ាងហោចណាស់មានមនុស្សចំនួន ២៦១នាក់ ត្រូវបានសម្លាប់ នៅក្នុងការបង្ក្រាបដ៏ឃោរឃៅរបស់កងកម្លាំងសន្តិសុខ ។ សាក្សី និងមានសេចក្តីរាយការណ៍ បាននិយាយថា មនុស្ស ៣នាក់ទៀត ត្រូវបានសម្លាប់នៅក្នុងភាពចលាចល កាលពីថ្ងៃចន្ទ ក្នុងនោះរួមទាំងក្មេងប្រុសជំទង់ម្នាក់ ។
ទីភ្នាក់ងារព័ត៌មាន Mizzima បានរាយការណ៍ថា កម្លាំងសន្តិសុខ បានធ្វើការវាយឆ្មក់បន្ថែមទៀត នៅផ្នែកខ្លះ នៃទីក្រុងយ៉ាំងហ្គូន កាលពីយប់ថ្ងៃចន្ទ ដោយការបាញ់ប្រហារ បណ្តាលអោយមនុស្សមួយចំនួនរងរបួស ។
របបយោធាបានព្យាយាមបង្ហាញអំពីភាពត្រឹមត្រូវ នៃរដ្ឋប្រហារ ដោយនិយាយថា ការបោះឆ្នោតនៅថ្ងៃទី៨ ខែវិច្ឆិកា ២០២០ ដែលឈ្នះទៅលើគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រី អ៊ុង សានស៊ូជី គឺជាការក្លែងបន្លំ ។ ការចោទប្រកាន់នេះ ត្រូវបានគណៈកម្មការបោះឆ្នោត បដិសេធ ។ មេដឹកនាំយោធា បានសន្យាថា នឹងមានការបោះឆ្នោតថ្មីមួយប៉ុន្តែមិនបានកំណត់កាលបរិច្ឆេទទេ ហើយបានប្រកាសដាក់ប្រទេសក្នុងគ្រាអាសន្ន ។
លោក Zaw Min Tun អ្នកនាំពាក្យរបបយោធាមីយ៉ាន់ម៉ា បានស្តីបន្ទោសក្រុមអ្នកតវ៉ា ចំពោះអំពើហិង្សា និងការដុតផ្ទះហើយលោកក៏បាននិយាយបន្តថា កងកម្លាំងសន្តិសុខ ៩នាក់ ត្រូវបានសម្លាប់ ។
ខណៈពេលដែលបង្ហាញវីដេអូនៃរោងចក្រដែលឆេះ លោកសង្កត់ធ្ងន់ថា តើយើងអាចហៅអ្នកតវ៉ាអហិង្សាទាំងនេះ បានទេ ? លោកបន្ថែមថា ប្រទេសណា ដែលចាត់ទុកអំពើហិង្សានេះថា ជាសន្តិភាព ?
លោកបានបញ្ជាក់ថា ការធ្វើកូដកម្មរបស់ក្រុមគ្រូពេទ្យ ធ្វើអោយមន្ទីរពេទ្យមិនដំណើរការ បណ្តាលឲ្យមានមនុស្សស្លាប់ រាប់បញ្ចូលទាំងអ្នកជំងឺកូវីដ១៩ ដោយលោក Zaw Min Tun ហៅពួកគេថា “គ្មានមេត្តា និងគ្មានសីលធម៌” ។
អ្នកនាំពាក្យរូបនេះ ក៏បានចោទប្រកាន់ប្រព័ន្ធផ្សព្វផ្សាយព័ត៌មានក្នុងស្រុក ថា ក្លែងព័ត៌មាន និងធ្វើឲ្យមានការរំជើបរំជួលហើយលោកអះអាងថា អ្នកយកព័ត៌មានអាចត្រូវបានកាត់ទោស ប្រសិនបើពួកគេមានទំនាក់ទំនងជាមួយគណបក្សសម្ព័ន្ធជាតិដើម្បីលទ្ធិប្រជាធិបតេយ្យ CRPH ៕
ចែករំលែកព័តមាននេះ