រាជធានីភ្នំពេញ ៖ បន្ទាប់ពីទទួលបានព័ត៌មានអំពីសកម្មភាពបោសកាកសំណល់សំរាមសល់ពីការលក់ដូរ បាយឆា មីឆា ពេលយប់ចូលទៅក្នុងមាត់លូបង្ហូរទឹករួចមក នៅវេលាព្រឹកថ្ងៃទី២២ មីនា នេះ អាជ្ញាធរខណ្ឌមានជ័យដឹកនាំដោយលោកឌី រ័ត្នខេមរុណ បានចុះទៅណែនាំបុគ្គល២នាក់ដែលប្រព្រឹត្តិធ្វើកិច្ចសន្យាអោយបញ្ឈប់សកម្មភាពមិនល្អនេះទៀត ។
អ្នកលក់បាយឆាមីឆា២នាក់បងប្អូនខាងលើ មានឈ្មោះ លី សារ៉េត ភេទស្រី អាយុ២៧ឆ្នាំ និងម្នាក់ទៀតជាប្អូនបង្កើតមានឈ្មោះ លី មៃឃ័រ អាយុ២៤ឆ្នាំ ។ អ្នកទាំង២ស្នាក់ នៅផ្ទះជួលម្តុំកន្លែងលក់របស់ពួកគេ ដែលស្ថិតនៅតាមបណ្តោយផ្លូវជាតិលេខ២ ក្បែរស្តុបវត្តចាក់អង្រែក្រោម ក្នុងសង្កាត់ចាក់អង្រែក្រោម ខណ្ឌមានជ័យ ។
ចំពោះមុខក្រុមអាជ្ញាធរ បងប្អូនបង្កើតទាំង២នាក់បានទទួលស្គាល់នូវកំហុសដែលបានប្រព្រឹត្តិ ដោយពួកគេបានបោសសំរាមចូលទៅក្នុងមាត់លូប្រាកដមែន នឹងបានធ្វើកិច្ចសន្យាបញ្ឈប់សកម្មភាពនេះទៅពេលខាងមុខបន្តទៀតហើយ ប្រសិនបើមានសកម្មភាពនេះនៅលើកក្រោយទៀត ពួកគេសូមទទួលខុសត្រូវចំពោះវិធានការណ៍របស់អាជ្ញាធរ ។
ក្នុងឱកាសនោះ លោកឌី រ័ត្នខេមរុណ អភិបាលរងខណ្ឌមានជ័យ បានធ្វើការអប់រំដល់បុគ្គលទាំង២ អោយពួកគេបញ្ឈប់សកម្មភាពនេះទៀត ព្រោះវាជាគំរូមិនល្អ ជះឥទ្ធិពលអាក្រក់ ដល់បរិស្ថានសង្គមជាតិ ។ លោកអភិបាលរង ក៏បានពន្យល់ណែនាំអោយពួកគេ ត្រូវកែខ្លួនមកជាបុគ្គលត្រឹមត្រូវវិញ ត្រូវចូលរួមចំណែកជាមួយសង្គមជាតិ ក្នុងការចូលរួមថែរក្សាបរិស្ថានអនាម័យ ដោយត្រូវវិចខ្ចប់ទុកដាក់សំរាមដែលសេសសល់ពីការលក់ដូរ និងប្រើប្រាស់ទុកដាក់មួយកន្លែងអោយបានត្រឹមត្រូវ ដើម្បីអាចអោយរថយន្តស៊ិនទ្រីធ្វើការចុះទៅប្រមែប្រមូល ជៀសវៀងការបោះចោលសំរាមពាសវាលពាសកាល ពិសេសនោះ ការបោសសំរាមចូលទៅក្នុងមាត់លូដូចសកម្មភាពរបស់ពួកគេជាដើម ដែលជាហេតុធ្វើអោយប្រព័ន្ធលូបង្ហូរទឹកត្រូវទទួលរងការកកស្ទះ មិនអាចហូរទឹកបាន ។
គួរបញ្ជាក់ថា ខ្សែវីឌីអូរមួយឃ្លីបដែលមានរយះពេលប្រមាណ១នាទី ស្តីពីសកម្មភាពរបស់២នាក់បងប្អូនអ្នកលក់បាយឆាមីឆាខាងលើ កំពុងឈរបោសសំរាមចូលមាត់លូ ក៏ត្រូវបានគេបង្ហោះចែកចាយពេញសង្គមហ្វេសបុក និងទទួលរងការរិះគន់ជាខ្លាំងផងដែរ ចំពោះសកម្មភាព និងទង្វើមិនសមគួរមួយនេះ ៕ ដោយ៖ លីហេង
ចែករំលែកព័តមាននេះ