មីយ៉ាន់ម៉ា ៖ ពួកបាតុករក្នុងនោះ មានបណ្ដាគ្រូពេទ្យ និងគិលានុប្បដ្ឋាយិកា ដែលស្លៀកពាក់ស បានសម្រេចដើរហែក្បួនទាំងថ្ងៃផងយប់ផង ដែលនោះជាការផ្គើនថ្មី ចំពោះការគាបសង្កត់បង្ហូរឈាមរបស់របបយោធា ដែលបណ្ដាលឲ្យមនុស្សស្លា.ប់ ប្រមាណជា២៥០នាក់ហើយតាំងតែពីរដ្ឋប្រហារថ្ងៃទី១កុម្ភៈ មក។
នៅក្រុងម៉ាន់ដាឡៃ ពួកបាតុករបានលើកគ្នាដើរហែរក្បួន ដោយលើកបដាដែលចារថា ចូរជួយមេដឹកនាំរបស់យើង លោកស្រីអ៊ួងសាន់ស៊ូជី ដែលពួកយោធាឃុំទុកនៅកន្លែងសម្ងាត់ចាប់តាំងពី៤៩ថ្ងៃមកហើយ។ មានបដាខ្លះទៀតសរសេរថា ចូរជួយសង្គ្រោះអនាគតរបស់យើង។ បាតុកម្មនានាទៀតបានរៀបចំធ្វើ នៅចុងខាងជើងនិងភាគកណ្ដាលប្រទេស កាលពីយប់ថៃ្ងទី ២១មីនាប៉ុនប៉ងបង្វែរការបង្ក្រាបបង្ហូរឈាម ពីសំណាក់កងកម្លាំងសន្តិសុខ។ ពួកបាតុករបានដុតទៀនទាមទារឲ្យអ.ស.បជួយធ្វើអន្តរាគមន៍។
បណ្ដាគ្រូពេទ្យ គ្រូបង្រៀន និយោជិតធនាគារឬផ្លូវដែក បាននាំគ្នាធ្វើកូដកម្ម ចាប់តាំងពិ៦សប្ដាហ៍មកហើយ ដើម្បីបរិហាររបបយោធា។ ពួកគេធ្វើឲ្យស្ទះផ្នែកនានាទាំងមូលនៃសេដ្ឋកិច្ចរបស់ប្រទេស។នៅតាមដងវិថីនានាពួកបាតុករដែលមានមិនសូវច្រើន រយៈពេលចុងក្រោយនេះ ដោយពលរដ្ឋមីយ៉ាន់ម៉ាជាច្រើននាំគ្នាស្ថិតក្នុងផ្ទះ ខ្លាចការសងសឹក។ ចំនួនមនុស្សស្លាប់មានកាន់តែច្រើន។ បុរសម្នាក់បានត្រូវស្លាប់និង២នាក់ទៀតរងរបួស កាលពីថៃ្ងទី២១មីនា នៅក្រុងម៉ូនីវ៉ាពេលកងកម្លាំងសន្តិសុខ បាញ់លើមនុស្ស១ក្រុម ដែលប្រមូលផ្ដុំគ្នានៅត្រង់បារ៉ាស់មួយ។ ប៉ូលិសនិងទាហាន បានគប់គ្រាប់បែកធ្វើឲ្យហឹងត្រចៀក និងប្រើឧស្ម័នបង្ហូរទឹកភ្នែក បន្ទាប់មកក៏ចាប់ផ្ដើមបាញ់។
ក្រុងរ៉ង់ហ្គូនរដ្ឋធានីសេដ្ឋកិច្ច សភាពការណ៍នៅតែតានតឹងបំផុត ចាប់តាំងពីប្រជាជន ២លាននាក់ ក្នុងចំណោមប្រជាជនក្រុងទាំង៥លាននាក់ ត្រូវស្ថិតក្រោមច្បាប់អាជ្ញាសឹក។សង្កាត់មួយចំនួននៃក្រុងនោះ ធ្លាក់ក្នុងភាពចលាចល រយៈពេលប៉ុន្មានថ្ងៃចុងក្រោយនេះ ជាមួយពួកបាតុករ គប់របស់របរផ្សេងៗនិងដបសាំងដុត ដាក់កងកម្លាំងសន្តិសុខដែលបាញ់គ្រាប់ពិត។
ការបង្ក្រាបក៏មានខាងផ្នែកតុលាការ ជាមួយមនុស្សជាង២.៣០០នាក់ហើយត្រូវចាប់ខ្លួន៕ ដោយ៖ ខាន់ សុឃន
ចែករំលែកព័តមាននេះ