រាជធានីភ្នំពេញ ៖ រាជរដ្ឋាភិបាលបានស្នើឱ្យក្រុមហ៊ុនប្រេងឥន្ធនៈទាំងអស់នៅក្នុងប្រទេសកម្ពុជា កំណត់យកយន្តការរលាស់ (បញ្ចុះនិងដំឡើងថ្លៃប្រេង តាមនិន្នាការទីផ្សារអន្តរជាតិឱ្យបានឆាប់) ក្នុងការកំណត់តម្លៃប្រេងឲ្យបានច្បាស់លាស់ ប៉ុន្តែសំណើនេះត្រូវតំណាងក្រុមហ៊ុនប្រេង យកទៅជជែកពិភាក្សាសិន ហើយនឹងឆ្លើយតបនៅថ្ងៃអង្គារ ទី៨ កញ្ញា សបា្តហ៍ក្រោយ ។
នេះបើយោងតាមអ្នកនាំពាក្យក្រសួងពាណិជ្ជកម្ម លោក កែម រដ្ឋា ដែលប្រាប់គេហទំព័រកោះសន្តិភាពតាមទូរស័ព្ទ កាលពីរសៀលថ្ងៃទី៤ កញ្ញា ។
បើតាមអ្នកនាំពាក្យដដែលលទ្ធផលនៃកិច្ចប្រជុំរវាងក្រសួងពាណិជ្ជកម្ម និងតំណាងក្រុមហ៊ុនប្រេង កាលពីថ្ងៃទី៣ កញ្ញា ក្រុមហ៊ុនប្រេងបានលើកឡើងពីការលំបាកមួយចំនួនដូចជាបញ្ហាស្តុក ការឡើងចុះតម្លៃប្រេងឆៅលឿន នៅលើទីផ្សារអន្តរជាតិ ខណៈក្រុមហ៊ុនបាននាំប្រេងឆ្អិនចូលពីប្រទេសសិង្ហបុរី ថៃ និងវៀតណាមជាដើម ។
យ៉ាងណាក៏ដោយ លោក កែម រដ្ឋា បានបញ្ជាក់ថា ក្រសួងពាណិជ្ជកម្មយល់ពីការលំបាកខ្លះៗរបស់ក្រុមហ៊ុន ប៉ុន្តែក្រសួងក៏ពិនិត្យមើលដែរអំពីបរិមាណនាំចូលជាច្រើនដង ហើយថាបញ្ហាស្តុក អត់មានបញ្ហាច្រើននោះទេ។
លោកបន្តថា ក្រុមហ៊ុនប្រេងក្នុងស្រុកលក់រាយមួយចំនួន បានបញ្ចុះតម្លៃប្រេងលឿន ដូចជា SAVIMEX ជាដើម ។ ប៉ុន្តែក្រុមហ៊ុនប្រេងអន្តរជាតិដែលលក់ដុំដូចជា CALTEX និង TOTAL គឺមានការលំបាកខ្លះៗ មិនទម្លាក់ថ្លៃលឿន ដោយសារចង្វាក់ការងារធ្វើតាមស្តង់ដាអន្តរជាតិ (Standard) ។ ទោះជាយ៉ាងនេះក្តី បើតាមអ្នកនាំពាក្យក្រសួងពាណិជ្ជកម្ម យើងរង់ចាំការឆ្លើយតបតាមការសន្យារបស់ក្រុមហ៊ុននីមួយៗ នៅថ្ងៃអង្គារ សបា្តហ៍ក្រោយនេះ ។
គួរបញ្ជាក់ថា មកដល់ពេលនេះខណៈតម្លៃប្រេងឆៅនៅលើទីផ្សារអន្តរជាតិធ្លាក់ថ្លៃ មកនៅក្រោម៤០ដុល្លារក្នុងមួយបារ៉ែលនោះ តម្លៃប្រេងសាំងនៅក្នុងប្រទេសកម្ពុជាត្រូវបានគេមើលឃើញថា មានការទម្លាក់ថ្លៃយឺត ដោយក្នុងនោះ តម្លៃប្រេងសាំងនៅស្ថានីយប្រេង CALTEX សាំងស៊ុបពែ ៤.១០០រៀល សាំងធម្មតា ៣.៨៥០រៀល ម៉ាស៊ូត ៣.៦០០រៀល, TOTAL សាំងស៊ុបពែ ៤.១០០រៀល សាំងធម្មតា ៣.៨៥០រៀល និងប្រេងម៉ាស៊ូត ៣.៦០០រៀល , TELA សាំងស៊ុបពែ ៤.១០០រៀល សាំងធម្មតា ៣.៨៥០រៀល ប្រេងម៉ាស៊ូត ៣.៦០០រៀល, PTT សាំងស៊ុបពែ ៤.១០០រៀល សាំងធម្មតា ៣៨៥០រៀលនិងប្រេងម៉ាស៊ូត៣៦០០រៀល, SOKIMEX ស៊ុបពែ ៤១០០រៀល ធម្មតា ៣.៨៥០រៀល និងប្រេងម៉ាស៊ូត ៣.៦០០រៀល និងស្ថានីយប្រេង SVM (Savimex) សាំងស៊ុបពែ ៣.៦០០រៀល សាំងធម្មតា ៣.៤០០រៀល និងប្រេងម៉ាស៊ូត២.៨០០រៀល ។
មជ្ឈដ្ឋាននានានៅរាជធានីភ្នំពេញ និយាយថា ប្រេងនៅកម្ពុជាយើង បើទីផ្សារអន្តរជាតិឡើងថ្លៃ គេនាំគ្នាឡើងថ្លៃភ្លាម ចាប់អត់ឈ្នះទេ។ ប៉ុន្តែបើទីផ្សារអន្តរជាតិធ្លាក់ថ្លៃវិញ ខាងយើងធ្លាក់ដែរ តែដូចអូសឫស្សីបញ្ច្រាសចុង ៕
ចែករំលែកព័តមាននេះ