ភ្នំពេញ៖ នាយករដ្ឋមន្ត្រីកម្ពុជា-វៀតណាម-ឡាវ បានឯកភាពពិចារណាអំពីការដំណើរការឡើងវិញនូវការហោះហើរអន្តរជាតិរវាងកម្ពុជា ឡាវ និងវៀតណាម ដើម្បីជំរុញពាណិជ្ជកម្ម និងការវិនិយោគ ក៏ដូចជាការផ្លាស់ប្តូររវាងប្រជាជននៃប្រទេសទាំងបី។
ការព្រមព្រៀងនេះ ត្រូវបានធ្វើឡើង ក្នុងកចិ្ចប្រជុំតាមប្រព័ន្ធវិដេអូ នៅថ្ងៃទី១០ ខែមីនា ឆ្នាំ២០២១។
លទ្ធផលនៃកិច្ចប្រជុំ ដែលក្រសួងការបរទេស បានផ្សព្វផ្សាយ បង្ហាញថា ក្នុងកិច្ចប្រជុំនាយករដ្ឋមន្ត្រីទាំងបី បានឯកភាពគ្នាពង្រឹងបន្ថែមនូវកិច្ចសហប្រតិបត្តិការជាច្រើន ក្នុងនោះ ក៏មានការគាំទ្រគ្នាទៅវិញទៅមក ក្នុងការប្រយុទ្ធប្រឆាំងការរីករាលដាលនៃជំងឺកូវីដ១៩។ នាយករដ្ឋមន្ត្រីទាំងបី ក៏បានឯកភាពគ្នាក្នុងការផ្តល់ការចាក់វ៉ាក់សាំងកូវីដ១៩ ទៅវិញទៅមក ដោយមិនគិតថ្លៃដល់មន្ត្រីការទូត និងសិស្សនិស្សិតកម្ពុជា ឡាវ និងវៀតណាម ដែលកំពុងស្នាក់នៅក្នុងប្រទេសនីមួយៗ។
ក្រសួងការបរទេស ក៏បានប្រកាសថា ថ្នាក់ដឹកនាំទាំងបី បានឯកភាពពង្រឹងបន្ថែមកិច្ចសហប្រតិបត្តិការលើវិស័យនយោបាយ សន្តិសុខ ការពារជាតិ ការគ្រប់គ្រងព្រំដែន ពាណិជ្ជកម្ម និងវិនិយោគ ការតភ្ជាប់ ថាមពល និងអប់រំ។
នាយករដ្ឋមន្ត្រីទាំងបី ក៏បានឯកភាពបន្តរក្សា និងអនុវត្តន៍យ៉ាងមានប្រសិទ្ធភាពនូវយន្តការនៃកិច្ចសហប្រតិបត្តិការដែលមានស្រាប់ ជំរុញកិច្ចសហប្រតិបត្តិការរវាងបណ្តាខេត្តជាប់ព្រំដែន អនុវត្តន៍ឲ្យមានប្រសិទ្ធភាពនូវរាល់កិច្ចព្រមព្រៀង ស្តីពី ការគ្រប់គ្រងព្រំដែន សហការបន្ថែមក្នុងការការពារសន្តិសុខតាមបណ្តោយព្រំដែនរួម សម្របសម្រួលសកម្មភាពពាណិជ្ជកម្ម និងវិនិយោគ ព្រមទាំងការឆ្លងកាត់របស់ប្រជាជន និងទំនិញនៅតាមបណ្តាប៉ុស្តិ៍ត្រួតពិនិត្យព្រំដែន៕
ចែករំលែកព័តមាននេះ