រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាប់ថា តំបន់មួយចំនួនរបស់កម្ពុជានឹងមានភ្លៀងធ្លាក់ ហើយមានផ្គរ រន្ទះ ។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី៩ ខែមិនា ឆ្នាំ២០២១ ជូនដំណឹងស្តីពីស្ថានភាពធាតុអាកាស ចាប់ពីថ្ងៃទី១០ ដល់ថ្ងៃទី១៦ ខែមិនា ឆ្នាំ២០២១ បានឲ្យដឹងថា រដូវប្រាំងបាននឹងកំពុងចាប់ផ្ដើម ។
ទ្រនុងសម្ពាធខ្ពស់ពីប៉ាស៊ីហ្វិកបានធ្លាក់ចុះបន្តិច គ្របលើតំបន់ខ្ពង់រាបនៃភាគឦសានដែលជាហេតុបណ្តាលឲ្យមានបាតុភូតកើតឡើងនូវសម្ពាធទាបតូចៗដែលបំលែងពីកំដៅ-ខ្យល់ (THERMODYNAMIC) បង្កឲ្យមានភ្លៀងដោយអន្លើ ។
ក្រសួងបន្តថា ស្ថានភាពបែបនេះនឹងធ្វើឲ្យបណ្តាខេត្តនៅតំបន់វាលទំនាបកណ្ដាលមានសីតុណ្ហភាពអប្បបរមា មានពី ២៤-២៧អង្សាសេ និងសីតុណ្ហភាពអតិបរមា មានពី ៣៤-៣៧ អង្សាសេ ។ នៅថ្ងៃទី១០-១២ ខែមីនា មានភ្លៀងផ្គរ រន្ទះ ពីខ្សោយទៅមធ្យមនៅបណ្តាខេត្តភាគពាយ័ព្យ ។
ចំណែកបណ្តាខេត្ត ជាប់ជួរភ្នំដងរែក និងខ្ពង់រាបឦសានវិញ មានសីតុណ្ហភាពអប្បបរមា មានពី ២៣-២៦ អង្សាសេ និងសីតុណ្ហភាពអតិបរមាមានពី ៣៥-៣៧ អង្សាសេ ។ នៅថ្ងៃទី១០ ខែមីនា មានភ្លៀងផ្គរ រន្ទះ ជាមធ្យមនៅខេត្តឧត្តរមានជ័យ ។
ដោយឡែកតំបន់មាត់សមុទ្រ មានសីតុណ្ហភាពអប្បបរមា មានពី ២៣-២៦ អង្សាសេ និងសីតុណ្ហភាពអតិបរមា មានពី ៣២-៣៥អង្សាសេ ធ្វើមានភ្លៀងផ្គរ រន្ទះ ពីខ្សោយទៅមធ្យម ។ ជាមួយក្រសួងបានអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ចំពោះបាតុភូតធម្មជាតិដែលកើតឡើងដោយករណីណាមួយ ៕
ចែករំលែកព័តមាននេះ