ចង់ជោគជ័យត្រូវមើលទម្លាប់ការងាររបស់មនុស្សជោគជ័យ !
- ភ្នំពេញ
ភាគទី ១២ ៖ ក្រជាវាសនា ? មានជាវាសនា ? ខ្ញុំគិតថា មនុស្សយើងមិនអាចជ្រើសរើសបានថា តើគួរកើតនៅក្នុងគ្រួសាររបស់អ្នកមាន…
ភាគទី ១២ ៖ ក្រជាវាសនា ? មានជាវាសនា ? ខ្ញុំគិតថា មនុស្សយើងមិនអាចជ្រើសរើសបានថា តើគួរកើតនៅក្នុងគ្រួសាររបស់អ្នកមាន…
ភាគទី ១២ ៖ ក្រជាវាសនា ? មានជាវាសនា ? ខ្ញុំគិតថា មនុស្សយើងមិនអាចជ្រើសរើសបានថា តើគួរកើតនៅក្នុងគ្រួសាររបស់អ្នកមាន ឬ ក៏អ្នកក្រនោះទេ ។ ដូច្នេះពេលយើងកើតមកក្នុងគ្រួសារក្រីក្រ ឬ អ្នកមាន វាអាចជាវាសនារបស់យើង ។ ប៉ុន្តែទោះបីជាយ៉ាង ណាក៏ដោយចុះ បើសិនជាយើងចាស់ជរាទៅ ឬ ក៏ពេលស្លាប់ទៅនៅជាអ្នកក្រ នោះមិន មែនមកពីវាសនាទេ គឺមកពីខ្លួនយើងផ្ទាល់ដែលមិនបានប្រឹងរៀនសូត្រ ប្រឹងធ្វើការ ឬប្រឹងរកស៊ី ដោយប្រើខួរក្បាល ប្រើដៃពីរ និងជើងពីរជាដើម ដើម្បីបង្កើតអនាគតមួយដែលយើងចង់បាន ។
ខ្ញូំទទួលស្គាល់ថា អ្នកមាន និងមនុស្សជោគជ័យទាំងអស់ ពួកគេសុទ្ឋតែជាមនុស្សប្រឹងប្រែងទាំងកម្លាំងកាយចិត្ត និងប្រាជ្ញាដើម្បីសម្រេចក្តីស្រមៃរបស់ពួកគេ ។ ដោយកើតមកក្នុងគ្រួសារក្រីក្រ ខ្ញុំបានតាំងចិត្តថា ត្រូវប្រឹងរៀន ប្រឹងធ្វើការ និងប្រឹងរកស៊ីតាមសមត្ថភាព ដើម្បីបង្កើតអនាគតមួយដែលខ្ញុំចង់បាន ។
ខ្ញុំបានស្គាល់មនុស្សទាំងអ្នកមាន និងអ្នកក្រ ទាំងអ្នកជោគជ័យ និងបរាជ័យក្នុងជីវិត ។ អ្វីដែលខ្ញុំកត់សម្គាល់នោះ គឺអ្នកមាន និងមនុស្សជោគជ័យ ពួកគេប្រឹងប្រែងខ្លាំងណាស់ ។ ពួកគេធ្វើការមិនចេះនឿយហត់ឡើយ ចាប់តាំងពីក្រោកពីតំណេកតាំងពីព្រឹកព្រលឹមមក ។ នៅពេលដែលឃើញអំពីទម្លាប់រស់នៅ របៀបធ្វើការ និងរបៀបរកស៊ីរបស់អ្នកមាននោះ ខ្ញុំគិតថា ពួកគេមានបានមិនមែនដោយភាពចៃដន្យទេ ប៉ុន្តែដោយសារការខិតខំប្រឹងប្រែងរបស់ពួកគេដើម្បីសម្រេចជៅគជ័យ ។
ឧកញ៉ា ឬ ក៏ពពួកអ្នកមាន ធ្វើការជាប់រហូតតាំងពីក្រោកពីដំណេកមក ។ ពេលខ្លះពួកគេធ្វើការមិនគិតយប់ថ្ងៃ សៅរ៍ អាទិត្យ និងពេលបាយទឹកឡើយ ។ ខ្ញុំបានព្យាយាមចាប់យកទម្លាប់ការងារតាមពួកគេ ហើយក្នុងកម្រិតណានោះវាបានជួយខ្ញុំអោយបង្កើតអនាគតមួយដែលខ្ញុំចង់បាន គឺជីវភាពសមរម្យក្នុងសង្គម ។
ប៉ុន្តែ ខ្ញុំសូមប្រកាសថា សម្រាប់រូបខ្ញុំ ខ្ញុំមិនចង់ដល់គោលដៅជីវិតជាអ្នកមានស្តុកស្តម្ភឡើយ ។ ខ្ញុំគ្រាន់តែចង់បាន ជីវិតរស់នៅដ៏សមរម្យ សប្បាយរីករាយ និងមានន័យក្នុងសង្គមប៉ុណ្ណោះ ។ ខ្ញុំសារភាពថា ខ្លួនខ្ញុំផ្ទាល់តស៊ូមិនទាន់ដល់ឧកញ៉ា និងអ្នកមានជាច្រើនឡើយ ។ ខ្ញុំពិតជាគោរព និងវាយតម្លៃខ្ពស់ចំពោះទម្លាប់ការងារ និងរកស៊ីរបស់ពួកគេ ។
តើអ្នកអាចទទួលបានអ្វីពីបទពិសោធន៍ជីវិតនេះ ?
បើចង់ក្លាយជាអ្នកមាន ចង់ក្លាយជាមនុស្សជោគជ័យនោះ យើងត្រូវតែចាប់យកទម្លាប់របស់មនុស្សអ្នកមាន និងមនុស្សជោគជ័យ ។ សៀវភៅដែលមានចំណងជ៉ងថា «ទម្លាប់ជោគជ័យរបស់មហាសេដ្ឋី» ឬ ភាសាអង់គ្លេសហៅថា Millionaire Sucess Habits បានសរសេរថា ជោគជ័យមិនមែនទាក់ទងនឹងសំណាងទេ ។ មនុស្សជោគជ័យ មិនមែនគ្រាន់តែអង្គុយរង់ចាំសំណាងមកដល់ឡើយ ។ ពួកគេស្វែងរក និងចាប់យកភាពរុងរឿង ។ ពួកគេជាមនុស្សមានចក្ខុវិស័យ ដែលហ៊ានប្រថុយ និងពុះពារឧបសគ្គគ្រប់ស្ថានភាព ។
ដូច្នេះ បើសិនជាអ្នកចង់ជោគជ័យ និងក្លាយជាសេដ្ឋីនោះ អ្នកត្រូវយល់អោយច្បាស់អំពីទម្លាប់ការងាររបស់មនុស្សប្រភេទនេះ ហើយធ្វើតាមពួកគេអោយបាន ។ ពេលនោះ ជោគជ័យនឹងនៅខាងអ្នកហើយ បរាជ័យ និងភាពក្រីក្រនឹងមិនហ៊ានមកជិតអ្នកឡើយ ៕
ចែករំលែកព័តមាននេះ