រាជធានីភ្នំពេញ ៖ លោក ហេង យិនហៅ ចំប៉ីខ្មៅ ដែលគេស្គាល់នៅក្នុងបណ្តាញសង្គម រួម និងមិត្តភក្តិក្នុងបណ្តាញសង្គមប្រមាណជាង៣០នាក់ បាននាំគ្នានិមន្តព្រះសង្ឃចំនួន៥អង្គរៀបចំសូត្រមន្តធ្វើបុណ្យឧទ្ទិសកុសលជូនដល់សពមេឧក្រិដ្ឋជន អ៊ឹម សុវណ្ណរិទ្ធ នៅថ្ងៃគម្រប់ខួប៧ថ្ងៃរបស់ឧក្រិដ្ឋជន៤នាក់ ដែលបានបានបាត់បង់ជីវិត ។
នៅព្រឹក ថ្ងៃទី០៦ ខែមិនា ឆ្នាំ២០២១ នៅឈាបនដ្ឋានវត្តទឹកថ្លា ក្នុងសង្កាត់ទឹកថ្លាខណ្ឌសែនសុ នេះដែរ គេឃើញក្រុមគ្រួសារសពឧក្រិដ្ឋជន រី ពីសី ក៏បាននិមន្តព្រះសង្ឃចំនួន ៤អង្គ ធ្វើបុណ្យគម្រប់៦៧ថ្ងៃដែរ ។ ការរៀបចំធ្វើបុណ្យគម្រប់៧ថ្ងៃនេះ ត្រូវបានគេដឹងថា បន្ទាប់ពីលោក ហេង យិន ហៅចំប៉ីខ្មៅ បានទិញកោដ្ឋយកទៅដាក់ធាតុឧក្រិដ្ឋជន អ៊ឹម សុវណ្ណរិទ្ធ កាលពីថ្ងៃទី០៤ មិនា ឆ្នាំ២០២១ នឹងបានបង្ហោះសារនៅក្នុងបណ្តាញសង្គម របស់ខ្លួនព្រមទាំងអំពាវនាវដល់អ្នកដែលចង់ចូលបុណ្យតាមABAខ្លួន ។
តាមព័ត៌មានអោយដឹងថា នៅវេលាម៉ោងប្រមាណ៨ព្រឹក គេឃើញម្តាយរបស់សពឧក្រិដ្ឋជនឈ្មោះ រី ពីសី ក៏បាននិមន្តព្រះសង្ឃចំនួន៤អង្គសូត្រ ឧទ្ទិសកុសលអោយកូនដែលបានស្លាប់ទៅ ។
តាមស្ត្រីជាម្តាយបានរៀបរាបទាំងទឹកមុខស្រងូតស្រងាត់ថា គ្មានឪពុកម្តាយណាម្នាក់ចង់អោយកូនប្រព្រឹត្តនូវអំពើអាក្រក់នោះទេ អ្វីដែលខុសឆ្គងប្រព្រឹត្តិអំពើមិនល្អ ក្នុងសង្គមវាហួសទៅហើយ សូមអោយកូនចាប់ជាតិកើតមកជាតិក្រោយ ប្រព្រឹត្តតែអំពើល្អ ។
បន្ទាប់ពីសូត្រមន្តធ្វើបុណ្យចប់នៅវេលាម៉ោងប្រមាណ៩ព្រឹក គេឃើញលោក ហេង យិន ហៅចំប៉ីខ្មៅ និងព្រះសង្ឃមួយអង្គព្រះនាម ធម្មធរោ សុម៉ានីនគង់នៅវត្តមួយក្នុងស្រុករលៀបប្អៀរ ខេត្តកំពង់ឆ្នាំង រួមទាំងមិត្តក្នុងបណ្តាញសង្គមប្រមាណជាង៣០នាក់ ក៏បានរៀបចំនិមន្តព្រះសង្ឃចំនួន៥អង្គ សូត្រមន្តឧទ្ទិសកុសលជួនដល់វិញ្ញាណក្ខន្ធលោក អ៊ឹម សុវណ្ណរិទ្ធ ដែលគេស្គាល់ថា ជាមេឧក្រិដ្ឋជនចាប់ជំរិត និងប្លន់នោះ ។
តាមព័ត៌មានអោយដឹងថា នៅក្នុងចំណោមអ្នកមកចូលរួមធ្វើបុណ្យនោះក៏មានបងប្អូន សាច់ញាតិ និងខ្លះជាអ្នករួមការងារ និងស្គាល់បានមកចូលរួមដែរ តែមិនទំលាយអោយដឹងនោះទេ ។
ព្រះតេជគុណព្រះនាម ធម្មធរោ សុម៉ានីន បានមានសង្ឃដិការអោយដឹងថា ព្រះអង្គមិនមែនជាសាច់ញាតិ បងប្អូនសព ឈ្មោះ អ៊ឹម សុវណ្ណរិទ្ធនោះទេ តែក្នុងនាមជាជាតិសាសន៍ដូចគ្នាដែលកាន់ព្រះសាសនា ព្រះអង្គនឹងញោម ហេង យិន ហៅចំប៉ីខ្មៅ ក៏បានផ្តួចផ្តើមរៀបចំធ្វើពិធីនេះឡើង ដោយមានការចូលរួមពីញោមៗក្នុងបណ្តាញសង្គម ។
គួរបញ្ជាក់ថា ក្រុមឧក្រិដ្ឋជន៤នាក់ ត្រូវបានកម្លាំងកងរាជអាវុធហត្ថរាជធានីភ្នំពេញបាញ់ស្លាប់ កាលពីវេលាម៉ោងប្រមាណ១១ព្រឹក ថ្ងៃទី០១ ខែមីនា ឆ្នាំ២០២១កន្លងមកនៅចំណុច វិឡាលេខ២០ បុរីអង្គរភ្នំពេញក្នុងភូមិ បន្លាស្អិតសង្កាត់ឃ្មួញ ខណ្ឌសែនសុខ រាជធានីភ្នំពេញបន្ទាប់ពី រៀបចំគម្រោងចូលទៅជំរិត និងប្លន់សម្លាប់លោក ម៉ៅ ហួរ ភេទប្រុសអាយុ ៥៨ឆ្នាំ ជាពាណិជ្ជករ និងជាមន្ត្រីអគ្គីសនីមិនបានសម្រេច ។
សពឧក្រិដ្ឋជន ទាំង៤នាក់ត្រូវបញ្ជូនទៅតំកល់នៅឈាបនដ្ឋានវត្តទឹកថ្លា ហើយសពឧក្រិដ្ឋជន៣នាក់ ត្រូវបានក្រុមគ្រួសារទៅទទួលយក និងបានបូជាជាបន្តបន្ទាប់ នៅថ្ងៃទី០២ ខែមិនា ។ ដោយឡែកសពឧក្រិដ្ឋជនម្នាក់ឈ្មោះ អ៊ឹម សុវណ្ណរិទ្ធ ជាមេក្លោងពុំមានគ្រួសារទៅទទួលយកឡើយ ៕
ចែករំលែកព័តមាននេះ