ខេត្តបន្ទាយមានជ័យ ៖ មានករណីអគ្គីភ័យបានឆាបឆេះផ្ទះ១ខ្នង និងខូចខាតទ្រព្យសម្បត្តិអស់ទាំងស្រុងកាលពីវេលាម៉ោង១២និង៣០នាទីថ្ងៃត្រង់ថ្ងៃទី៤ ខែមីនា ឆ្នាំ២០២១ ស្ថិតភូមិស្រះរាំង ឃុំស្រះរាំង ស្រុកមង្គលបូរី ខេត្តបន្ទាយមានជ័យ ។
លោកវរសេនីយ៍ឯក ស៊ិន ណារ៉ាក់ អធិការនគរបាលស្រុកមង្គលបូរីបានប្រាប់ឱ្យដឹងថា ម្ចាស់ផ្ទះរងគ្រោះខាងលើឈ្មោះ ញៀន សៀក ភេទស្រី អាយុ៦២ឆ្នាំ រស់នៅភូមិឃុំកើតហេតុខាងលើ។
លោកអធិការបានបញ្ជាក់ថា នៅពេលកើតហេតុ ម្ចាស់ផ្ទះបានអង្គុយលេងនៅសំយ៉ាបមុខផ្ទះ ស្រាប់តែមានអណ្តាតភ្លើងបានឆាបឆេះផ្ទះផ្នែកខាងលើ ហើយក៏ស្រែកឆោឡោបង្កការភ្ញាក់ផ្អើលដល់អ្នកជិតខាងឱ្យជួយពន្លត់ដែរ ប៉ុន្តែអណ្តាតភ្លើងឆាបឆេះខ្លាំង ចូលពន្លត់មិនបាន បណ្តាលឱ្យភ្លើងកាន់តែឆាបឆេះយ៉ាងសន្ធោសន្ធៅ រហូតដល់រថយន្តពន្លត់អគ្គិភ័យរបស់អធិការដ្ឋាននគរបាលស្រុកមង្គលបូរីចុះមកដល់បាញ់ពន្លត់ ទើបមិនបណ្តាលឱ្យឆេះរាលដាលដល់ផ្ទះអ្នកជិតខាងឡើយ ប៉ុន្តែផ្ទះមួយខ្នងខាងលើត្រូវអគ្គិភ័យឆាបឆេះអស់ទាំងស្រុង ។
លោកអធិការបានបញ្ជាក់បន្តថា ផ្ទៈ១ខ្នងខាងលើធ្វើអំពីឈើប្រក់ស័ង្កសី ជញ្ជាំងក្តារ មានទំហំ៦ម៉ែត្រគុណ៨ម៉ែត្រ ត្រូវភ្លើងឆាបឆេះអស់ទាំងស្រុង និងខូចខាតអស់ទ្រព្យសម្បត្តិរួមមាន ទូរទស្សន៍១គ្រឿង កង្ហារ៤គ្រឿង សំលៀកបំពាក់ ចានឆ្នាំង អង្ករ៧០គីឡូក្រាម ប្រាក់ជិត១ម៉ឺនបាត ខ្សែ.កមាស១តម្លឹង ប្លាកដៃប្លាទីន១ខ្សែទម្ងន់១តម្លឹង និងប្រាក់៤,៧៥០.០០០រៀល។
លោកអធិការបានបញ្ជាក់បន្តទៀតថា នៅក្នុងហេតុការណ៍អគ្កីភ័យឆាបឆេះផ្ទះ១ខ្នងខាងលើ ត្រូវបានជួយអន្តរាគមន៍ពន្លត់ ដោយមានរថយន្តពន្លត់អគ្គីភ័យ១គ្រឿងប្រើទឹកអស់២រថយន្ត និងកម្លាំងនគរបាលរួមជាមួយប្រជាពលរដ្ឋបាននាំគ្នាជួយពន្លត់ផងដែរ ដោយមិនមានមនុស្សណាម្នាក់រងគ្រោះថ្នាក់ឡើយ ៕
ចែករំលែកព័តមាននេះ