ប្រទេសមីយ៉ាន់ម៉ា ៖ ប្រមុខសិទ្ធិមនុស្សអ.ស.ប លោកស្រី MICHELLE BACHELET
បានអំពាវនាវកាលពីថ្ងៃទី៤ មីនា ដល់កងទ័ពមីយ៉ាន់ម៉ាឲ្យបញ្ឈប់ការផ្តាច់ជីវិត និងចាប់ឃុំឃាំងពួកបាតុករ ។
យោងតាមពត៌មាននានាដែលស្នងការជាន់ខ្ពស់ អ.ស.ប ខាងសិទ្ធិមនុស្សទទួលបានថា មនុស្សយ៉ាងតិច៥៤នាក់បានបាត់បង់ជីវិត និងជាង១.៧០០នាក់ចាប់ខ្លួន តាំងពីរដ្ឋប្រហារថ្ងៃទី១ កុម្ភៈ មក ។ ប៉ុន្តែចំនួនអ្នកបាត់បង់ជីវិតអាចមានខ្ពស់ជាងនេះទៀត ។ ក្នុងចំណោមអ្នកស្លាប់ដែលគេរាយការណ៍យ៉ាងតិច៣៨នាក់ត្រូវបាត់បង់ជីវិតក្នុងទីក្រុងជាច្រើនគ្រាន់តែនាថ្ងៃទី៣មីនាតែមួយគត់ ។
បេសកជន អ.ស.ប ទទួលបន្ទុកស៊ើបអង្កេតលើសិទ្ធិមនុស្សនៅមីយ៉ាន់ម៉ា បានអំពាវនាវកាល
ពីថ្ងៃទី៤ មីនា ឲ្យមានទណ្ឌកម្មកាន់តែទូលាយ ប្រឆាំងរដ្ឋាភិបាលយោធា ដែលលោកចោទប្រកាន់ថាបានធ្វើឃាតនិងចាប់ខ្លួនដោយខុសច្បាប់ បាតុករដោយសន្តិវិធីច្រើននាក់ចាប់តាំងពី
រដ្ឋប្រហារមក ។
លោក THOMAS ANDREWS ស្នើដល់ក្រុមប្រឹក្សាសន្តិសុខ អ.ស.ប ដែលរួមប្រជុំនាថ្ងៃទី៥ មីនា ដើម្បីពិភាក្សាពីសភាពការណ៍នៅមីយ៉ាន់ម៉ាឲ្យដាក់ការហ៊ុមព័ទ្ធអាវុធ និងដាក់ទណ្ឌកម្មសេដ្ឋកិច្ចប្រឆាំងបណ្ដាសមាជិករបបយោធា ។ លោកក៏ស្នើផងដែរដល់ក្រុមប្រឹក្សាសន្តិសុខឲ្យប្ដឹងទៅតុលាការព្រហ្មទណ្ឌអន្តរជាតិពីបទប្រព្រឹត្តអំពើសាហាវព្រៃផ្សៃ ដែលលោកចាត់ទុក
ថាជាបទឧក្រិដ្ឋប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ។
នៅមីយ៉ាន់ម៉ាការបាត់បង់ជីវិតរបស់យុវនារីម្នាក់ អាយុ១៩ឆ្នាំ ដោយគ្រាប់កាំភ្លើងពេលនាងចូលរួមក្នុងបាតុកម្ម កាលពីថ្ងៃទី៤ មីនាក្នុងពិធីបញ្ចុះសពនាងនៅទីក្រុងម៉ាន់ដាឡៃ បានក្លាយជានិមិត្តរូបនៃការតស៊ូប្រឆាំងអំពើហិង្សាបង្ហូរឈាមរបស់របបយោធាមីយ៉ាន់ម៉ា ។ យុវនារីរូបនោះមានឈ្មោះថា KYAL SIN ហៅANGE ជាសិល្បការិនីខាងរបាំនិងសៀករហ័សកម្ម ។
ប៉ុន្មានថ្ងៃមុនពេលនាងបាត់បង់ជីវិតនាងបានសេសេរតាម FACEBOOK ប្រាប់ពីក្រុមឈាមរបស់នាង និងការយល់ព្រមរបស់នាងធ្វើអំណោយសរីរាង្គនានា បើនាងត្រូវជួបរឿងអ្វីមួយ ។ យុវនារីរូបនោះត្រូវបាញ់បានបាត់បង់ជីវិតកាលពីថ្ងៃទី៣ មីនា ដោយកងកម្លាំងសន្តិសុខក្នុងឱកាសនៃបាតុកម្មនៅទីក្រុងម៉ាន់ដាឡៃភាគកណ្ដាលប្រទេស ។ នាថ្ងៃនោះបាតុករដល់៣៨នាក់ ត្រូវបាត់បង់ជីវិតក្នុងប្រទេសជាថ្ងៃដ៏បង្ហូរឈាមបំផុតចាប់តាំងពីរដ្ឋប្រហារយោធាមក ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ