រាជធានីភ្នំពេញ ៖ ខណៈការឆ្លងក្នុងព្រឹត្តិការណ៍សហគមន៍ ២០កុម្ភៈ មិនទាន់មានសញ្ញាថមថយនៅឡើយ ហើយក៏មិនទាន់ដឹងថាអាចនឹងបិទបញ្ចប់ពេលណាដែរនោះ គេសង្កេតឃើញថា ពលរដ្ឋនៅរាជធានីភ្នំពេញមួយចំនួនបន្តធ្វើការប្រមូលផ្តុំហាត់ប្រាណនៅតាមសួនច្បារនានា ក៏ដូចជានៅម្តុំមុខវាំង និងសួនច្បារស្តូបព្រះបរមរតនកោដ្ឋ…
រាជធានីភ្នំពេញ ៖ ខណៈការឆ្លងក្នុងព្រឹត្តិការណ៍សហគមន៍ ២០កុម្ភៈ មិនទាន់មានសញ្ញាថមថយនៅឡើយ ហើយក៏មិនទាន់ដឹងថាអាចនឹងបិទបញ្ចប់ពេលណាដែរនោះ គេសង្កេតឃើញថា ពលរដ្ឋនៅរាជធានីភ្នំពេញមួយចំនួនបន្តធ្វើការប្រមូលផ្តុំហាត់ប្រាណនៅតាមសួនច្បារនានា ក៏ដូចជានៅម្តុំមុខវាំង និងសួនច្បារស្តូបព្រះបរមរតនកោដ្ឋ ស្ថិតក្នុងសង្កាត់ចតុមុខ ខណ្ឌដូនពេញជាធម្មតា ជារៀងរាល់ល្ងាច រីឯនៅមុខព្រះបរមរាជវាំង ក៏ដូចជាតាមមាត់ទន្លេមុខព្រះបរមរាជវាំង ប្រជាពលរដ្ឋមកអង្គុយកំសាន្ត មានការថយចុះច្រើនគួរឲ្យកត់សម្គាល់ ។
បើតាមមន្ត្រីគនរបាលមូលដ្ឋានមួយរូបដែលប្រចាំការនៅមុខភូមិគ្រឹះសម្តេចតេជោ ហ៊ុន សែន ក្បែរវិមានឯករាជ្យបាននិយាយាថា ៖ បន្ទាប់ពីមាន «ព្រឹត្តិការណ៍សហគមន៍ ២០កុម្ភៈ » ហើយក្រសួងសុខាភិបាលរកឃើញអ្នកឆ្លងកូវីដ១៩ ជាបន្តបន្ទាប់រួចមកក្តី ព្រមទាំងមានសេចក្តីប្រកាសណែនាំឲ្យប្រជាពលរដ្ឋកាត់បន្ថយការប្រូលផ្តុំគ្នា និងត្រូវពាក់ម៉ាស់ជាប្រចាំ ជាពិសេសកាត់បន្ថយការចេញក្រៅផ្ទះ បើមិនចាំបាច់។
យ៉ាងណាមិញ តាមការមើលឃើញជាក់ស្តែងរបស់អ្នកសារព័ត៌មាន ក៏ដូចជាការបញ្ជាក់របស់មន្ត្រីនគរបាលមូលដ្ឋាន គឺសង្កេតឃើញថា រយៈពេលប៉ុន្មានថ្ងៃមកនេះ ប្រជាពលរដ្ឋប្រុសស្រី ក្មេងចាស់បាននាំគ្នាដើរហាត់ប្រាណយ៉ាងពពាក់ពពូន ។ ខ្លះពាក់ម៉ាស់ ខ្លះទៀតមិនមានពាក់ម៉ាស់នោះទេ ហើយនាំគ្នាដើរទាំងហ្វូងហាក់ដូចជាភ្លេចជំងឺកូវីដ-១៩ ដែលកំពុងឆ្លងក្នុងសហគមន៍ ។
លោកសាន និមល ដែលកំពុងឈរហាត់ប្រាណម្នាក់ឯងនៅខាងជើងអាស្រមព្រះអង្គដងកើ មុខព្រះបរមរាជវាំង បាននិយាយថា ៖ ក្រោយពីមានការផ្ទុះជំងឺកូវីដ១៩ ជាលើកទី៣ ក្នុងសហគមន៍ដែលមានឈ្មោះថា «ព្រឹត្តិការណ៍សហគមន៍ ២០កុម្ភៈ» កាលពីថ្ងៃសៅរ៍កន្លងមកនេះ ក្រសួងសុខាភិបាលបានរកឃើញការឆ្លងកូវីដ១៩ ចូលសហគមន៍ជាបន្តបន្ទាប់ជាទ្រង់ទ្រាយធំ ហើយនេះជាករណីមិនធ្លាប់មាននៅក្នុងប្រទេសកម្ពុជា ។
លោកបានបន្តថា ពេលនេះលោកសង្កេតឃើញថា ៖ ក្រោយពីផ្ទុះ «ព្រឹត្តិការណ៍សហគមន៍ ២០កុម្ភៈ» ប្រជាពលរដ្ឋដែលមកកំសាន្តនៅមុខវាំងនេះ ក៏ដូចជាមកហាត់ប្រាណមានការថយចុះច្រើន តែបាននាំគ្នាពាក់ម៉ាស់គ្រប់ៗគ្នាផងដែរ ។
សកម្មភាពពលរដ្ឋហាត់ប្រាណនៅតាមបណ្តោយផ្លូវថ្មើរជើង តាមដងទន្លេចតុមុខ ដែល ស្ថិតនៅទល់មុខកំពង់ចម្លង អរិយក្សត្រ ជាទីកន្លែងដែលអ៊ុំស្រីយ៉ន អាយុប្រហែល៦០ឆ្នាំចូលចិត្តមកហាត់ប្រាណ ដោយកាយវិការលើកដៃ លើកជើង និងដើរជារៀងរាល់ល្ងាច តាំងពីមិនទាន់មានជំងឺរាតត្បាតកូវីដ១៩ មកម្ល៉េះ ដើម្បីប្រឆាំងនឹងជំងឺប្រចាំកាយរបស់គាត់។ ប៉ុន្តែចាប់តាំងពីផ្ទុះជំងឺកូវីដ-១៩ កាលពីចុងឆ្នាំ២០២០ អ៊ំស្រីយ៉ន ក៏សម្រេចចិត្តផ្អាកការហាត់ប្រាណ នៅតាម ទីសាធារណៈ ចំនួន ២ ខែ តាម ការណែនាំ របស់ ក្រសួងសុខាភិបាល ។ ប៉ុន្តែអំឡុងពេលផ្អាក ហាត់ប្រាណ នេះ ជំងឺ ក្នុងរបស់ចាប់ផ្ដើម ធ្វើទុក្ខ ឡើងវិញ ។
ពេលនេះគាត់វិលមកហាត់ប្រាណវិញតែគាត់នៅដាច់ដោយឡែកពីគេហើយគាត់តែងតែពាក់ម៉ាសជាប្រចាំមិនថាមកហាត់ប្រាណនោះទេឲ្យតែចេញពីផ្ទះគាត់មិនភ្លេចពាក់ម៉ាសឡើយ ។
យុវជនម្នាក់ដែលកំពុងហាត់ប្រាណនៅសួនច្បានាគបាញ់ទឹកបានឲ្យដឹងថា ៖ ការណ៍ ដែលខ្លួនត្រឡប់មកហាត់ប្រាណវិញ ដោយសារតែខ្លួនភ័យខ្លាចនឹងជំងឺប្រចាំកាយ ជា ច្រើនឆ្នាំមកហើយ ជាងជំងឺកូវីដ-១៩ ទៅទៀត ។ ដូច្នេះរូបគេយល់ថា ជំងឺកូវីដ-១៩ ជាជំងឺដែលអាចព្យាបាលជាសម្រាប់មនុស្សដែលមានសុខភាពល្អ ប៉ុន្តែបើកើតលើមនុស្សដែលមានជំងឺ វាអាចនឹងប៉ះពាល់ដល់សុខភាពធ្ងន់ធ្ងរ ។ ដោយសារគាត់ភ័យខ្លាចជំងឺរបស់គាត់ វាធ្វើទុក្ខ ។ ហើយរូបគាត់ហាត់ប្រាណ ដើម្បីឲ្យចេញជាតិពុល ។
ប្រភពដដែលបានបន្តថា ពេលណាហាត់ប្រាណ គឺគាត់ទៅកន្លែងណាដែលគ្មានមនុស្ស ច្រើន ។ ប៉ុន្មានថ្ងៃមកនេះ រូបគាត់សង្កេតឃើញថា មានប្រជាពលរដ្ឋនាំគ្នាមកហាត់ប្រាណនៅសួនច្បារនាគបាញ់ទឹក រហូតដល់វិមានឯករាជ្យមានច្រើនណាស់ គាត់ក៏មានការព្រួយបារម្មពីការឆ្លងជំងឺកូវីដ១៩ផងដែរ ។
មន្ត្រីសាលាខណ្ឌដូនពេញមួយរូបដែលមានភារកិច្ចប្រចាំការនៅសួនច្បារវិមានឯករាជ្យបាននិយាយថា ៖ រយៈពេលប៉ុន្មានថ្ងៃមកនេះ ពិតជាមានប្រជាពលរដ្ឋប្រុសស្រីរាប់រយនាក់នាំគ្នាដើរហាត់ប្រាណនៅសួនច្បារខាងលើនោះមែន តែភាគច្រើនពួកគេពាក់ម៉ាស តែពួកគេច្រើនដើរជាក្រុមៗ ។
អាជ្ញាធរមូលដ្ឋាន ជាពិសេសសាលាខណ្ឌដូនពេញ តែងតែធ្វើការផ្សព្វផ្សាយកើនរំលឹកដល់ពួកគាត់មកហាត់ប្រាណក៏ដូចជា ដើរកំសាន្តមុខវាំងត្រូវតែនាំគ្នាម៉ាស ហើយអង្គុយក្នុងគម្លាត១ម៉ត្រកន្លះ តែមានអ្នកខ្លះអនុវត្តតាម តែក៏មានអ្នកខ្លះមានការខ្វះខាតផងដែរ ។
មន្ត្រីដដែលក៏បានបញ្ជាក់ថា ៖ នៅមុខវាំងប្រជាពលរដ្ឋមកអង្គុយមាត់ទន្លេមានការថយចុះច្រើនបែរជាកើនអ្នកមកហាត់ប្រាណនៅសួនច្បារនាគបាញ់ទឹករហូតដល់វិមានឯករាជ្យទៅវិញ ៕
ចែករំលែកព័តមាននេះ