ខេត្តព្រៃវែង ៖ បើតាមសេចក្តីរាយការណ៍បានឱ្យដឹងថា បុរសម្នាក់មានជំងឺសរសៃប្រសាទ និងមានសតិមិនគ្រប់ ត្រូវបានសាច់ញាតិយកទៅព្យាបាលនៅក្នុងវត្តឈូក ស្ថិតក្នុងឃុំស៊ាងឃ្វាង ស្រុកកំចាយមារ ខេត្តព្រៃវែង ប៉ុន្តែនៅថ្ងៃទី២…
ខេត្តព្រៃវែង ៖ បើតាមសេចក្តីរាយការណ៍បានឱ្យដឹងថា បុរសម្នាក់មានជំងឺសរសៃប្រសាទ និងមានសតិមិនគ្រប់ ត្រូវបានសាច់ញាតិយកទៅព្យាបាលនៅក្នុងវត្តឈូក ស្ថិតក្នុងឃុំស៊ាងឃ្វាង ស្រុកកំចាយមារ ខេត្តព្រៃវែង ប៉ុន្តែនៅថ្ងៃទី២ ខែមីនា ឆ្នាំ២០២១នេះ បុរសរូបនោះក៏បានប្រព្រឹត្តអំពើមិនគប្បីល្មើសច្បាប់ព្រហ្មទណ្ឌ ដោយសារតែរបូតច្រវ៉ាក់ដាក់.ក.ជើង រួចក៏ទៅធ្វើសកម្មភាពលួចកង់ លួចម៉ូតូ និងលួចរថយន្តទៀតក្នុងពេលតែមួយ លុះចុងក្រោយក៏បើកទៅបុករ៉ឺម៉កម៉ូតូ ហើយក៏ត្រូវចាប់ខ្លួនដាក់ច្រវ៉ាក់ជើងវិញតែម្តង ។
សូមបញ្ជាក់ថា បុរសខាងលើនោះមិនត្រូវបានគេស្គាល់ឈ្មោះនោះទេ គ្រាន់តែដឹងថាមានអាយុជាង៣០ឆ្នាំ ត្រូវបានសាច់ញាតិយកទៅផ្ញើទុកក្នុងវត្តឈូក នៅឃុំស៊ាងឃ្វាង ជាច្រើនថ្ងៃមកហើយ ដើម្បីឲ្យព្រះសង្ឃដែលជាព្រះចៅអធិការវត្ត ស្រោចទឹកមន្តប្រោសព្រហ្ម និងប្រើប្រាស់ថ្នាំព្យាបាល ព្រោះតែបុរសរូបនេះជាមនុស្សមានភាពមិនប្រក្រតី និយាយច្រើន ដើរច្រើន រពិសនៅមិនស្ងៀមមួយកន្លែងទេ គ្រាន់តែគាត់ជាមនុស្សមិនកោងកាចដាក់អ្នកដទៃប៉ុណ្ណោះ ហើយក៏ត្រូវបានក្រុមគ្រួសារដាក់ច្រវ៉ាក់.ជើង.ជាប់រហូតផងដែរ ។
ប្រភពដដែលបន្តថា លុះនៅថ្ងៃកើតហេតុខាងលើនេះ បុរសរូបនោះបានរបូតច្រវ៉ាក់ពីជើង ហើយក៏បានធ្វើសកម្មភាពលួចយកកង់១គ្រឿងរបស់ពុទ្ធបរិស័ទដែលទៅស្រោចទឹកក្នុងវត្ត រួចក៏ជិះចេញទៅបាត់ទាំងព្រឹក ។ មួយសន្ទុះក្រោយមក ស្រាប់តែអ្នកស្រុករស់នៅភូមិទ្រា ឃុំស៊ាងឃ្វាង ដែលមានចម្ងាយពីវត្តឈូក ប្រមាណ៥គីឡូម៉ែត្រ មានការឆោឡោបាត់ម៉ូតូ១គ្រឿងត្រូវចោរលួច ខណៈនោះម្ចាស់ម៉ូតូបានស្វែងរកភ្លាមៗដែរ ប៉ុន្តែរកមិនឃើញ ឃើញតែកង់កញ្ចាស់១គ្រឿងដែលចោរទុកចោលទីនោះ ។
ប្រភពដដែលបន្តថា លុះរំលងបានបន្តិចក្រោយមក ក៏មានការភ្ញាក់ផ្អើលម្តងទៀតនៅភូមិឬស្សីជុក១ ឃុំស៊ាងឃ្វាងដដែលថា មានករណីចោរលួចយករថយន្ត១គ្រឿងបាត់ ដែលរថយន្តនោះជាប្រភេទ៣តោនដែលម្ចាស់ទុកសម្រាប់ដឹកនំលក់ប្រចាំថ្ងៃ ហើយនៅកន្លែងកើតហេតុដែលបាត់រថយន្តនោះ ក៏បានបន្សល់ទុកម៉ូតូ១គ្រឿងដែរ ។
ប្រភពដដែលបន្តទៀតថា ក្រោយពីមានការភ្ញាក់ផ្អើលទាំង៣ករណីខាងលើនេះបានមួយសន្ទុះមកទៀត ក៏ស្រាប់តែមានករណីគ្រោះថ្នាក់ចរាចរណ៍ គឺថយន្តដឹកនំបើកទៅបុករ៉ឺម៉កម៉ូតូនៅលើផ្លូវលំ វាលស្រែ ចម្ងាយពីភូមិឬស្សីជុក១ ប្រមាណ៣គីឡូម៉ែត្រ ។ ករណីរថយន្តបុកម៉ូតូរ៉ឺកម៉កម៉ូតូនោះ មិនបណ្តាលឲ្យមានអ្នករងរបួស ឬគ្រោះថ្នាក់ដល់ជីវិតទេ គ្រាន់តែខូចខាតរ៉ឺកម៉ូតូតិចតួចប៉ុណ្ណោះ ។
ហើយពេលនោះម្ចាស់ម៉ូតូរ៉ឺកម៉កបានស្ទុះទៅចាប់ខ្លួនអ្នកបើកបររថយន្តជាប់ ដើម្បីទុកដោះស្រាយសំណង ដោយអះអាងថា ខាងអ្នកបើកបររថយន្តជាអ្នកខុស ។ លុះពេលម្ចាស់ម៉ូតូរ៉ឺម៉កចាប់អ្នកបើករថយន្តបានភ្លាម ទើបកើតការស្រឡាំកាំង ដោយសារអ្នកបើករថយន្តនោះជាមនុស្សមានសតិមិនគ្រប់ ព្រោះថានិយាយគ្នាមិនដឹងរឿង លុះមួយសន្ទុះក្រោយមក ស្រាប់តែបែកពពុះមាត់ ទើបដឹងថា គាត់ជាមនុស្សមានជំងឺសរសៃប្រសាទ ។
ពាក់ព័ន្ធនឹងករណីរថយន្តបើកទៅបុកម៉ូតូរ៉ឹម៉កខាងលើនោះ ម្ចាស់ម៉ូតូក៏បានទាក់ទងទៅសមត្ថកិច្ចនគរបាលប៉ុស្តិ៍រដ្ឋបាលឃុំស៊ាងឃ្វាង ដើម្បីឲ្យចុះទៅជួយដោះស្រាយដែរ លុះពេលនគរបាលទៅដល់ក៏ធ្វើការឃាត់អ្នកបើកបររថយន្ត ប៉ុន្តែជាមនុស្សមានជំងឺសរសៃប្រសាទ។
មិនយូរប៉ុន្មាន ស្រាប់តែព័ត៌មាននេះក៏ត្រូវបានបែកធ្លាយដឹងដល់ព្រះចៅអធិការវត្ត, ម្ចាស់កង់, ម្ចាស់ម៉ូតូ និងម្ចាស់រថយន្ត ដែលត្រូវបុរសរូបនោះលួចទៅជួបជុំគ្នាយកកង់, ម៉ូតូនិងរថយន្តជារបស់ខ្លួនវិញ ។ ចំណែកឯបុរសដែលមានជំងឺសរសៃប្រសាទនោះ ក៏ត្រូវបានគេនាំយកទៅដាក់ច្រវ៉ាក់ជើងទុកក្នុងវត្តឈូកវិញ ដើម្បីព្យាបាលជំងឺបន្ត ៕
ចែករំលែកព័តមាននេះ