រាជធានីភ្នំពេញ ៖ ភាពជោគជ័យជាពាក្យមួយដែលមិនមានទ្រឹស្តីណាអាចកំណត់ន័យវាបានទេ អ្នកជោគជ័យខ្លះបានកំណត់ន័យបែបនេះ អ្នកខ្លះកំណត់បែបនោះ គឺទៅតាមអ្វីមួយជាក់ស្តែងដែលពួកគាត់បានធ្វើ ហើយជោគជ័យមែន ។ យ៉ាងណាមិញ ពេលនេះថ្ងៃនេះសារព័ត៌មានបានដក់ស្រង់សម្តីរបស់សេដ្ឋីវ័យក្មេងម្នាក់…
រាជធានីភ្នំពេញ ៖ ភាពជោគជ័យជាពាក្យមួយដែលមិនមានទ្រឹស្តីណាអាចកំណត់ន័យវាបានទេ អ្នកជោគជ័យខ្លះបានកំណត់ន័យបែបនេះ អ្នកខ្លះកំណត់បែបនោះ គឺទៅតាមអ្វីមួយជាក់ស្តែងដែលពួកគាត់បានធ្វើ ហើយជោគជ័យមែន ។ យ៉ាងណាមិញ ពេលនេះថ្ងៃនេះសារព័ត៌មានបានដក់ស្រង់សម្តីរបស់សេដ្ឋីវ័យក្មេងម្នាក់ ដែលគាត់នឹងចែករំលែកនូវពាក្យជោគជ័យ ហើយប្រាប់ពីគន្លឹះខ្លះៗ ដើម្បីជំរុញការគិតរបស់អ្នកឱ្យក្លាយជាអ្នកខ្លួនឯង (ស្គាល់ខ្លួនឯង) ។
Daniel Ally បាននិយាយថា ភាពជោគជ័យ គឺមាននិយមន័យខុសគ្នាយ៉ាងជាច្រើន ដែលមនុស្សម្នាក់ៗបានដាក់ឱ្យវា ប៉ុន្តែនិយមន័យដ៏អស្ចារ្យបំផុត ដែលោកអាចផ្តល់ឱ្យអ្នកនៅថ្ងៃនេះ គឺភាពជោគជ័យ ដែលមានន័យថា ការបញ្ចេញមតិដោយខ្លួនឯង ធ្វើអ្វីដែលអ្នកចង់ធ្វើ ទៅកន្លែងដែលអ្នកចង់ទៅ ព្រោះបើនិយាយអំពីជោគវាសនារបស់អ្នក នោះមានន័យថាអ្នកគឺជាម្ចាស់ជីវិតខ្លួនឯង មិនមាននរណាម្នាក់អាចដើរលើផ្លូវជីវិតរបស់អ្នកបានទេ ។
នៅក្នុងកម្មចែករំលែកបទពិសោធន៍មួយ លោក Daniel Ally បានបន្តថា ៖ «មនុស្សជាច្រើនគិតថា ធ្វើត្រឹមតែប៉ុណ្ណឹង ខំធ្វើការគ្រែងលរ ២០ឆ្នាំក្រោយបានក្លាយជា CEO អ្នកខ្លះទៀតធ្វើតែរឿងដដែលៗ ២០ឆ្នាំ ៣០ឆ្នាំ។ មានអ្នកខ្លះមានក្តីប្រាថ្នា មានគំនិត មានគម្រោង ប៉ុន្តែត្រូវបានបោះបង់ចោលបន្ទាប់ពីគ្រួសារមិនគាំទ្រ ឬមិត្តភ័ក្តមិនលើកទឹកចិត្តឱ្យធ្វើ បង្អាក់ដំណើរគាត់ក្នុងការចង់ចាប់ផ្តើមរកស៊ី ឬចង់ធ្វើអាជីវកម្មខ្លួនឯង ។ល។ យើងត្រូវគិតពិចារណា ថាប្រសិនជាយើងដើរតាមតែពាក្យបង្គាប់របស់គេ មានន័យថាចាំតែធ្វើតាមគេប្រាប់ នោះសំនួរសួរថា តើអ្នកជាអ្នកគ្រប់គ្រងជីវិតអ្នក អ្នកខ្លួនឯង ឬអ្នកដែលបង្គាប់បញ្ជារអ្នកជាអ្នកគ្រប់គ្រងជីវិតអ្នក» ។
ដូចនេះលោកជឿជាក់ថា គន្លឹះទាំង៣ នេះអាចជួយអ្នកក្នុងការផ្លាស់ប្តូរជីវិតអ្នក ៖
ទី១, អានសៀវភៅ កាន់ច្រើនកាន់តែមានគំនិតច្រើន ៖ សៀវភៅទាំងអស់នៅលើពិភពលោកនេះ គឺសុទ្ធសឹងតែអាចជួយដោះស្រាយបញ្ហារបស់យើងបាន ។ ប្រសិនជាអ្នកចង់បានជោគជ័យ ផ្នែកអ្វីមួយ ឧទាហរណ៍ថាអ្នកចង់ដឹងអំពីលុយ អំពីអាជីវកម្ម នោះអ្នកគួរអានសៀវភៅអាជីវកម្ម សៀវភៅអំពីលុយ ។ សៀវភៅ គឺជាឧបករណ៍មួយដែលជួយដល់ខួរក្បាលអ្នក ជួយកាត់បន្ថយស្ត្រេស និងធ្វើឱ្យខួរក្បាលអ្នកធូរស្រាល ។ មានមនុស្សជាច្រើនបានលើកឡើងថា «ខ្ញុំមិនមានពេលអានទេ ខ្ញុំមានកូន ឬក៏ខ្ញុំមានការងារច្រើនណាស់ត្រូវធ្វើ ខ្ញុំមានកិច្ចការសាលាច្រើនណាស់» ជាដើម ។ ប៉ុន្តែប្រសិនជាអ្នកនិយាយថា គ្មានពេលសូម្បីតែ ១០នាទី ក្នុងមួយថ្ងៃ នោះអ្នកប្រហែលជាគ្មានជីវិតទេមើលទៅ ។ លោក Daniel Ally បានលើកឧទាហរណ៍ខ្លួនលោកផ្ទាល់ថា មានថ្ងៃមួយ ខ្ញុំពិតជារកនឹកអ្វីមិនឃើញនោះទេ នៅពេលមួយខ្ញុំបានចូលអានសៀវភៅនៅក្នុងបណ្ណាល័យមួយ បន្ទាប់ពីអានសៀវភៅចប់ ពីរទៅបីក្បាល ខ្ញុំបានសម្រេចចិត្តថា ខ្ញុំនឹងផ្លាស់ប្តូរជីវិតថ្មី ។
ទី ២, ការរាប់អានមិត្តភ័ក្ត ឬការប្រឹក្សាជាមួយមិត្តភ័ក្តដែលមានជំនាញ និងរៀនអំពីអ្នកមាន ៖ ការរាប់អានមនុស្សនៅជុំវិញខ្លួនអ្នកពិតជាសំខាន់ គួររាប់អានមនុស្សដែលអាចផ្តល់ប្រឹក្សា ផ្តល់យោបល់នានា និងមនុស្សដែលតែងតែគាំទ្រ និងលើកទឹកចិត្តដល់អ្នក ដើម្បីឱ្យអ្នកទទួលបានជោគជ័យ ។ ដូចនេះអ្នកគួរជ្រើសរើសមិត្តភ័ក្តិដែលមានបំណង ចង់ឃើញអ្នកជោគជ័យដោយពិតប្រាកដ ។ ត្រង់ចំណុចនេះ លោក Daniel Ally បានបញ្ជាក់ថា ៖ «ថ្ងៃមួយខ្ញុំចង់ធ្វើអាជីវកម្ម ហើយខ្ញុំបានសួរទៅអ្នកមិត្តភ័ក្តខ្ញុំម្នាក់ ដែលគាត់បានធ្វើអាជីវកម្មយូរមកហើយ និងបានទទួលជោគជ័យផងដែរ ដូចនេះខ្ញុំគិតថាគាត់ប្រាកដជាណែនាំខ្ញុំថាត្រូវយ៉ាងម៉េច ប៉ុន្តែវាមិនបានដូចអ្វីដែលខ្ញុំបានគិតនោះទេ គាត់បែរជាប្រាប់ខ្ញុំថា ខ្ញុំមិនគួរធ្វើអាជីវកម្មខ្លួនឯងទេ ព្រោះ ៩៨ភាគរយ នៃអ្នកធ្វើអាជីវកម្ម ត្រូវបានបរាជ័យត្រឹមតែក្នុងរយៈពេល ៣ឆ្នាំដំបូងប៉ុណ្ណោះ ។ គាត់បន្តប្រាប់ខ្ញុំថា អ្នកធ្វើអាជីវកម្មខ្លួនឯង ត្រូវការធ្វើការខ្លាំងណាស់ អាចថាធ្វើការ ១០០ម៉ោងក្នុងមួយសប្តាហ៍ ឬលើសពីនេះ ព្រោះថា អ្នកធ្វើអាជីវកម្មសំខាន់ត្រូវគ្រប់គ្រងការចំណាយ ចំណូលដោយខ្លួនឯង» ។ នេះជាហេតុផលមួយ ដែលអ្នកគួរគិតក្នុងការរាប់អានមនុស្សឬមិត្តភ័ក្តិឱ្យត្រូវ ប៉ុន្តែពេលខ្លះ ក៏មានសមាជិកក្នុងគ្រួសារយើងដែរ ដែលមិនពេញចិត្ត និងគំនិតរបស់យើង ដូចនេះអ្វីដែលយើងត្រូវធ្វើ គឺត្រូវដើរតាមការចង់បានរបស់ខ្លួនឯងដែរ មិនមែនឱ្យតែគេថាទៅមិន យើងបោះបង់ចោលក្តីស្រមៃរបស់យើងនោះទេ យើងត្រូវយកមកគិតពិចារណាឱ្យបានល្អិតល្អន់មុនសម្រេចចិត្ ត។
ទី ៣, ត្រូវមានគម្រោង គោលដៅឱ្យបានច្បាស់លាស់ ៖ ការបង្កើតក្តីស្រមៃ គឺជួយអ្នកឱ្យដើរទៅផ្លូវត្រង់ ហើយជួយអ្នកឱ្យយល់ច្បាស់អំពីខ្លួនឯង ជួយអ្នកក្នុងការគាស់នូវទេពកោសល្យខ្លួនឯងទៀតផង ។ ហើយមនុស្សភាគច្រើនមិនមានការផ្លាស់ប្តូរ និងប្រតិបត្តិការងារដដែលៗ ក៏ព្រោះថា ពួកគេមិនមានគោលដៅ។ អ្នកគួរសរសេរគម្រោងនៃក្តីស្រមៃ គិតហើយសរសេរអំពីគម្រោងនីមួយៗក្នុងការសម្រេចក្តីស្រមៃនោះ គម្រោងនេះផងដែរគឺជាឧបករណ៍ដែលជំរុញទឹកចិត្តអ្នកឱ្យសម្រេចម្តងមួយជំហា៊នៗ ហើយការធ្វើគម្រោងនេះ គួរធ្វើមួយឆ្នាំម្តងៗ ហើយធ្វើការវាយតំលៃវាជារៀងរាល់ឆ្នាំ ។ អ្នកមានក្តីស្រមៃធំ នោះអ្នកប្រាកដជាធ្វើការងារឱ្យធំ ប្រសិនជាអ្នកមានក្តីស្រមៃតូច នោះអ្នកនឹងធ្វើការតិចដែរ ដូចនេះហើយបានជាគេឱ្យមានក្តីស្រមៃធំ ។ ហើយចុងក្រោយនោះ គឺជាការជឿជាក់លើខ្លួនឯង មិនមាននរណាម្នាក់មកជឿលើយើងនោះទេ ប្រសិនសូម្បីតែយើងមិនជឿលើខ្លួនឯងផង ។
គួរបញ្ជាក់ផងដែរថា លោក Daniel Ally ជាស្ថាបនិកវេបសាយ The Ally Way ជាអ្នកនិពន្ធសៀវភៅ និងជាវាគ្មិនក្នុងកម្មវិធី និយាយជាសាធារណៈ ដែលការលក់សៀវភៅរបស់លោកមានអ្នកគាំទ្រខ្លាំង មិនត្រឹមតែប៉ុណ្ណោះលោកជាសេដ្ឋី ដែលមានឈ្មោះក្នុងទំព័រទស្សនាវត្តីមួយផងដែរ គឺ Entrepreneur Magazine ។ លោកបានចែករំលែកចំណេះដឹងជាច្រើន អំពីការធ្វើអាជីវកម្ម និងការលើកទឹកចិត្តដល់អ្នកចង់ធ្វើជំនួញផងដែរ ៕
ចែករំលែកព័តមាននេះ