រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីបានស្នើឲ្យក្រសួងសុខាភិបាលរៀបចំចាក់វ៉ាក់សាំងដល់មន្ត្រីមូលដ្ឋាន និងប្រជាពលរដ្ឋដែលមានអាយុចាប់ពី៦០ឆ្នាំឡើងនៅរាជធានីភ្នំពេញ ខេត្តកណ្តាល និងខេត្តព្រះសីហនុ ។ សម្តេចតេជោ…
រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីបានស្នើឲ្យក្រសួងសុខាភិបាលរៀបចំចាក់វ៉ាក់សាំងដល់មន្ត្រីមូលដ្ឋាន និងប្រជាពលរដ្ឋដែលមានអាយុចាប់ពី៦០ឆ្នាំឡើងនៅរាជធានីភ្នំពេញ ខេត្តកណ្តាល និងខេត្តព្រះសីហនុ ។
សម្តេចតេជោ ថ្លែងក្នុងសន្នីសីទសារព័ត៌មាន នាព្រឹកថ្ងៃទី៤ ខែមីនា ឆ្នាំ២០២១ នៅមន្ទីរពេទ្យកាលម៉ែត្របានស្នើឲ្យក្រសួងសុខាភិបាលរៀបចំចាក់វ៉ាក់សាំងដល់មន្ត្រីមូលដ្ឋាន និងប្រជាពលរដ្ឋដែលមានអាយុចាប់ពី៦០ឆ្នាំឡើង នៅក្នុងខេត្តកណ្តាល ខេត្តព្រះសីហនុ និងរាជធានីភ្នំពេញ ។
សម្តេចបានបញ្ជាក់ថា ៖«គិតត្រឹមថ្ងៃទី៣ ខែមីនា ឆ្នាំ២០២១នេះ កម្ពុជាបានចាក់វ៉ាក់សាំងចំនួន១២៥៦៦៨នាក់ ក្នុងនោះយោធា និងនគរបាលចំនួន៨៤៧៥៨នាក់ ។ ស៊ីវិល និងនគរបាលដែលចាក់ដោយក្រសួងសុខាភិបាលមានចំនួន៤៩១០នាក់ ។ ឥលូវនេះចំនួនវ៉ាក់សាំងដែលមកដល់របស់កូវ៉ាក់៣២ម៉ឺន៤សែនដូសនេះ គឺយើងតម្រង់ឆ្ពោះទៅខេត្ត៣ សំខាន់ដែលខេត្តនោះ កំពុងស្ថិតក្នុងហានិភ័យក្នុងការឆ្លង គឺភ្នំពេញ ខេត្តកណ្តាល និងខេត្តព្រះសីហនុ» ។
សម្តេចក៏បានលើកឡើងថា ការចាក់វ៉ាក់សាំងលើកនេះ គឺមិនមែនចាក់សម្រាប់មន្ត្រីនោះទេ ។ សម្តេចបញ្ជាក់ថា ៖«ខ្ញុំស្នើសុំក្រសួងសុខាភិបាលរៀបចំចាក់វ៉ាក់សាំងជូនប្រជាពលរដ្ឋ និងមន្ត្រីមូលដ្ឋានដែលមានអាយុ៦០ឆ្នាំឡើងលើ ត្រូវចាក់ក្នុងភាពបន្ទាន់ ។ តាមការប៉ាន់ស្មានរបស់ខ្ញុំ យើងអាចប្រើប្រាស់ក្នុងរង្វង់ពី១០ម៉ឺនទៅ១៣ម៉ឺននាក់ ។ សម្រាប់ការចាក់នៅក្នុងទីក្រុងភ្នំពេញ និងមួយចំនួនព័ទ្ធជុំវិញទីក្រុងភ្នំពេញ គឺខេត្តកណ្តាល និងមួយចំនួនអ្នកនៅខេត្តព្រះសីហនុ ។ ប៉ុន្តែត្រូវជ្រើសរើសយកមនុស្សចាប់ពីអាយុលើសពី៦០ឆ្នាំឡើង» ។
សម្តេចបានលើកឡើងថា វ៉ាក់សាំងអាស្ត្រាហ្សេនីកា (Astra zeneca) មានសុពល ភាព៦ខែ ចំណែកវ៉ាក់សាំងស៊ីណូហ្វាមមានសុពលភាព១ឆ្នាំ ។ ដូច្នេះស្នើសុំឲ្យមានការ ប្រញាប់ក្នុងការចាក់វ៉ាក់សាំងដែលទទួលបាននេះ ។
ជាមួយគ្នានោះដែរសម្តេចក៏បានលើកឡើងថា នៅពេលខាងមុខនេះកម្ពុជានឹងមានលទ្ធភាពទទួលវ៉ាក់សាំងកូវ៉ាក់ និងអង្គការសុខភាពពិភពលោកដែលតាមទម្រង់ដើម២០ភាគរយនៃចំនួនប្រជាពលរដ្ឋ ។ ហើយតាមផែនការនៃការអ្នកដែលធ្វើការជាមួយវ៉ាក់សាំងចំនួន៧លានដូស ប៉ុន្តែធ្វើតាមដំណាក់នីមួយៗ៕
ចែករំលែកព័តមាននេះ