រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសថា អ្នកការទូតបរទេស និងអង្គការក្រៅរដ្ឋាភិបាលដូចជា Jica ជាដើម និងជនបរទេសទូទៅដែលកំពុងរស់នៅនិងធ្វើការនៅកម្ពុជានឹងទទួលបានការចាក់វ៉ាក់សាំងប្រឆាំងជំងឺកូវីដ-១៩ ដូចជាប្រជាជនកម្ពុជាទូទៅ ។
ថ្លែងនៅឯសន្និសិទ្ធសារព័ត៌មានក្រោយពេលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា អញ្ជើញចាក់វ៉ាក់សាំងប្រឆាំងជំងឺកូវីដ១៩ របស់ក្រុមហ៊ុនអាស្ត្រាហ្សេនីកា (Astra zeneca) នៅមន្ទីរពេទ្យកាល់ម៉ែត រាជធានីភ្នំពេញ សម្តេចតេជោ មានប្រសាសន៍បញ្ជាក់ច្បាស់ៗថា អ្នកការទូតបរទេស និងអង្គការក្រៅរដ្ឋាភិបាលដូចជា Jica អាចចាក់វ៉ាក់សាំងមួយណាក៏បាន មិនថាវ៉ាក់សាំងស៊ីណូហ្វាម របស់ចិន ឬក៏ វ៉ាក់សាំង អាស្ត្រាហ្សេនីកា ក៏បាន ។
សម្តេចបានបញ្ជាក់ថា មន្រីការទូតទីភ្នាក់ងារ របស់អង្គការសហប្រជាជាតិ ប្រចាំនៅកម្ពុជា ដូចជា Jica, IMF ធនាគារពិភពលោក ធនាគារ ADB និងដៃគូពាក់ព័ន្ធ អាចមានជម្រើស ក្នុងការសម្រេចចិត្តថាចាក់ អាស្ត្រាហ្សេនីកា (Astra zeneca) ឬក៏ស៊ីណូហ្វាម របស់ចិន ។
សម្តេចក៏បានបន្តថា «ជនបរទេសទាំងឡាយ ដែលបាននឹងកំពុងរស់នៅនិងធ្វើការនៅកម្ពុជានឹងទទូលបានវ៉ាក់សាំងតាមលំដាប់លំដោយជាមួយនឹងប្រជាជន តែអ្នកការទូតបរទេស និង អង្គការក្រៅរដ្ឋាភិបាលនិងទទួលបានវ៉ាក់សាំង ប្រភេទ អាស្ត្រាហ្សេនីកា និងស៊ីណូហា្វម មុនជនបរទេសទូទៅ» ៕
ចែករំលែកព័តមាននេះ