រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា នៅថ្ងៃមុនចូលឆ្នាំខ្មែរប្រពៃណីជាតិខ្មែរខាងមុខនេះ ចិននឹងផ្តល់វ៉ាក់សាំងស៊ីណូហ្វាមចំនួន៤០ម៉ឺនដូស មកកម្ពុជាទៀត ហើយនឹងបញ្ជូនមកថែមពីលើ៤០ម៉ឺនដូសផងដែរ ។
ថ្លែងក្នុងសន្នីសិទសារព័ត៌មាន នាព្រឹក ថ្ងៃទី៤ ខែមីនា ឆ្នាំ២០២១ បន្ទាប់ពីចាក់វ៉ាក់សាំងការពារជំងឺកូវីដ១៩ របស់ប្រទេសឥណ្ឌា សម្តេចតេជោ ហ៊ុន សែន នាយករដ្ឋមន្ត្រីបានលើកឡើងថា ភាគីចិននឹងផ្តល់វ៉ាក់សាំងចំនួន៤០ម៉ឺនដូសបន្ថែមទៀតមកកម្ពុជា ដែលគ្រប់ចំនួនដែលជាជំនួស១លានដូស ហើយសម្តេចសង្ឃឹមថា នឹងទទួលវ៉ាក់សាំងច្រើនជាងនេះ ។ សម្តេចក៏បានលើកឡើងថា កម្ពុជាបានទទួលវ៉ាក់សាំងការពារជំងឺកូវីដ១៩ មានពីប្រទេសចិន៦០ម៉ឺនដូស និងពីមជ្ឈមណ្ឌកូវ៉ាក់ជាង៣២ម៉ឺនដូស ជាលើកទី១ រួចហើយ ។
ជាមួយគ្នានោះដែរ សម្តេចក៏បានបកស្រាយចំពោះជនមួយចំនួនថា មេដឹកនាំកម្ពុជាមិនហ៊ានចាក់វ៉ាក់សាំងរបស់ប្រទេសខ្លាចមានបញ្ហាថា បញ្ហានេះសម្តេចបានចាត់ឲ្យខាងក្រសួងសុខាភិបាលធ្វើការទាក់ទង និងភាគីចិន ដើម្បីបញ្ជាក់ឲ្យបានច្បាស់ទើបរងចាំរហូតដល់មកដល់ពេលនេះទើបសម្រេចចាក់វ៉ាក់សាំង ។
សម្តេចបញ្ជាក់ថា សម្តេចមិនដែលមានការព្រមាន ឬទូន្មានពីអ្នកណានោះទេ ពិសេសចិន និងបណ្តាប្រទេសផ្សេងទៀតទេ ក្នុងការដាក់គំនាមឲ្យអនុវត្តតាមនោះទេ ។ ជាមួយគ្នានោះដែរ សម្តេចក៏បានលើកឡើងថា នៅពេលខាងមុខនេះ កម្ពុជានឹងមានលទ្ធភាពទទួលវ៉ាក់សាំងពីកូវ៉ាក់បន្ថែមដែលគោលការណ៍បានកំណត់ជាបន្តបន្ទាប់ ៕
ចែករំលែកព័តមាននេះ