ភ្នំពេញ៖ សម្តេចតេជោ នាយករដ្ឋមន្ត្រី ហ៊ុន សែន បានដាក់ចេញនូវបញ្ជាផ្ទាល់មាត់បន្ទាន់មួយ ទៅកាន់អាជ្ញាធរសមត្ថកិច្ច ឲ្យចាត់វិធានការរាំងខ្ទប់ មិនឲ្យមានអ្នកចេញចូលខេត្តព្រះសីហនុឡើយ ចាប់ពីយប់ថ្ងៃទី៣ ខែមីនានេះតទៅ។ វិធានការបន្ទាន់នេះ ដើម្បីទប់ស្កាត់កុំឲ្យឆ្លងរាលដាលជំងឺកូវីដ១៩ ចេញពីខេត្តព្រះសីហនុ ទៅកាន់តំបន់ផ្សេង។
ក្នុងបញ្ជាផ្ទាល់មាត់នេះ សម្តេចតេជោ ហ៊ុន សែន បានប្រកាសថា បិទចរាចរណ៍តែមនុស្សចេញចូលប៉ុណ្ណោះ តែមិនឲ្យប៉ះពាល់ដល់ការដឹកជញ្ជូនទំនិញចេញចូលខេត្តព្រះសីហនុឡើយ។
ទន្ទឹមនឹងវិធានការបន្ទាន់ ហាមមិនឲ្យមានអ្នកចេញពីខេត្តព្រះសីហនុនេះ សម្តេចតេជោ ហ៊ុន សែន ក៏បានប្រកាសជំរុញឲ្យអ្នកនៅខេត្តព្រះសីហនុ ចាក់វ៉ាក់សាំងកូវីដ១៩ ឲ្យបានច្រើន។ នៅថ្ងៃទី៤មីនាស្អែកនេះ សម្តេច នឹងបញ្ជូនវ៉ាក់សាំងបន្ថែមទៀត ទៅកាន់ខេត្តព្រះសីហនុ ទាំងវ៉ាក់សាំងស៊ីណូហ្វាម និងទាំងវ៉ាក់សាំង អាស្ត្រាហ្សេនីកា។ វ៉ាក់សាំងស៊ីណូហ្វាម សម្រាប់មនុស្ស អាយុចន្លោះពី ១៨ឆ្នាំ ដល់ ៥៩ឆ្នាំ និងវ៉ាក់សាំង អាស្ត្រាហ្សេនីកា សម្រាប់ ៦០ឆ្នាំឡើង។
សូមរម្លឹកថា នៅខេត្តព្រះសីហនុ ចំនួនអ្នកឆ្លងកូវីដ១៩ បានកើនឡើងខ្លាំង ដោយគិតមកដល់ព្រឹកថ្ងៃទី៣ ខែមីនានេះ ឡើងដល់ ៦២នាក់។ ក្នុងនោះ ភាគច្រើនជាជនជាតិចិន។
ដោយឡែក ពាក់ព័ន្ធនឹងព្រឹត្តិការណ៍ឆ្លងសហគមន៍២០កុម្ភៈ ចំនួនអ្នកឆ្លងកូវីដ១៩ បានកើនឡើងដល់ ៣៧៤នាក់។ ចំណែកនៅទូទាំងប្រទេស រកឃើញអ្នកឆ្លងកូវីដ១៩ សរុបចំនួន ៨៧៨នាក់។ ក្នុងនោះ ជាសះស្បើយ ៤៨២នាក់ និងកំពុងសម្រាកព្យាបាល ៣៩៦នាក់៕
ចែករំលែកព័តមាននេះ