រាជធានីភ្នំពេញ ៖ ចៅក្រមជំនុំជម្រះសាលាដំបូងរាជធានីភ្នំពេញ លោក កុល កំពូល នាថ្ងៃទី៣ ខែមីនា ឆ្នាំ២០២១នេះ បានប្រកាសសាលក្រមសម្រេចផ្ដន្ទាទោស អតីតសមាជិកគណបក្សសង្គ្រោះជាតិ២នាក់ ដាក់ពន្ធនាគារក្នុងម្នាក់ៗ៣ឆ្នាំ តែទោសនេះតម្រូវឲ្យអនុវត្តទណ្ឌក្នុងពន្ធនាគារតែ១ឆ្នាំ ទោសសល់ត្រូវព្យួរទាំងអស់ និងពិន័យជាប្រាក់ចូលថវិការដ្ឋក្នុងម្នាក់៦លានរៀល ក្រោមការចោទប្រកាន់ពីបទ «ប្រមាថព្រះមហាក្សត្រ»។ ជនជាប់ចោទម្នាក់ឈ្មោះ គង់ ប៊ុនហ៊ាង ភេទប្រុស អាយុ៦៧ឆ្នាំ ជាអតីតយោធិនចូលនិវត្ត រស់នៅស្រុកសង្កែ ខេត្តបាត់ដំបង។
និងម្នាក់ទៀតឈ្មោះ ហង្ស សេង ភេទប្រុស អាយុ៧០ឆ្នាំ រស់នៅស្រុកសង្កែ ខេត្តបាត់ដំបង ជាមួយគ្នា។ បុរស២នាក់ត្រូវបានតំណាងអយ្យការចោទប្រកាន់ពីបទ «ប្រមាថព្រះមហាក្សត្រ» តាមបញ្ញតមាត្រា៤៣៧ នៃក្រមព្រហ្មទណ្ឌ ប្រព្រឹត្តកាលពីថ្ងៃទី១៦ ខែតុលា ឆ្នាំ២០២០ នៅខេត្តបាត់ដំបង។ ចៅក្រមជំនុំជម្រះលោក កុល កំពូល និងតំណាងអយ្យការលោក សម ឫទ្ធីវាសនា នៅចំពោះមុខអង្គសវនាការជនជាប់ចោទទាំង២នាក់ បានសារភាពថា ពួកគាត់ពិតជាបានទូរស័ព្ទនិយាយគ្នាមានខ្លឹមសារប្រមាថដល់អង្គព្រះមហាក្សត្រប្រាកដមែន។
កាលពីថ្ងៃទី១៦ ខែតុលា ឆ្នាំ២០២០ ឈ្មោះ គង់ ប៊ុន ហ៊ាង បានទូរស័ព្ទទៅឈ្មោះ ហង្ស សេង ដោយសួរថា តើឯងបានទទួលអំណោយដែរទេក្នុងពេលទឹកលិចនេះ ? ពេលនោះឈ្មោះ ហង្ស សេង បានឆ្លើយថា មិនបានអំណោយទេ គឺបានតែគ្នាវាប៉ុណ្ណោះ ទោះក្រដល់ស្លាប់ក៏មិនចង់បានអំណោយនោះដែរ។ បើមានជាតិក្រោយកើតជានាយករដ្ឋមន្ត្រីមិនឲ្យមានស្ដេចឡេឡឺ ស៊ីប្រាក់ខែមិនធ្វើការ ….និងការប្រមាថដោយពាក្យអសុរស អគតិ អាក្រក់ស្ដាប់ជាច្រើនជាងនេះទៀត ដែលមានរយៈពេលនៃការសន្ទនាប្រមាណជា១០នាទីឯណោះ៕ ដោយ ៖ ឃឹម ប៊ុនណាក់
ចែករំលែកព័តមាននេះ