ជប៉ុន ៖ មហាសេដ្ឋីជប៉ុនមួយរូប គឺលោក Yusaku Maezawa បានប្រកាសស្វែងរកអ្នកស្ម័គ្រចិត្តចំនួន៨នាក់ ដើម្បីក្លាយជាសមាជិកចូលរួមជាមួយគាត់ សម្រាប់ដំណើរកម្សាន្តទៅកាន់ឋានព្រះច័ន្ទ តាមរយៈយាន្តអវកាសក្រុមហ៊ុន SpaceX របស់លោក Elon Musk ។
លោក Maezawa បានលើកឡើងក្នុងវីដេអូមួយលើបណ្តាញសង្គម Twitter ថា គាត់ចង់ឱ្យប្រជាជនដែលមកពីគ្រប់មជ្ឈដ្ឋានចូលរួម។ ហើយរាល់ការចំណាយសម្រាប់ការធ្វើដំណើរឯកជនទាំងមូលគឺគាត់ជាអ្នករ៉ាប់រងទាំងអស់។
កាលពីឆ្នាំ២០១៨ មហាសេដ្ឋីវ័យ៤៥ឆ្នាំមួយរូបខាងលើនេះ ត្រូវបានប្រកាសជាមនុស្សដំបូងគេ ដែលកក់កៅអីយានអវកាសឯកជន SpaceX ទៅឋានព្រះច័ន្ទ។ ហើយបេសកកម្មនេះ ត្រូវបានឱ្យឈ្មោះថា «dearMoon»។
មហាសេដ្ឋីជាអ្នកស្រលាញ់សិល្បៈគំនូរ និងតន្ត្រីដែលមានទ្រព្យប្រមាណ២ពាន់លានដុលា្លររូបនេះបានបញ្ជាក់ថា រាល់អ្នកដាក់ពាក្យត្រូវបំពេញតាមលក្ខណៈវិនិច្ឆ័យ២គឺ ពួកគេគួរតែជាអ្នកជំរុញសកម្មភាពដើម្បីជួយអ្នកដទៃ និងសង្គមបានច្រើនតាមមធ្យោបាយណាមួយ។ ហើយពួកគេត្រូវមានឆន្ទៈជួយសមាជិកដទៃទៀត ដែលមានក្តីប្រាថ្នាស្រដៀងគ្នានេះ៕ (ដកស្រង់ចេញពី BBC)
ចែករំលែកព័តមាននេះ