ខេត្តពោធិ៍សាត់៖ ប្រជាពលរដ្ឋបានប្រទះឃើញរូបចម្លាក់ក្បាលនាគមួយក្បាលកប់ក្នុងដី ខណៈពេលកំពុងកាយដីពង្រីកផ្លូវតាមមាត់ស្ទឹង កាលពីថ្ងៃទី០១ ខែមីនា ឆ្នាំ២០២១ ស្ថិតនៅភូមិក្បាលពាម ឃុំស្យា ស្រុកកណ្ដៀង ខេត្តពោធិ៍សាត់ ។ ក្បាលនាគនេះ មានទំហំ០២តឹក កម្ពស់០១ម៉ែត្រ ០២តឹកកន្លះ ធ្វើអំពីឈើត្រាវ។
បើតាមអាជ្ញាធរមូលដ្ឋានឲ្យដឹងថា ក្រុមការងាររបស់លោក កែវ រតនៈ ប្រធានក្រុមការងាររាជរដ្ឋាភិបាល បានចុះមូលដ្ឋានស្រុកក្រគរ និងស្រុកកណ្ដៀង នឹងបានប្រើគ្រឿងចក្រឈួសឆាយដីពង្រីកផ្លូវតាមមាត់ស្ទឹង ដើម្បីឲ្យបានធំទូលាយជាងមុន ងាយស្រួលដល់បងប្អូនប្រជាពលរដ្ឋធ្វើដំណើរទៅមក។
ប្រភពដដែលបន្តថា លុះពេលឈួសឆាយមកដល់គល់ស្ពានក្បាលពាម គ្រឿងចក្របានចូកកាយដីក្នុងមាត់ស្ទឹង ក៏ស្រាប់តែប្រទះឃើញរូបចម្លាក់ក្បាលនាគដ៏ចម្លែកនេះ ទើបបង្កឱ្យមានការភ្ញាក់ផ្អើលតែម្ដង។
ប្រភពដដែលបន្តទៀតថា ភ្លាមៗនោះ អ្នកស្រុក អ្នកភូមិ បាននាំគ្នាលាងទឹកយ៉ាងស្អាត រួចហើយក៏ដាក់បញ្ឈររុំអំបោះក្រហម លាបម្ស៉ៅ បាញ់ទឹកអប់ ដាក់លុយ ដាក់កាក់ក្នុងឆ្នាំង និងអុជធូបបន់ស្រន់សុំសេចក្ដីសុខ សេចក្ដីចម្រើន សុំលាភសក្ការៈ រកស៊ីមានបាន និងចៀសផុតជំងឺតម្កាត់ផ្សេងៗផងដែរ ទៅតាមអបិយ៍ជំនឿរបស់ពួកគាត់ក្នុងតំបន់នោះ។
ហើយដើម្បីងាយស្រួលក្នុងការគ្រប់គ្រងកុំឲ្យមានបញ្ហាអ្វីកើតឡើងនោះ លោក ពិន ឡៃ ប្រធានក្រុមប្រឹក្សាឃុំស្យា និងលោក ឆាយ គឹមម៉ុង អភិបាលនៃគណៈអភិបាលស្រុកកណ្ដៀង ក៏បានប្រគល់រូបចម្លាក់ក្បាលនាគនោះ ជូនដល់មន្ទីរជំនាញ ដើម្បីយកមករក្សាទុកក្នុងសារៈមន្ទីរខេត្តពោធិ៍សាត់។
លោក ឡាច ផេងលី ប្រធានមន្ទីរវប្បធម៌ និងវិចិត្រសិល្បៈខេត្តពោធិ៍សាត់ ក៏បានបញ្ជាក់ផងដែរថា រូបចម្លាក់នេះធ្វើអំពីឈើត្រាវពិតប្រាកដមែន ដែលមានកម្ពស់០១ម៉ែត០២តឹកកន្លះ មានរចនាបថខ្មែរយើងធម្មតា អាចក្នុងសម័យកណ្ដាលប្រហែល២០០ ឬ៣០០ឆ្នាំមុន។ ហើយក៏មិនដឹងថា ជារូបចម្លាក់អ្វីពិតប្រាកដនោះទេ បើថាក្បាលនាគដូចជាខ្ពស់ពេក ហើយលោកក៏បានថតរូបរាយការណ៍បញ្ជូនទៅក្រសួងវប្បធម៌ និងវិចិត្រសិល្បៈរួចហើយ រង់ចាំមន្ត្រីជំនាញឆ្លើយតបមកវិញថា តើជារូចអ្វីឱ្យពិតប្រាកដ? ហើយក្នុងសម័យណាដែរ?
ចែករំលែកព័តមាននេះ