រាជធានីភ្នំពេញ ៖ បុរស២នាក់ជាជាងជួសជុលរថយន្តបានជិះរថយន្តស៊េរីទំនើបមួយគ្រឿងម៉ាកPORSCHE ក្នុងគោលបំណងបើករថយន្តស៊េរីទំនើបនោះយកទៅឱ្យភ្ញៀវ សង្ស័យបត់ត្រឡប់ក្រោយខ្វះការប្រុងប្រយ័ត្ន ក៏ស្រាប់តែមានបុរសម្នាក់ជិះម៉ូតូមួយគ្រឿងជ្រុលទៅបុកបណ្តាលឱ្យរថយន្តស៊េរីទំនើបនោះរងការខូចខាត ព្រមទាំងបណ្តាលឱ្យអ្នកបើកបរម៉ូតូរងរបួសធ្ងន់ ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង៧និង៤០នាទីយប់ថ្ងៃទី២ ខែមិនា ឆ្នាំ២០២១ ជិតស្ថានទូតមួយកន្លែង តាមបណ្តោយផ្លូវរដ្ឋសភា ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
បុរសជាជាងជួសជុលរថយន្តទាំង២នាក់ខាងលើនោះមិនស្គាល់អត្តសញ្ញាណនោះទេ ។ ចំណែករថយន្តស៊េរីទំនើបមួយគ្រឿងរបស់ភ្ញៀវដែលរងការខូចខាតខាងលើម៉ាកPORSCHE PANAMERA ស៊េរីឆ្នាំ២០១៥ ពណ៌សូកូឡា ពាក់ស្លាកលេខ ភ្នំពេញ 2BJ-9815 ។
ដោយឡែកបុរសម្នាក់ដែលរងរបួសធ្ងន់ខាងលើ មិនស្គាល់អត្តសញ្ញាណនោះទេ ជាអ្នកបើកបរម៉ូតូមួយគ្រឿងម៉ាកស៊ុយហ្សុ៊យគី ស្មាសវី ពណ៌ខ្មៅ ពាក់ស្លាកលេខ ភ្នំពេញ 1BU- 9590 ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេឃើញបុរស២នាក់ដែលជាជាងជួសជុលរថយន្តបានជិះរថយន្តស៊េរីទំនើបមួយគ្រឿង ក្នុងគោលបំណងបើករថយន្តស៊េរីទំនើបនោះយកទៅអោយភ្ញៀវនៅម្តុំជិតទូតមួយកន្លែង ដោយធ្វើដំណើរតាមបណ្ដោយផ្លូវរដ្ឋសភា ក្នុងទិសដៅពីត្បូងទៅត្បូង ។
តាមប្រភពដដែលបានបន្តថា លុះមកដល់ចំនុចកើតហេតុខាងលើ ក៍បានបើករថយន្ត បត់ឆ្វេងត្រឡប់ក្រោយវិញ តែគាប់ជួនពេលនោះ ក៍ស្រាប់តែមានបុរសម្នាក់ជិះម៉ូតូមួយគ្រឿងធ្វើដំណើរក្នុងទិសដៅស្របគ្នា ក្នុងល្បឿនលឿន លុះចាប់ហ្វ្រាំងមិនទាន់ ក៍ជ្រុលទៅបុករថយន្តស៊េរីទំនើបចំពាក់កណ្ដាលយ៉ាងពេញទំហឹង និងធ្វើអោយអ្នកបើកបរម៉ូតូរងរបួសជើងខាងស្តាំ និងបែកក្បាលហូរឈាម ត្រូវបានរថយន្តសង្គ្រោះមកដឹកយកទៅសង្គ្រោះនៅគ្លីនិកឯកជនភ្លាមៗផងដែរ ។
ដោយឡែកខាងរថយន្តស៊េរីទំនើបវិញ រងការខូចខាតឆ្កូតថ្នាំមួយចំហៀងខាងឆ្វេង និងបែកកញ្ចក់មើលក្រោយ ចំហៀងខាងឆ្វេង តែមិនមានគ្រោះថ្នាក់ដល់អ្នកជិះក្នុងរថយន្តនោះទេ ។
ក្រោយពេលកើតហេតុ ដោយសារតែអត់មានដំណោះស្រាយ ទើបម៉ូតូនិងរថយន្ត ត្រូវបានសមត្ថកិច្ចជំនាញចរាចរណ៍ចុះទៅធ្វើការវាស់វែង រួចយកទៅរក្សាទុកនៅអធិការដ្ឋាននគរបាលខណ្ឌចំការមនរង់ចាំធ្វើការដោះស្រាយគ្នានៅពេលក្រោយទៀត ៕
ចែករំលែកព័តមាននេះ