រាជធានីភ្នំពេញ ៖ ប្រជាពលរដ្ឋជាង១៣១គ្រួសារដែលបាន និងកំពុងធ្វើចត្តាឡីស័កពាក់ព័ន្ធព្រឹត្តិការណ៍សហគមន៍ ២០ កុម្ភៈ ២០២១ នៃជំងឺកូវីដ១៩ នៅតាមផ្ទះ ក្នុងសង្កាត់ស្ទឹងមានជ័យទី១…
រាជធានីភ្នំពេញ ៖ ប្រជាពលរដ្ឋជាង១៣១គ្រួសារដែលបាន និងកំពុងធ្វើចត្តាឡីស័កពាក់ព័ន្ធព្រឹត្តិការណ៍សហគមន៍ ២០ កុម្ភៈ ២០២១ នៃជំងឺកូវីដ១៩ នៅតាមផ្ទះ ក្នុងសង្កាត់ស្ទឹងមានជ័យទី១ ខណ្ឌមានជ័យបានទទួលសាច់ជ្រូក និងអង្ករពីសម្តេចសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តាមរយយៈលោកឃួង ស្រេង អភិបាលរាជធានីភ្នំពេញ ។
ពិធីប្រគល់អំណោយបានធ្វើឡើង នៅព្រឹកថ្ងៃទី០៣ ខែមិនានេះ នៅទីតាំងធ្វើចត្តាឡីស័ក តាមផ្ទះ ក្នុងសង្កាត់ស្ទឹងមានជ័យទី១ ខណ្ឌមានជ័យ ក្រោមវត្តមានលោកឃួង ស្រេង អភិបាលរាជធានីភ្នំពេញ ។
លោកឃួង ស្រេង អភិបាលរាជធានីភ្នំពេញបានមានប្រសាសន៍ថា អំណោយទាំងនេះជាអំណោយរបស់សម្តេចមហាសេនាបតីតេជោ ហ៊ុន សែន និងសម្តេចគតិព្រឹទ្ធបណ្ឌិតប៊ុនរ៉ានីហ៊ុន សែន ដោយក្នុងមួយគ្រួសារទទួលបានអង្ករ១០គីឡូក្រាម និងសាច់ជ្រូកចំនួន២គីឡូក្រាម ។ លោកបន្តថា សម្តេចតេជោ និងសម្តេចប៊ុនរ៉ានីហ៊ុន សែន បានយកចិត្តទុកដាក់ណាស់ ចំពោះបងប្អូនប្រជាពលរដ្ឋ ។
សូមបងប្អូនប្រជាពលរដ្ឋកុំព្រួយបារម្ភសម្តេចមិនទុកឱ្យបងប្អូនស្លាប់ដោយការអត់បាយនោះទេ សូមបងប្អូនកុំព្រួយ ។
មន្ត្រីរដ្ឋបាលខណ្ឌមានជ័យបានឱ្យដឹងថា រដ្ឋបាលខណ្ឌមានជ័យ មានមណ្ឌលព្យាបាលធ្វើចត្តាឡីស័កចំនួន០១ មានអ្នកជំងឺស្នាក់នៅព្យាបាលចំនួន ៥៤នាក់ (គិតត្រឹមថ្ងៃទី០២ មិនា) និងមានទីតាំងធ្វើចត្តាឡីស័កពាក់ព័ន្ធព្រឹត្តិការណ៍សហគមន៍ ២០ កុម្ភៈ ចំនួន ០៥ទីតាំង ស្មើ៤៧០នាក់ ក្នុងនោះបរទេស៣៤នាក់ ។ ក្នុងនោះបានបញ្ជូនទៅព្យាបាលនៅតាមមណ្ឌលព្យាបាលផ្សេងៗក្នុងរាជធានីភ្នំពេញ ចំនួន០៦នាក់ បរទេស០៤នាក់ ។
ដោយឡែកចំពោះប្រជាពលរដ្ឋធ្វើចតាឡីស័កនៅសង្កាត់ស្ទឹងមានជ័យទី១ ខាងលើនេះ មានចំនួន៣៣១នាក់ ស្មើនឹង១៣១គ្រួសារ ។ ពួកគាត់ជាប្រជាពលរដ្ឋដែលបានប៉ះពាល់ផ្ទាល់ និងប្រយោលជាមួយអ្នកវិជ្ជមានជំងឺកូវីដ-១៩ ដែលបានរកឃើញ កាលពីថ្ងៃទី២៦ ខែកុម្ភៈ ឆ្នាំ២០២១ ៕
ចែករំលែកព័តមាននេះ