រាជធានីភ្នំពេញ ៖ កាលពីប៉ុន្មានខែមុន តម្លៃម្ទេសនៅលើទីផ្សារកម្ពុជាបានឡើងដល់ចំណុចកំពូល ហើយសឹងតែរកម្ទេសលក់ស្ទើរពុំបាន តែបច្ចុប្បន្ននេះតម្លៃម្ទេសរបស់ប្រជាកសិករ បានធ្លាក់ចុះថ្លៃវិញទៅរកសភាពធម្មតា ។
បើតាមលោក ឌឿន សិលា កសិករដាំម្ទេសនៅស្រុកប្រាសាទបាគង ខេត្តសៀមរាប បានឱ្យដឹងថា បច្ចុប្បន្ននេះម្ទេសបោះដុំចេញទៅឈ្មួញកណ្ដាលក្នុងតម្លៃប្រមាណ៣០០០រៀលទៅ៣៥០០រៀលប៉ុណ្ណោះ ក្នុងមួយគីឡូក្រាម ខណៈកាលពីវាឡើងថ្លៃខ្លាំង លក់ចេញក្នុងតម្លៃពី១៥០០០រៀលទៅជិត២០០០០រៀលក្នុងមួយគីឡូក្រាម ។
លោកបន្តថាការធ្លាក់ចុះថ្លៃនៅពេលនេះ គឺដោយសារតែម្ទេសក្នុងស្រុកចាប់ផ្ដើមទទួលផលច្រើន ហើយបូករួមជាមួយនឹងការនាំចូលពីប្រទេសជិតខាងផងដែរនោះ ធ្វើឱ្យតម្លៃម្ទេសបានធ្លាក់ចុះថ្លៃគួរកត់សម្គាល់ តែយ៉ាងណាក្ដី តម្លៃនេះមិនមែនជាតម្លៃដែលទើបធ្លាក់ថ្លៃលើកទី១នោះទេ កាលពីមុនតម្លៃម្ទេសក៏លក់ចេញប្រហាក់ប្រហែលនេះដែរ តែទើបតែបានឡើងថ្លៃកាលពីប៉ុន្មានខែមុន ធ្វើឱ្យកសិករដាំម្ទេសនៅក្នុងមូលដ្ឋានលោករស់នៅសប្បាយចិត្តនឹងប្រាក់ចំណូល ។ លោកថា៖«បច្ចុប្បន្ន កសិករដាំម្ទេសក៏ច្រើន នៅក្នុងសហគមន៍ហើយនៅខេត្តផ្សេងៗក៏មានដាំដុះម្ទេសនេះដែរ ដែលធ្វើឱ្យតម្លៃម្ទេសត្រូវជន់ម្ដងម្កាល » ។
លោកបន្ថែមថា តាមរយៈរបរដាំម្ទេសនេះដែរ បានជួយលើកស្ទួយជីវភាពគ្រួសាររបស់លោកបានមួយកម្រិតផងដែរ ជាក់ស្ដែងម្ទេសដែលលោកដាំនេះ អាចប្រមូលផលបេះផ្លែរៀងរាល់៣ដងក្នុងមួយសប្ដាហ៍ហើយបើបូកសរុបទៅក្នុងមួយសប្ដាហ៍ៗ អាចទទួលបានប្រមាណជាង២០០គីឡូក្រាម ដោយមានឈ្មួញចាំប្រមូលទិញនិងយកទៅលក់បន្តឱ្យម៉ូយរបស់គេនៅខេត្តសៀមរាប ឬនៅតាមស្រុកនានាក្នុងខេត្តសៀមរាប ។
អ្នកស្រី ផឿ ថា កសិករដាំម្ទេសក្នុងស្រុកប្រាសាទបាគងដូចគ្នាបានឱ្យដឹង ការដាំដុះម្ទេស នៅរដូវប្រាំងពិតជាមានការលំបាកជាខែវស្សា ដោយសារតែខ្វះខាតទឹកស្រោចស្រព ហើយបើសិនជាស្រោចទឹកមិនគ្រប់គ្រាន់នឹងធ្វើឱ្យផ្លែម្ទេសមិនល្អ ស្វិត តូចៗ មិនពេញចិត្តចំពោះអ្នកបរិភោគ ដូច្នេះត្រូវខំថែស្រោចទឹកផង និងចូកចាំងគល់ម្ទេសផង ។
ឯកឧត្តមវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានឱ្យដឹងម្ទេសឡើងថ្លៃដោយសារតែខ្វះផលិតផលសម្រាប់ផ្គត់ផ្គង់លើទីផ្សារ ហើយកាលនោះ ដោយសារតែទឹកជំនន់ផង មិនអាចឱ្យកសិករដាំដុះម្ទេសសម្រាប់ផ្គត់ផ្គង់បានគ្រប់ចំនួន និងដោយសារតែមានការនាំចេញម្ទេសរបស់កម្ពុជាទៅកាន់ទីផ្សារអន្តរជាតិផង ទើបើធ្វើឱ្យតម្លៃម្ទេសបានឡើងថ្លៃខ្ពស់ ។
ឯកឧត្តមបន្តថា នៅពេលទឹកស្រកវិញ កសិករអាចដាំដុះម្ទេសនិងដំណាំដទៃទៀតនៅតាមដងទន្លេបាន វានឹងធ្វើឱ្យតម្លៃម្ទេសក្នុងស្រុកមានការធ្លាក់ចុះថ្លៃវិញ ។ តែយ៉ាងណាលោកសប្បាយចិត្តពេលឃើញកសិករមានបានទទួលបានផលនិងតម្លៃខ្ពស់ ហើយក្រសួងក៏សាទរចំពោះសមិទ្ធផលដែលកសិករទទួលបានពីរបរកសិកម្ម ៕
ចែករំលែកព័តមាននេះ