បន្ទាយមានជ័យ៖ តំលៃស្រូវប្រាំងឆ្នាំនេះ ប្រសើរជាងឆ្នាំមុន ព្រោះឆ្នាំនេះ ស្រូវខ្វះទឹក បណ្តាលខូចច្រើន នៅស្រុកមង្គលបូរី។
ប្រជាកសិករ បានប្រាប់ថា តំលៃស្រូវប្រាំងឆ្នាំនេះ ប្រសើរជាងឆ្នាំមុន ព្រោះតែឆ្នាំនេះ ស្រូវខ្វះទឹកបូមបញ្ចូល បណ្តាលឲ្យខូចច្រើន។ ប៉ុន្តែស្រូវទទួលផលបាន ភាគច្រើនកសិករ ធ្វើក្បែរប្រព័ន្ធទឹក។ បើអ្នកធ្វើឆ្ងាយប្រព័ន្ធទឹក គ្មានទឹកបូមបញ្ចូល បណ្តាលស្វិតចេញមិនរួច ស្វិតងាប់។
ប្រជាកសិករ បានបញ្ជាក់ថា ឆ្នាំ២០២០-២០២១នេះ ខេត្តបន្ទាយមានជ័យ រងគ្រោះដោយទឹកជំនន់ បណ្តាលឲ្យប៉ះពាល់ដំណាំកសិកម្ម បណ្តាលឲ្យខូច ហើយពេលទឹកស្រក បង្កបង្កើនផល និងស្តារឡើងវិញ។ ប៉ុន្តែឆ្នាំនេះ ស្រូវប្រាំង មានដើមដងល្អ តែខ្វះទឹកបូមបញ្ចូលស្រែ បណ្តាលឲ្យខូចស្វិតងាប់ ចេញមិនរួច។
ប្រជាកសិករស្រុកមង្គលបូរី បានបញ្ជាក់ថា ស្រូវឆ្នាំ២០២១នេះ ទទួលផលក្នុង ១ហិកតា ៤ទៅ ៥តោន ហើយតំលៃប្រសើរជាងឆ្នាំមុន ដោយឈ្មួញកណ្តាលមកទិញដល់ស្រែ ដោយតំលៃលក់ដំបូង ស្រូវសែនក្រអូប ក្នុង ១តោន តំលៃ ៩៥០០បាត និងស្រូវអ៊ីអ៊ែរ ក្នុង ១តោន តំលៃ ៨០០០បាត។ រហូតដល់ថ្ងៃទី២៨ ខែកុម្ភៈ ឆ្នាំ២០២១នេះ ស្រូវសែនក្រអូបលេខ១ ទំងន់ ១តោន តំលៃ ៩០០០បាត លេខ២ តម្លៃ១តោន ៨០០០បាត និងស្រូវអ៊ីអ៊ែរ ១តោន តំលៃ ៧.២០០បាត។
យោងតាមទីផ្សារស្រូវរបស់មន្ទីរពាណិជ្ជកម្មខេត្តបន្ទាយមានជ័យ នៅថ្ងៃទី២៨ ខែកុម្ភៈ ឆ្នាំ២០២១ តំលៃស្រូវសែនក្រអូបសើមលេខ១ តំលៃក្នុង ១គីឡូក្រាម ១២៤៤រៀល និងស្រូវសែនក្រអូបស្ងួត ក្នុង ១គីឡូក្រាម តំលៃ ១៣៣៨រៀល។
របាយការណ៍របស់មន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ នៅឆ្នាំ២០២០-២០២១នេះ ប្រជាកសិករបង្កបង្កើនផលស្រូវប្រាំង មានផ្ទៃដី ៥៥ ០៦៧ហិកតាទោះជាឆ្នាំនេះ ខ្វះទឹកបញ្ចូលស្រូវ តែកន្លែងដែលទទួលបានផល ក្នុង ១ហិកតា ៤ ទៅ ៥តោន បើប្រៀបធៀប ឆ្នាំ២០១៩-២០២០ បង្កបង្កើនផលស្រូវប្រាំងបាន ៤៧ ៦២៦ហិកតាទទួលផលបានក្នុង ១ហិកតា ៣ ទៅ ៤តោន៕ ដោយ៖ ប៊ុន ធឿន
ចែករំលែកព័តមាននេះ