ខេត្តបន្ទាយមានជ័យ ៖ ជនសង្ស័យនាំមនុស្សឆ្លងដែនម្នាក់ត្រូវបានកម្លាំងប៉ុស្តិ៍បឹងសាគូនៃនគរបាលការពារព្រំដែនគោកលេខ៩១១ សហការជាមួយកម្លាំងយោធាកងពលតូចលេខ៥១ធ្វើការឃាត់ខ្លួននៅបន្ទាត់ព្រំដែនក្នុងភូមិទំនប់ក៥ សង្កាត់ប៉ោយប៉ែត ក្រុងប៉ោយប៉ែត ខណៈអាជីវករម្នាក់ក្នុងហេតុការណ៍នេះត្រូវបញ្ជូនទៅធ្វើចត្តាឡីស័កកាលពីយប់ថ្ងៃទី២៧ កុម្ភៈ ឆ្នាំ២០២១ ។
ជនសង្ស័យនិងអាជីវករខាងលើ រួមមាន ម្នាក់ឈ្មោះលី លីន ភេទប្រុស អាយុ៣៤ឆ្នាំ មានទីលំនៅភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត (ជាអ្នកនាំផ្លូវ) និងម្នាក់ទៀតឈ្មោះហោ ប៊ុននី ភេទប្រុស អាយុ៣៨ឆ្នាំ ជាអាជីវករលក់ស្បែកជើងនៅផ្សាររុងក្លឿ និងមានទីលំនៅភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត។
លោកវរសេនីយ៍ត្រីរស់ ពិសិដ្ឋ នាយប៉ុស្តិបឹងសាគូនៃនគរបាលការពារព្រំដែនគោកលេខ៩១១ បានឱ្យដឹងថា យោងតាមការសាកសួរពីបុរសឈ្មោះហោ ប៊ុននី បានប្រាប់ឱ្យដឹងថា គាត់បំុរងឆ្លងដែនទៅផ្សាររុងក្លឿក្នុងទឹកដីថៃដើម្បីលក់ដូរទំនិញនៅទីនោះ ។ បុរសរូបនេះបានបន្តថា គាត់ត្រូវចំណាយប្រាក់៣៥០០បាត ដើម្បីបានឆ្លងដែន តាមរយៈបុរសម្នាក់ឈ្មោះភ័ក្រ ប៉ុន្តែមិនទាន់ដល់គោលដៅផងក៍ត្រូវបានសមត្ថកិច្ចឃាត់ខ្លួនតែម្តង។
លោកនាយប៉ុស្តិ៍បន្តថា ជនសង្ស័យឈ្មោះលី លីន មុនដំបូងបានឆ្លងដែនពីថៃមកកម្ពុជាលុះសមត្ថកិច្វចម្រុះឃាត់សួរនាំ គេព្យាយាមកុហក់ថាជាអ្នករស់នៅម្តុំកន្លែងកើតហេតុ តែសមត្ថកិច្ចបានថតរូបទុក ប៉ុន្តែដឹងអីនៅវេលាម៉ោង២១យប់ថ្ងៃដដែល ស្រាប់តែលេចមុខជនសង្ស័យរូបនេះនាំបុរសទី២បម្រុងឆ្លដែនទៅទឹកដីថៃ ក៍ត្រូវសមត្ថកិច្ចឃាត់សាកសួរតែម្តង។
ជនសង្ស័យឈ្មោះលី លីន បានប្រាប់សមត្ថកិច្ចថា ខ្លួនបានកម្រៃពីការនាំបុរសទី២ឆ្លងដែនត្រឹមតែ៤០០បាតប៉ុណ្ណោះ គឺឈ្មោះភ័ក្រ ជាអ្នកឲ្យខ្លួនមកទទួលឈ្មោះហោ ប៊ុននី ពីដីខ្មែរយកទៅផ្សាររុងក្លឿ ហើយសារភាពថាខ្លួនទើបចេញពីទឹកដីថៃក្នុងថ្ងៃដដែលមែន។
ក្រោយពេលកើតហេតុ បុរសទី២ត្រូវបានសមត្ថកិច្ចបញ្ជូនតាមរថយន្តយោធាទៅដាក់ឲ្យធ្វើចត្តាឡីស័កនៅសាលាបឋមសិក្សាព្រហ្មនិមិត្តក្នុងក្រុងប៉ោយប៉ែត ខណៈជនសង្ស័យជាអ្នកនាំផ្លូវ ត្រូវបានបញ្ជូនទៅទីបញ្ជាវរនគរបាលការពារព្រំដែនគោកលេខ៩១១ ដើម្បីសាកសួរបន្តមុនបញ្ជូនទៅឲ្យសមត្ថកិច្ចជំនាញពាក់ព័ន្ធ៕
ចែករំលែកព័តមាននេះ