ខេត្តបន្ទាយមានជ័យ ៖ កម្លាំងចម្រុះជួរមុខប្រចាំនៅបន្ទាត់ព្រំដែនភូមិទំនប់ក៥ សង្កាត់និងក្រុងប៉ោយប៉ែត បានឃាត់ពលការិនីវិលត្រឡប់ពីថៃចំនួន៣នាក់ បញ្ជូនទៅធ្វើចត្តាឡីស័ក នៅសៀលថ្ងៃទី២៧ កុម្ភៈ នេះ។
ពលការិនីទាំង៣នាក់ខាងលើ ១-ឈ្មោះញ៉ែត យ៉ា អាយុ៤១ឆ្នាំ, ២-ឈ្មោះម៉ី ភក្ត្រា អាយុ៣៧ឆ្នាំ ទាំង២នាក់នេះមានទីលំនៅភូមិសាលាដែង ឃុំប្ញស្សីក្រោក ស្រុកមង្គលបូរី ខេត្តបន្ទាយមានជ័យ និង៣-ឈ្មោះឈីន សៀងហៃ អាយុ៣១ឆ្នាំ មានទីលំនៅភូមិតាណាលឃុំក្តឿងរាយ ស្រុកកញ្ច្រៀច ខេត្តព្រៃវែង។
លោកអនុសេនីយ៍ឯក ស៊ាសៅឌី នាយប៉ុស្តិព្រៃគប់នៃនគរបាលការពារព្រំដែនគោកលេខ៩១១ប្រាប់កោះសន្តិភាពថា យោងកាសាកសួរពលការិនីទាំង៣នាក់ប្រាប់ថា ពួកគាត់ទើបវិលត្រឡប់ពីក្រុងបាងកកដោយខ្លួនឯងគ្មានអ្នកនាំផ្លូវទេ។
ប្រភពថា ពួកគាត់បាននាំគ្នាជិះរថយន្តឈ្នួលពីក្រុងបាងកក មកកាន់ព្រំដែន ។ លុះមកដល់ផ្លូវកៅស៊ូទី២ ជិតព្រំដែនក្នុងស្រុកអារញ្ ខេត្តស្រះកែវ ឈមទឹកដីកម្ពុជា ក្រុងប៉ោយប៉ែត អ្នកបើកបររថយន្តឈ្នួលថៃឲ្យចុះដើរមកប្រទេសដោយខ្លួនឯង ទើបជួបសមត្ថកិច្ចចម្រុះឃាត់យកទៅធ្វើចត្តាឡីស័ក នៅសាលាបឋមសិក្សាព្រហ្មនិមិត្តតាមវិធានការរបស់ក្រសួងសុខាភិបាលតែម្តង។
ការឆ្លងព្រំដែនចេញ-ចូលប្រទេសទាំងប្រថុយប្រថានបែបនេះ និងមានហានិភ័យខ្ពស់នៅពេលណាមួយមិនខានព្រោះកន្លងមកធ្លាប់មានពលករជួបគ្រោះអកុសលជាន់មីនបន្សល់ពីសម័យសង្គ្រាមរងរបួសរួចទៅហើយ៕
ចែករំលែកព័តមាននេះ