រាជធានីភ្នំពេញ ៖ ទំនងចង់ប្រតិកម្មការទៅការលើកឡើងណាមូយ ដែលប៉ុនប៉ងឲ្យវិស័យរោងចក្រនៅកម្ពុជាដួលរលំនោះ លោក ហេង សួរ រដ្ឋលេខាធិការនិងជាអ្នកនាំពាក្យក្រសួងការងារបណ្តុះបណ្តាលវិជ្ជាជីវៈ បានលើកឡើងថា ការដែលចងឲ្យរោងចក្រដួលរលំ ឬទិបទ្វារដើម្បីទទួលបានកញ្ចប់ថវិកាទូទាត់ជាសំណងនោះ ប្រៀបដូចជាការកាប់ដើមឈើទំាងមូលដើម្បីយកផ្លែ ។
មន្រ្តីជាន់ខ្ពស់ក្រសួងការងារ បាននិយាយក្នុងសម្តីដើមដូច្នេះថា «ចង់ឱ្យក្រុមហ៊ុន ឬរោងចក្ររបស់ខ្លួនដួលរលំ ឬបិទទ្វារ ដើម្បីទទួលបាននូវកញ្ចប់ថវិកាទូទាត់សំណងមួយដុំ គឺជាការគិតមិនត្រឹមត្រូវនោះទេ ផ្ទុយទៅវិញ វាហាក់បីដូចជាការកាប់ដើមទាំងមូល ដើម្បីទទួលបានផ្លែយកមកហូបតែមួយពេលអញ្ចឹងដែរ» ។
លោក ហេង សួរ បានសរសេរនៅលើបណ្តាញទំនាក់ទំនងសង្គម Facebook របស់ លោកថា «សព្វថ្ងៃនេះ យើងម្នាក់ៗសុទ្ធតែដឹង និងយល់ថាជីវភាពមនុស្សយើងលំបាក ប៉ុន្តែមនុស្សយើងអាចកាន់តែលំបាកថែមទៅទៀត ប្រសិនបើយើងបានសំណងមកតែមួយពេល ប៉ុន្តែត្រូវបាត់ចំណូលនៅខែបន្តបន្ទាប់រាប់ឆ្នាំតទៅមុខទៀត» ។
រដ្ឋលេខាធិការក្រសួងការងារបានទទួលស្គាល់ថា អាជីវកម្ម និងចំនួនការងារ ដែលបង្កើតថ្មីនៅឆ្នាំ ២០២១ និង ២០២២ នេះ នឹងមិនទាន់វិលមករកភាពវិជ្ជមានដូចឆ្នាំ ២០១៩ នោះទេ ។ លោកថាជំងឺកូវីដ-១៩ បានធ្វើឱ្យមនុស្សទូទាំងពិភពលោករងទុក្ខវេទនាគ្រប់បែបយ៉ាង ហើយប្រទេសជាតិណាក៏មិនរួចខ្លួនដែរ ។ «ពេលខ្លះ យើងមើលរំលងការងារដែលយើងមាន ខណៈដែលអ្នកខ្លះរកតែការងារធ្វើសម្រាប់បានចំណូលបន្តិចបន្តួចក៏មិនបានផង ។ ក្នុងស្ថានភាពដ៏លំបាកនេះ មានការងារធ្វើ និងមានចំណូលសម្រាប់ផ្គត់ផ្គង់ជីវិតប្រចាំថ្ងៃ គឺជាដំណោះស្រាយដ៏ប្រសើរមួយ ។ យើងគួរតែថែរក្សាឱកាសការងារដែលយើងមានរាល់ថ្ងៃឱ្យបាន កុំដល់ពេលបាត់វា ទើបយើងស្តាយក្រោយនោះ» ។
វិបត្តិជំងឺកូវីដ ១៩ បានធ្វើឲ្យរោងចក្រ សហគ្រាស ក្នុងវិស័យកាត់ដេរ និងផលិតស្បែក ជើងចំនួន ១២៩ បានបិទទ្វារ លែងដំណើរការធ្វើឱ្យកម្មករនិយោជិតជាង ៧ ម៉ឺននាក់ រងផលប៉ះពាល់នៅក្នុងឆ្នាំ ២០២០ ។ ប៉ុន្តែជាមួយគ្នានេះក្រសួងការងារក៍បានអះអាងថាមានរោងចក្រថ្មីចំនួន ១១២ បានបើកដំណើរការហើយបានផ្តល់ការងារជាង ២ ម៉ឺននាក់ដល់កម្មករវិញដែរ។នេះបើតាមព័ត៌មានដែលផ្តល់ឲ្យកាលពីខែកន្លងទៅ ៕
ចែករំលែកព័តមាននេះ