កសិករ សុខ គឹមសេង នៅប៉ៃលិន ដាំគូឆាយផង ចិញ្ចឹមបង្កងផង
- ប៉ៃលិន
ប៉ៃលិន៖ មានអាយុ ៣០ឆ្នាំ កសិករ សុខ គឹមសេង បានប្រកបរបរ ដាំបន្លែគូឆាយ និងចិញ្ចឹមបង្កង ដែលទទួលបានប្រាក់ចំណូល…
ប៉ៃលិន៖ មានអាយុ ៣០ឆ្នាំ កសិករ សុខ គឹមសេង បានប្រកបរបរ ដាំបន្លែគូឆាយ និងចិញ្ចឹមបង្កង ដែលទទួលបានប្រាក់ចំណូល…
ប៉ៃលិន៖ មានអាយុ ៣០ឆ្នាំ កសិករ សុខ គឹមសេង បានប្រកបរបរ ដាំបន្លែគូឆាយ និងចិញ្ចឹមបង្កង ដែលទទួលបានប្រាក់ចំណូល ផ្គត់ផ្គង់ជីវភាពគ្រួសារបានប្រសើរ។
គូឆាយរបស់លោក សុខ គឹមសេង មានជាង ២០រង នៅក្បែរផ្ទះ។ គូឆាយទាំងនេះ អាចកាត់លក់ឱ្យម៉ូយស្ទើរតែរៀងរាល់ថ្ងៃ។
គូឆាយ ជាបន្លែមួយប្រភេទ សម្រាប់ធ្វើម្ហូបអាហារ ដើម្បីឆាតៅហ៊ូ លាយសណ្តែកបណ្តុះ និងធ្វើនំគូឆាយ លក់ដូរនៅក្នុងផ្សារសាមគ្គី ហៅ ប៉ាហ៊ី ផងដែរ។
លើសពីនេះ លោក សុខ គឹមសេង បានចិញ្ចឹមបង្កង ដើម្បីបង្កាត់ពូជលក់ បានប្រាក់ សម្រាប់ផ្គត់ផ្គង់ជីវភាពប្រចាំថ្ងៃ។ បុរសកសិករវ័យក្មេងនេះ រស់នៅភូមិអូរពឺត សង្កាត់ទួលល្វា ក្រុងប៉ៃលិន។
លោក សុខ គឹមសេង បានប្រកបមុខរបរដាំដើមគូឆាយនេះ អស់រយ:ពេលជាច្រើនឆ្នាំមកហើយ ដែលមានជាង ២០រង ដាក់ទុយោបូមទឹកស្រោច ជារៀងរាល់ថ្ងៃ ជាពិសេសពេលរដូវប្រាំង មិនមានភ្លៀងធ្លាក់។
លោក សុខ គឹមសេង បន្ថែមថា បន្លែគូឆាយនេះ មិនសូវមានអ្នកដាំប៉ុន្មានទេ នៅក្នុងក្រុងប៉ៃលិន។ ក្រៅពីជាបន្លែ ដែលអាចយកទៅឆាជាមួយតៅហ៊ូលាយ សណ្តែកបណ្តុះ ធ្វើនំគូឆាយ គឺគូឆាយ ក៏អាចយកទៅធ្វើជាឱសថ សម្រាប់លាបពោះក្មេង ពេលហើមចុកឆ្អល់ផងដែរ។
បន្លែគូឆាយរបស់កសិករ សុខ គឹមសេង លក់ដាច់ខ្លាំង ជាហូរហែ នៅរដូវបុណ្យទាន ដូចជា បុណ្យចូលឆ្នាំប្រពៃណីជាតិខ្មែរ រដូវភ្ជុំបិណ្ឌ និងបុណ្យចូលឆ្នាំចិន ជាដើម។ ពោលគឺឈ្មួញសម្រុកទិញ ក្នុង ១គីឡូក្រាម លក់បានថ្លៃ ៤០០០រៀល ទៅ ៥០០០រៀល។
ចំពោះការដាំដើមគូឆាយនេះ ត្រូវបានលោក សុខ គឹមសេង លើកឡើងថា ជាការងាយស្រួលបំផុត គឺមិនចេះផុតរលត់នោះឡើយ ពេលកាត់ដើមចាស់អស់ ដើមថ្មី លូតលាស់ចេញមកជាបន្តបន្ទាប់ ហើយក៏កាត់លក់បន្តទៀត ដោយមិនមានការដាំសាថ្មីនោះទេ។
លោក គឹមសេង មិនត្រឹមតែដាំបន្លែគូឆាយមួយមុខប៉ុណ្ណោះទេ គឺមានចិញ្ចឹមបង្កង សម្រាប់បង្កាត់ពូជ លក់ឱ្យប្រជាពលរដ្ឋទិញយកទៅចិញ្ចឹមបន្ត ព្រមទាំងបង្កើតមុខរបរឱ្យប្រពន្ធបោកអ៊ុតសម្លៀកបំពាក់ថែមទៀតផង៕ ដោយ៖ នីយ៉ា
ចែករំលែកព័តមាននេះ