រាជធានីភ្នំពេញ ៖ នារសៀលថ្ងៃទី២៤ ខែកម្ភៈ ឆ្នាំ២០២១ កម្លាំងកងរាជធាវុធហត្ថរាជធានីភ្នំពេញបានបញ្ជូនជនសង្ស័យ២នាក់ ករណីចូលកាប់សម្លាប់គ្នាដល់ក្នុងផ្ទះគ្រាន់តែរឿងមើលមុខគ្នា បណ្តាលឲ្យទាស់ពាក្យសម្តីតិចតួចនោះ ។
ជនសង្ស័យម្នាក់ឈ្មោះ ពេជ្រ ប៉ី ភេទប្រុស អាយុ១៧ឆ្នាំ មានទីលំនៅភូមិខ្ទរ សង្កាត់ព្រឬកលៀប ខណ្ឌជ្រោយចង្វារ រាជធានីភ្នំពេញ ។ ដោយម្នាក់ឈ្មោះ រុន សុភាក់ ភេទប្រុស អាយុ១៨ឆ្នាំ មានទីលំនៅ បុរីភ្នំពេញ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។ ជនសង្ស័យទាំង២នាក់ តំណាងអយ្យការកំពុងបើកការសាកសួរ ។
សូមបញ្ជាក់សាច់រឿង ៖ កម្លាំងកងរាជធាវុធហត្ថរាជធានីភ្នំពេញបានបំបែកសំណុំរឿងករណីឃាតកម្ម ដែលផ្តើមចេញពីទំនាស់ពាក្យសម្តីតិចតួច គ្រាន់តែមើលមុខគ្នា ភាគីអ្នកខ្លាំងចូលកាប់ចាក់សម្លាប់ដល់ក្នុងផ្ទះ កាលពីវេលាម៉ោង១០និង៣០ នាទីយប់ថ្ងៃទី២១ ខែកុម្ភៈ ឆ្នាំ២០២១ បណ្តាលឲ្យជនរងគ្រោះម្នាក់បាត់បង់អាយុជីវិត និង២នាក់ទៀត រងរបួសធ្ងន់ធ្ងរ បង្កឡើងដោយជនសង្ស័យ៦នាក់ ដោយកើតឡើងនៅភូមិខ្ទរ សង្កាត់ព្រែកលាភ ខណ្ឌជ្រោយចង្វារ រាជធានីភ្នំពេញ ។
ក្រោយពេលកើតហេតុភ្លាមៗ កម្លាំងមូលដ្ឋានកងរាជអាវុធហត្ថខណ្ឌជ្រោយចង្វារ រួមជាមួយកម្លាំង អន្តរាគមន៍ និងកម្លាំងជំនាញ នៃការិយាល័យប្រឆាំងបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានចុះទៅដល់ និងបានបើកការស៊ើបអង្កេត ស្រាវជ្រាវរយៈពេលតែ២ម៉ោងក៏ឈានទៅដល់ការបង្ក្រាប និងឃាត់ខ្លួនជនសង្ស័យចំនួន៣នាក់ (ក្នុងនោះ២នាក់ គឺជាជនដៃដល់ក្នុងចំណោមបក្ខពួក៦នាក់ និងម្នាក់ទៀតត្រូវបានជនដៃដល់យកដាវទៅផ្ញើក្នុងបន្ទប់) នៅដីទំនេរមួយកន្លែង ដែលសង់ឲ្យកម្មករស្នាក់នៅជាប់ផ្លូវជាតិលេខ៦អា ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។
តាមចម្លើយសារភាពរបស់ជនសង្ស័យបានឲ្យដឹងថា ដំបូងឡើយនៅយប់កើតហេតុ ក្រុមរបស់ពួកគេមានគ្នា៦នាក់ បានបបួលគ្នាជិះម៉ូតូដើរលេង ដោយមានដាក់ដាវ និងកាំបិតទៅជាមួយ និងម្នាក់មួយដើមគ្រប់ដៃ លុះជិះដល់កន្លែងកើតហេតុ ពួកគេបានឃើញជនរងគ្រោះមួយក្រុមកំពុងផឹកស៊ីចាក់បាស់ ពេលនោះពួកគេបានលើកដៃហ៊ោកញ្ច្រៀវ ស្រាប់តែមានជនរងគ្រោះម្នាក់បានស្រែកដាក់ពួកគេថា ពួកហែងមើលអី ហើយស្រែកអី ក្បាលមួយស្បែកជើងឥឡូវហើយ! ភ្លាមនោះពួកគេទាំង៦នាក់បានជិះហួសបន្តិច ក៏បានបត់ម៉ូតូត្រឡប់មកក្រោយវិញ ហើយសួរថា អម្បាញ់មិញថា ឲ្យពីណាគេ0x017d7
ពេលនោះជនរងគ្រោះម្នាក់ក៏បានស្រែកមកវិញថា ចុះហែងចង់យ៉ាងម៉េច0x017d7 ក៏បង្កឲ្យមានជាទំនាស់ពាក្យសម្តី ហើយពួកគេក៏បានទាញដាវដែលសៀតជាប់ជើងម្នាក់មួយដើមៗចេញមកធ្វើសកម្មភាពកាប់ចាក់ទៅលើភាគីខាងជនរងគ្រោះតែម្តង ។
ពេលនោះជនរងគ្រោះបានរត់ចូលទៅក្នុងផ្ទះ ពួកគេក៏ដេញតាម ទៅកាប់ និងចាក់បន្ថែមបណ្តាលឲ្យស្លាប់ និងរបួស ហើយពួកគេក៏ឡើងជិះម៉ូតូចេញពីកន្លែងកើតហេតុតែម្តងទៅ ។ ក្រោយមកពួកគេបានចូលដល់កន្លែងស្នាក់នៅ ប្រហែលមួយម៉ោង ក៏ស្រាប់តែមានសមត្ថកិច្ចតាមទៅដល់ និងធ្វើការឡោមព័ន្ធចាប់ខ្លួនពួកគេទាំង៣នាក់ រីឯបក្ខពួកផ្សេងទៀតបានដឹងទាន់ក៏រត់គេចខ្លួនបាត់អស់ ។
ជាមួយគ្នានេះដែរ សមត្ថកិច្ចអាវុធហត្ថរាជធានីភ្នំពេញ ក៏សូមធ្វើការអំពាវនាវចំពោះសាធារណៈជនទាំងឡាយណាដែលបានឃើញ ឬស្គាល់ ឬមានដំណឹងរបស់ជនសង្ស័យ៤នាក់ដែលបានរត់គេចខ្លួន មានឈ្មោះដូចខាងក្រោម ៖
ជនសង្ស័យទី១ ឈ្មោះ រិទ្ធ ដែលមានអាខោនហ្វេសប៊ុកឈ្មោះ Rith Sky ជនសង្ស័យ ទី២ ឈ្មោះ ក្រឹម ដែលមានអាខោនហ្វេសប៊ុកឈ្មោះ បងរិត បងរិត ជនសង្ស័យទី៣ ឈ្មោះ រ៉ា ដែលមានអាខោនហ្វេសប៊ុកឈ្មោះ បងរា និងអាខោមួយទៀតឈ្មោះ Bro Raaជនសង្ស័យទី៤ ឈ្មោះ មិត្ត ហៅអាបង ដែលមានអាខោនហ្វេសប៊ុកឈ្មោះ Fii Boy និងអាខោមួយទៀតឈ្មោះ Gk Co ។ សូមរាយការណ៍ មកកាន់មន្ត្រីកងរាជអាវុធហត្ថរាជធានីភ្នំពេញ ដែលមានទូរស័ព្ទលេខ៖
- 012 383 383
- 012 66 77 98
- 017 81 81 71
ឬរាយការណ៍ទៅកាន់សមត្ថកិច្ចដែលនៅជិតលោកអ្នកបំផុត សមត្ថកិច្ចនឹងធានា រក្សាការសម្ងាត់ជូន ៕
ចែករំលែកព័តមាននេះ