អាហ្សង់ទីន ៖ ការិយាល័យច្បាប់រដ្ឋអាជ្ញារបស់ប្រទេសអាហ្សង់ទីន នឹងបើកការប្រជុំក្រុមប្រឹក្សាវេជ្ជសាស្ត្រនៅដើមខែមីនាខាងមុននេះដើម្បីសំរេចថា តើស្តេចបាល់ទាត់អាហ្សង់ទីន Diego Maradona បានទទួលការព្យាបាលត្រឹមត្រូវដែរឬទេ? មុនពេលគាត់ទទួលមរណភាពកាលពីឆ្នាំមុន។
លោក Maradona បានទទួលមរណភាពកាលពីថ្ងៃទី២៥ ខែវិច្ឆិកា ឆ្នាំ២០២០ កន្លងទៅ ដោយសារជំងឺគាំងបេះដូង ពោលគឺប៉ុន្មានសប្តាហ៍បន្ទាប់ពីគាត់ទទួលការវះកាត់យកឈាមកកក្នុងខួរក្បាល។ ហើយរឿងចម្រូងចម្រាសជាច្រើនបានកើតឡើង ក្រោយការស្លា.ប់របស់អតីតខ្សែប្រយុទ្ធឆ្នើមក្រុម Barcelona និង Napoli រូបនេះ។
ក្រុមអ្នកស៊ើបអង្កេតកំពុងព្យាយាមស្វែងរកពីការធ្វេសប្រហែស លើការថែទាំសុខភាពរបស់លោក Maradona មុនពេលគាត់បាត់បង់ជីវិត។ អ្នកជំនាញចំនួន៩នាក់ រួមជាមួយអ្នកធ្វើកោសល្យវិច័យសពរបស់គាត់ នឹងត្រូវហៅឱ្យចូលរួមប្រជុំនៅថ្ងៃទី៨ ខែមីនា ឆ្នាំ២០២១ ខាងមុខនេះ។
ពាក់ព័ន្ធរឿងនេះ មនុស្ស៥នាក់រួមទាំងគ្រូពេទ្យជំនាញខាងសរសៃប្រសាទគឺលោក Leopoldo Luque និងគ្រូពេទ្យវិកលចរិកគឺលោកស្រី Agustina Cosachov កំពុងស្ថិតក្រោមការស៊ើបអង្កេតលើបទចោទឃាតកម្មដោយអចេតនា៕ (ដកស្រង់ចេញពី AFP)
ចែករំលែកព័តមាននេះ