បច្ចេកវិទ្យា ៖ ក្រុមហ៊ុនជាច្រើនមិនថាតូចឬធំនោះទេ បានចំណាយលុយជាច្រើនរៀងរាល់ឆ្នាំ ដើម្បីផ្សព្វផ្សាយពាណិជ្ជកម្ម ជាមួយនឹងក្រុមហ៊ុនហ្វេសប៊ុក ដោយសង្ឃឹមថាផលិតផលឬសេវាកម្មរបស់ពួកគេ នឹងត្រូវបានមើលឃើញពីសំណាក់មហាជន ដែលអាចក្លាយជាអតិថិជនរបស់ពួកគេ ដែលនេះធ្វើឱ្យក្រុមហ៊ុនហ្វេសប៊ុក…
បច្ចេកវិទ្យា ៖ ក្រុមហ៊ុនជាច្រើនមិនថាតូចឬធំនោះទេ បានចំណាយលុយជាច្រើនរៀងរាល់ឆ្នាំ ដើម្បីផ្សព្វផ្សាយពាណិជ្ជកម្ម ជាមួយនឹងក្រុមហ៊ុនហ្វេសប៊ុក ដោយសង្ឃឹមថាផលិតផលឬសេវាកម្មរបស់ពួកគេ នឹងត្រូវបានមើលឃើញពីសំណាក់មហាជន ដែលអាចក្លាយជាអតិថិជនរបស់ពួកគេ ដែលនេះធ្វើឱ្យក្រុមហ៊ុនហ្វេសប៊ុក រកចំណូលបានរាប់ពាន់លានដុល្លារអាមេរិក ពីការផ្សព្វផ្សាយពាណិជ្ជកម្មទាំងនេះ។
បើតាមការផ្សព្វផ្សាយរបស់សារព័ត៌មាន Financial Times កាលពីពេលថ្មីៗនេះបានឱ្យដឹងថា ក្រុមហ៊ុនហ្វេសប៊ុកបានរងការចោទប្រកាន់ នៅក្នុងពាក្យបណ្ដឹងមួយថា បានបំប៉ោងចំនួនអ្នកមើលក្នុងការផ្សព្វផ្សាយពាណិជ្ជកម្ម (Potential Reach) ដើម្បីរកចំណូលពីការផ្សព្វផ្សាយពាណិជ្ជកម្មឱ្យបានកាន់តែច្រើន។
នៅក្នុងការចោទប្រកាន់នេះ ពួកគេបានបង្ហាញសាររវាងអ្នកគ្រប់គ្រងធំៗ នៅក្នុងក្រុមហ៊ុនទាក់ទងនឹងការបំប៉ោងទិន្នន័យនេះ។ បុគ្គលិកផ្នែកគ្រប់គ្រងម្នាក់បានផ្ញើសារ ស្នើសុំឱ្យមានការកែតម្រូវ ដោយបន្ថយចំនួនអ្នកមើល ព្រោះវាខុសគ្នាខ្លាំងពេក ប៉ុន្តែត្រូវបានអ្នកគ្រប់គ្រងឆ្លើយតបវិញថា ការផ្លាស់ប្ដូរនេះនឹងធ្វើឱ្យពួកគេខាតបង់ចំណូលជាច្រើន។ នៅក្នុងពាក្យបណ្ដឹងនេះ ក៏បានបង្ហាញផងដែរថា ពេលខ្លះក្រុមហ៊ុនហ្វេសប៊ុកបានផ្ដល់ទិន្នន័យ ដែលមានចំនួនអ្នកមើលច្រើនជាងចំនួន អ្នករស់នៅក្នុងតំបន់នោះទៅទៀត។
សូមជម្រាបជូនថា នេះមិនមែនជាលើកទីមួយទេ ដែលក្រុមហ៊ុនហ្វេសប៊ុកបានរងការចោទប្រកាន់ទាក់ទងនឹងការបំប៉ោងទិន្នន័យនោះ កាលពីឆ្នាំ ២០១៩ ក្រុមហ៊ុនបានយល់ព្រមបង់ទឹកប្រាក់ចំនួន ៤០ លានដុល្លារអាមេរិកម្តងរួចមកហើយ ទាក់ទងនឹងការបំផ្លើសចំនួនអ្នកមើលវីដេអូផ្សព្វផ្សាយពាណិជ្ជកម្ម៕ ប្រភព ៖ នាយកដ្ឋានព័ត៌មានវិទ្យា
ចែករំលែកព័តមាននេះ