ខេត្តបាត់ដំបង៖ ជនសង្ស័យចំនួន០៥នាក់ ត្រូវបានកម្លាំងនគរបាលមូលដ្ឋានឃាត់ខ្លួន កាលពីវេលាម៉ោង១០យប់ថ្ងៃទី២០ កុម្ភៈ ពេលពួកគេកំពុងលួចកាត់ដើមឈើធ្នង់ចំនួន០២ដើមរបស់អ្នកភូមិ នៅចំណុចដំណាក់ដង្កោ ស្ថិតក្នុងភូមិថ្មី ឃុំកន្ទឺ១ ស្រុកបាណន់។
យោងតាមប្រភពព័ត៌មានបានឱ្យដឹងថា ជនសង្ស័យទាំង០៥នាក់ នោះមាន ១-ឈ្មោះ
វិន ពិសិដ្ឋ អាយុ២១ឆ្នាំ ២-ឈ្មោះ ប្រុស មករា អាយុ២៦ឆ្នាំ ៣-ឈ្មោះ ត្រួយ រដ្ឋា អាយុ២៦ឆ្នាំ ៤-ឈ្មោះ រ៉ម បូរ៉ី អាយុ៣២ឆ្នាំ និង៥-ឈ្មោះ សុទ្ធ ពិសី អាយុ២៦ឆ្នាំ។ ជនទាំង០៥នាក់នេះ រស់នៅភូមិវត្តកន្ទឺ ឃុំកន្ទឺ១ ស្រុកបាណន់។ ប្រភពដដែលបានប្រាប់ថា ក្រុមចោរលួចកាប់ឈើមួយសំបុកនេះ បានប្រើប្រាស់រណាយន្ត(ម៉ាស៊ីនត្រង់សឺន័រ)០១គ្រឿង លួចកាត់ដើមឈើធ្នង់ចំនួន០២ដើមនៅក្នុងស្រែ ដែលជារបស់ឈ្មោះ ភន សុខន ភេទប្រុសអាយុ៣៥ឆ្នាំ រស់នៅភូមិឆាយរំពាត់ ឃុំកន្ទឺ២ ស្រុកបាណន់។
សមត្ថកិច្ចបាននិយាយថា ម្ចាស់ឈើបានតាមដានដឹងពីសកម្មភាពក្រុមចោរហារយនេះ ពេលកំពុងលួចកាប់ឈើរបស់គាត់ទាំងកណ្ដាលយប់ ទើបគាត់រាយការណ៍ប្ដឹងសមត្ថកិច្ចឱ្យជួយអន្តរាគមន៍ចុះព័ទ្ធចាប់បានទាំងអស់តែម្ដង។ បើតាមមន្ត្រីនគរបាលដដែលថា ក្រុមចោរនេះបានរៀបផែនការលួចកាប់ឈើជនរងគ្រោះច្រើនលើកហើយ តែគ្មានឱកាសលុះពេលនៅយប់កើតហេតុក៏លើកគ្នាទាំងហ្វូងប្រដាប់ដោយរណាយន្តមួយគ្រឿងផង ទៅកាត់ឈើធ្នង់នោះក៏ត្រូវម្ចាស់តាមទាន់ប្ដឹងសមត្ថកិច្ចឱ្យចាប់ខ្លួនតែម្ដង។
សូមបញ្ជាក់ថា ពាក់ព័ន្ធនឹងពួកចោរលួចកាត់ឈើនៅពេលយប់នេះ បើតាមប្រភពព័ត៌មាននានាថា នៅខាងទឹកដីឃុំស្នង ស្រុកបាណន់ នេះក៏សំបូរក្រុមចោរលួយកាប់ឈើយ៉ាងផុសផុលខ្លាំងណាស់ដែរ។ ប្រភពបាននិយាយថា ក្រុមចោរដែលលួចកាប់ឈើគេតាមទូលចំការឬនៅតាមស្រែច្រើនបំផុត នៅភូមិបឹងក្រសាល ឃុំស្នឹង។ បើតាមអ្នកភូមិបានទម្លាយឱ្យដឹងថា ក្រុមចោរទាំងនោះក៏ត្រូវបានស្គាល់មុខទៀតផង ភាគច្រើននៅក្នុងមូលដ្ឋាន ហើយសុទ្ធតែពួកប្រើប្រាសថ្នាំញៀនទៀតផង។
ក្រុមនេះតែងធ្វើសកម្មភាពលួចកាប់ដើមឈើ ឬ លួចគាស់គល់ឈើគេនៅពេលយប់ ហើយប្រើប្រាសគោយន្តកន្ត្រៃសម្រាប់ដឹកជញ្ជូន។ ពេលខ្លះ ក៏ត្រូវបានម្ចាស់តាមទាន់ តែម្ចាស់បានត្រឹមសួរនាំពួកចោរ តែមិនហ៊ានប្ដឹង ឬទាមទាយកដើមឈើនោះវិញទេ ព្រោះខ្លាចចោរតាមធ្វើបាបធ្ងន់ជាងបាត់ឈើ។ ប៉ុន្តែពេលខ្លះអ្នកភូមិក៏បានរាយការណ៏ជូនសមត្ថកិច្ចដែរ តែស្ងាត់ជ្រៀបដដែល មិនឃើញមានវិធានការអ្វីពីសមត្ថកិច្ចទេ ដែលធ្វើជនល្មើសនៅតែបន្តប្រព្រឹត្តបទល្មើសទ្វេដង។
ទោះយ៉ាងណា ពាក់ព័ន្ធនឹងក្រុមចោរដៃយ៉ៃ មួយហ្វូងដែលលួចកាប់ឈើធ្នង់ចំនួន០២ដើមខាងលើនេះ បើតាមមន្ត្រីនគរបាលស្រុកបាណន់ បានប្រាប់ថា មន្ត្រីជំនាញបាននិងកំពុងរៀបចំសំណុំរឿងបញ្ជូនជនសង្ស័យទាំង០៥នាក់ រួមទាំងវត្ថុតាងរណាយន្តមួយគ្រឿងផង ទៅកាន់ស្នងការខេត្តហើយ ដើម្បីចាត់ការតាមនីតិវិធី៕
ចែករំលែកព័តមាននេះ