ត្រៀម​ដាក់​ឆ្នេរ​ខ្សាច់​កម្សាន្ត​បេក្ខភាព​នៅ​តាម​បណ្តា​ក្រុង​ស្រុក ក្នុង​ចលនា​ប្រឡងប្រណាំង​ឆ្នេរ​ខ្សាច់​កម្សាន្ត​ស្អាត ឆ្នាំ​២០២១ – Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

ត្រៀម​ដាក់​ឆ្នេរ​ខ្សាច់​កម្សាន្ត​បេក្ខភាព​នៅ​តាម​បណ្តា​ក្រុង​ស្រុក ក្នុង​ចលនា​ប្រឡងប្រណាំង​ឆ្នេរ​ខ្សាច់​កម្សាន្ត​ស្អាត ឆ្នាំ​២០២១

1 ខែ មុន
  • Koh Kong

ខេត្តកោះកុង ៖ នា​ព្រឹក​ថ្ងៃ​ទី​១៩ ខែកុម្ភៈ ឆ្នាំ​២០២១ គណៈកម្មាធិការ​ជាតិ​គ្រប់គ្រង និង​អភិវឌ្ឍ​តំបន់ឆ្នេរ​សមុទ្រ​កម្ពុជា បាន​រៀបចំ​សិក្ខាសាលា​ផ្សព្វផ្សាយ​ស្តី​ពី «​ការ​ប្រឡងប្រណាំង​ឆ្នេរ​ខ្សាច់​កម្សាន្ត​ស្អាត​លើក​ទី​៣ ឆ្នាំ​២០២១»…


ខេត្តកោះកុង ៖ នា​ព្រឹក​ថ្ងៃ​ទី​១៩ ខែកុម្ភៈ ឆ្នាំ​២០២១ គណៈកម្មាធិការ​ជាតិ​គ្រប់គ្រង និង​អភិវឌ្ឍ​តំបន់ឆ្នេរ​សមុទ្រ​កម្ពុជា បាន​រៀបចំ​សិក្ខាសាលា​ផ្សព្វផ្សាយ​ស្តី​ពី «​ការ​ប្រឡងប្រណាំង​ឆ្នេរ​ខ្សាច់​កម្សាន្ត​ស្អាត​លើក​ទី​៣ ឆ្នាំ​២០២១» អម​ដោយ​កិច្ចប្រជុំ​ពិគ្រោះ​យោបល់​ស្តី​ពី​ការ​ធ្វើ​បច្ចុប្បន្នភាព​លើ «​គោលការណ៍​ណែនាំ​ស្តី​ការ​គ្រប់គ្រង​ឆ្នេរ​ខ្សាច់​កម្សាន្ត​» និង «​ក្រម​ប្រតិបត្តិ​ឆ្នេរ​» ឲ្យ​ស្រប​តាម​ស្ថានភាព​បច្ចុប្បន្ន​ក្នុង​ការ​ចូលរួម​ទប់ស្កាត់​ការ​រីក​រាលដាល​នៃ​ជំងឺ​កូ​វី​ដ​-១៩ នៅ​សាលាខេត្ត​កោះកុង ក្រោម​អធិបតីភាព​លោក នី ផ​ល្លី អនុរដ្ឋលេខាធិការ​ក្រសួងទេសចរណ៍ ជា​អគ្គលេខាធិការ​រង គ​.​អ​.​ឆ​.​ក​. និង​ជា​ប្រធាន​ក្រុមការងារ​ទទួល​បន្ទុក​តាមដាន និង​វាយតម្លៃ​ឆ្នេរ​ខ្សាច់​កម្សាន្ត​ស្អាត និង​លោក អ៊ុ​ក ភ័​ត្រា អភិបាលរង​នៃ​គណៈ​អភិបាលខេត្ត​កោះកុង ដោយ​មានការ​ចូលរួម​ពី​រដ្ឋបាល​ក្រុង​ស្រុក និង​មន្ទីរ​អង្គភាព​ជំនាញ​ពាក់ព័ន្ធ​ជុំវិញ​ខេត្តកោះកុង​។

នៅ​ក្នុង​អង្គ​សិក្ខាសាលា លោក​អនុរដ្ឋលេខាធិការ នី ផ​ល្លី បាន​ជម្រាប​ជូន​ថា បន្ទាប់​ពី​បាន​លើក​កាលបរិច្ឆេទ​ក្នុង​ការ​រៀបចំ​ក្នុង​ឆ្នាំ​២០២០​កន្លង​មក និង​ដោយ​ស្ថានការណ៍​ប​ច្ចុ​ប​ប្បន្ន​នៃ​ជំងឺ​កូ​វី​ដ​-១៩ ស្ថិត​ក្រោម​ការ​គ្រប់គ្រង​បាន​យ៉ាង​ល្អ ក្រោម​ការ​ដឹកនាំ​របស់​ប្រមុខ​រាជរដ្ឋាភិបាល​កម្ពុជា​ដែល​មាន​សម្តេច​តេ​ជោ ហ៊ុន សែន ជា​នាយក​រដ្ឋមន្ត្រី ចលនា​ប្រឡងប្រណាំង​ឆ្នេរ​ខ្សាច់​កម្សាន្ត​ស្អាត​លើក​ទី​៣​ត្រូវ​បាន​ដាក់​ឲ្យ​ដំណើរការ​ឡើង​វិញ សម្រាប់​ឆ្នាំ​២០២១​នេះ​។

ជាមួយ​គ្នា​នោះ ក្នុង​កិច្ច​ដំណើរការ​ពិគ្រោះ​យោបល់​លើ​ការ​ធ្វើ​បច្ចុប្បន្នភាព​លើ «​គោលការណ៍​ណែនាំ​ស្តី​ការ​គ្រប់គ្រង​ឆ្នេរ​ខ្សាច់​កម្សាន្ត​» និង «​ក្រម​ប្រតិបត្តិ​ឆ្នេរ​» ឲ្យ​ស្រប​តាម​ស្ថានភាព​បច្ចុប្បន្ន​ក្នុង​ការ​ចូលរួម​ទប់ស្កាត់​ការ​រីក​រាលដាល​នៃ​ជំងឺ​កូ​វី​ដ​-១៩ លោក​អនុរដ្ឋលេខាធិការ បាន​ស្នើ​ឲ្យ​ដាក់​បញ្ចូល​សូចនាករ​គោល​ធំ​ៗ ចំនួន​២​បន្ថែម​ទៀត​គឺ គោលនយោបាយ​ជាតិភូមិ​-​ឃុំ​មាន​សុវត្ថិភាព និង​ការ​អនុវត្ត​វិធាន​សុខាភិបាល ដើម្បី​ធានា​បាន​ថា​គោលដៅ​ទេសចរណ៍​ឆ្នេរ​ខ្សាច់​កម្សាន្ត​ទាំងអស់​នៅ​ក្នុង​ខេត្ត​ទាំង​បួន​នៃ​តំបន់ឆ្នេរ​សមុទ្រ​កម្ពុជា ជា​គោលដៅ​ទេសចរណ៍​ប្រកបដោយ​សុវត្ថិភាព​សម្រាប់​ភ្ញៀវ​ទេសចរ​មក​សម្រាក​កម្សាន្ត​។

លោក​អនុរដ្ឋលេខាធិការ​បាន​បន្ថែម​ទៀត​ថា ខេត្តកោះកុង មាន​ឆ្នេរ​ខ្សាច់​ស្អាត​ធម្មជាតិ​ជា​ច្រើន​ដែល​មាន​សក្តានុពល​ខ្ពស់​អាច​រៀបចំ​កែ​លម្អ​ដើម្បី​ចូលរួម​ក្នុង​ការ​ប្រឡងប្រណាំង​ឆ្នេរ​ខ្សាច់​កម្សាន្ត​ស្អាត​លើក​ទី​៣​ឆ្នាំ​២០២១​បាន​។ លើស​ពី​នោះ គណៈកម្មាធិការ​ជាតិ​គ្រប់គ្រង និង​អភិវឌ្ឍ​តំបន់ឆ្នេរ​សមុទ្រ​កម្ពុជា​ពិនិត្យ​ឃើញ​ថា ឆ្នេរ​ខ្សាច់​ទាំង​អស់នោះ អាច​រៀបចំ​ដើម្បី​យក​ពិន្ទុ​ខ្ពស់ និង​ចំណាត់ថ្នាក់​ល្អ​បាន ដែល​នឹង​ក្លាយជា​គោលដៅ​ទេសចរណ៍​ដ៏​ទាក់ទាញ និង​ជា​មេដែក​ឆក់​ជម្រុញ​ដល់​ការ​រីក​លូតលាស់​វិស័យ​ទេសចរណ៍ និង​សេដ្ឋកិច្ច​នៅ​តាម​តំបន់​ជាប់​នឹង​ឆ្នេរ​ខ្សាច់​ទាំងនោះ​ផង​ដែរ​។

ដោយ​មើលឃើញ​ពី​សក្តានុពល​ទេសចរណ៍ធម្មជាតិ​ដ៏​សម្បូរ​បែប លោក​អនុរដ្ឋលេខាធិការ​បាន​ស្នើ និង​ជំរុញ​ដល់​រដ្ឋបាល​ខេត្តកោះកុង​ធ្វើ​បច្ចុប្បន្នភាព​ឆ្នេរ​ខ្សាច់​ទាំងអស់​ក្នុង​ខេត្ត និង​រៀបចំ​ជ្រើសរើស ត្រៀម​ដាក់​បញ្ចូល​ឆ្នេរ​បេក្ខភាព​ឲ្យ​បាន​ច្រើន​ក្នុង​ចលនា​ប្រឡងប្រណាំង​ឆ្នេរ​ខ្សាច់​កម្សាន្ត​ស្អាត​លើក​ទី​៣​ឆ្នាំ​២០២១​នេះ ដោយ​ចាប់ផ្តើម​រៀបចំ និង​កែ​លម្អ​ឆ្នេរ​ខ្សាច់​នោះ​ឲ្យ​ស្រប​តាម​សូចនាករ​ដែល​មាន​ចែង​នៅ​ក្នុង​គោលការណ៍​ណែនាំ​ស្តី​ការ​គ្រប់​ឆ្នេរ​ខ្សាច់​កម្សាន្ត ដើម្បី​ឆ្ពោះទៅ​ទទួល​បាន​ជ័យ​លា​ភី​នា​ពេល​ខាង​មុខ​។

ក្នុង​ករណី​ចាំបាច់ អគ្គលេខាធិការដ្ឋាន​នៃ​គណៈកម្មាធិការ​ជាតិ​គ្រប់គ្រង និង​អភិវឌ្ឍ​តំបន់ឆ្នេរ​សមុទ្រ​កម្ពុជា នឹង​ជួយ​គាំទ្រ​ជា​បច្ចេកទេស​ក្នុង​ការ​រៀបចំ​កែ​លម្អ​ឆ្នេរ​ទាំងនោះ​ឲ្យ​បាន​ស្អាត​ស្រប​តាម​ស្តង់ដា​បច្ចេកទេស​ដើម្បី​អាចយ​កបាន​ពិន្ទុ និង​ចំណាត់ថ្នាក់​ល្អ​។ គួរ​បញ្ជាក់​ថា រដ្ឋបាល​ខេត្តកោះកុង​នឹង​ត្រៀម​ដាក់​ឆ្នេរ​ខ្សាច់​កម្សាន្ត​បេក្ខភាព​ជា​ច្រើន ក្នុង​ចលនា​ប្រឡងប្រណាំង​ឆ្នេរ​ខ្សាច់​កម្សាន្ត​ស្អាត​លើក​ទី​៣ ឆ្នាំ​២០២១ ក្នុង​នោះ​រួម​មាន​៖ ឆ្នេរ​កោះ​ស្នេហ៍​ស្ថិត​នៅ​ក្នុង​ក្រុង​ខេមរភូមិន្ទ ឆ្នេរ​ប៉ាក់​ខ្ល​ង និង​ឆ្នេរ​ចាំ​យាម​ក្នុងស្រុក​មណ្ឌល​សី​ម៉ា ឆ្នេរ​នេសាទ និង​ឆ្នេរ​ជ្រោយ​ស្វាយ ក្នុងស្រុក​ស្រែអំបិល ឆ្នេរ​អាវ​សី​វង្ស ឆ្នេរ​ឡាំ​ធាន ឆ្នេរ​ពយ​ស្ងា​វ ឆ្នេរ​អាវ​យាយ​សែន ឆ្នេរ​កោះ​ស្មាច់ និង​ឆ្នេរ​កោះ​សមិត ក្នុងស្រុក​គិរី​សាគរ​៕ ដោយ ៖ សុខ សា​រ៉ា​យ