រាជធានីភ្នំពេញ ៖ រដ្ឋាភិបាលបានចេញអនុក្រឹត្យស្ដីពីការបង្កើតច្រកទ្វារអ៊ីនធឺណិតជាតិកាល ពីថ្ងៃទី១៦ ខែកុម្ភៈ ឆ្នាំ២០២១ ។ ច្រកទ្វារអ៊ីនធឺណិត មានគោលបំណងសម្រួល និងគ្រប់គ្រងការតភ្ជាប់បណ្ដាញអ៊ីនធឺណិត…
រាជធានីភ្នំពេញ ៖ រដ្ឋាភិបាលបានចេញអនុក្រឹត្យស្ដីពីការបង្កើតច្រកទ្វារអ៊ីនធឺណិតជាតិកាល ពីថ្ងៃទី១៦ ខែកុម្ភៈ ឆ្នាំ២០២១ ។ ច្រកទ្វារអ៊ីនធឺណិត មានគោលបំណងសម្រួល និងគ្រប់គ្រងការតភ្ជាប់បណ្ដាញអ៊ីនធឺណិត ដើម្បីពង្រឹងប្រសិទ្ធភាពនៃការកៀរគរចំណូលជាតិការពារសន្តិសុខជាតិ និងថែរក្សាសណ្ដាប់ធ្នាប់ វប្បធម៌ជាតិ ។
បច្ចុប្បន្ននេះគេសង្កេតឃើញថា អ៊ីនធឺណិត បានក្លាយជាមធ្យោបាយទំនាក់ទំនង ជាកន្លែងជំនួញ និងការងារ ។ មិនថាពលរដ្ឋកម្ពុជា និងសកលលោកនោះទេបានប្រើប្រាស់អ៊ិនធឺណែតក្នុងជីវភាពប្រចំាថ្ងៃ មិនថា លើជំនួញ រហូតដល់បញ្ហានយោបាយទៀតផង ។ នៅកម្ពុជាស្រ្តីជាច្រើនបានផ្តើមអាជីវកម្មនៅលើអ៊ិនធឺណិត ដែលអ្នកខ្លះឲ្យតម្លៃពីចំនុចវិជ្ជមានមួយនេះ ជាមោទនភាពរបស់ស្រ្តីខ្មែរដែលបានដើរទាន់បច្ចេកវិទ្យា ។
សម្រាប់អង្គការសង្គមស៊ីវិល ការបង្កើតច្រកទ្វារអ៊ិនធឺណិតនេះ នឹងធ្វើឲ្យប៉ះពាល់ដល់សិទ្ធិមនុស្សជាអន្តរជាតិ និងរដ្ឋធម្មនុញ្ញរបស់កម្ពុជា ។ ក្រុមអង្គការចំនួន ៤៥អង្គការ កាលពីថ្ងៃទី១៨កុម្ភៈនេះ បានចេញនូវសេចក្តីថ្លែងការណ៍រួមស្នើឲ្យរដ្ឋាភិបាលទម្លាក់ចោលនូវអនុក្រឹត្យស្តីពីការបង្កើតច្រកអ៊ិនធឺណិត ។ សេចក្តីថ្លែងការណ៍រួមនេះធ្វើឡើងបន្ទាប់ពីរដ្ឋាភិបាលកម្ពុជា នៅថ្ងៃទី១៦ ខែកុម្ភៈ បានអនុម័តបង្កើតច្រកទ្វារអ៊ិនធឺណិតនៅកម្ពុជា។
តាមរយៈសេចក្តីថ្លែងការណ៍រួមចំនួន៥ទំព័រមួយ អង្គការក្រៅរដ្ឋាភិបាល៤៥អង្គភាព បានបង្ហាញពីការព្រួយបារម្ភនិងប្រតិកម្មទៅនឹងការសម្រេចបង្កើតឲ្យមានច្រកទ្វារអ៊ិនធឺណិតរបស់រដ្ឋាភិបាលកម្ពុជា ។ ក្រុមអង្គការទាំងនោះបានចាត់ទុកថា ការបង្កើតច្រកទ្វារអ៊ិនធឺណិតនេះនឹងធ្វើឲ្យប៉ះពាល់ដល់សិទ្ធិទទួលព័ត៌មាន សិទ្ធិសម្តែងមតិសិទ្ធិឯកជនភាព និងជាពិសេសជាការបំពានលើសិទ្ធិមនុស្សជាអន្តរជាតិ និងរដ្ឋធម្មនុញ្ញរបស់កម្ពុជា។
សង្គមស៊ីវិលថា ការបង្កើតច្រកអ៊ិនធឺណិតនេះនឹងជួយសម្រួលដល់ការឃ្លាំមើលនិងតាមដាននូវរាល់សកម្មភាពតាមអ៊ិនធឺណិត ព្រមទាំងផ្តល់សិទ្ធិអំណាចដល់រដ្ឋាភិបាលក្នុងការតាមដាន និងត្រួតពិនិត្យទិន្នន័យបុគ្គលណាម្នាក់ ដែលជាការព្រួយបារម្ភ និងគំរាមកំហែងដល់សិទ្ធិឯកជនភាព ដើម្បីធ្វើការបញ្ចេញមតិតាមបណ្តាញសង្គម។ លើសពីនេះក្រុមអង្គការសង្គមស៊ីវិលបានលើកឡើងថា ការបង្កើតច្រកទ្វារអ៊ិនធឺណិតនេះ នឹងប៉ះពាល់ទៅលើទីផ្សារពាណិជ្ជកម្មតាមប្រព័ន្ធអេឡិចត្រូនិចនៅកម្ពុជា ហើយអាចធ្វើអាជីកម្មមួយចំនួនត្រូវចាកចេញពីកម្ពុជាបន្ទាប់ពីមានអនុក្រឹត្យនេះ។
ទោះយ៉ាងណា សម្តេចនាយករដ្ឋមន្រ្តី ពានបញ្ជាឲ្យក្រសួងសេដ្ឋកិច្ច ហិរញ្ញវត្ថុ និងក្រសួងប្រៃសណីយ៍និងទូរគមនាគមន៍ អង្គភាពពាក់ព័ន្ធដទៃទៀតអនុវត្តអនុក្រឹត្យនេះ ចាប់ពីថ្ងៃចុះហត្ថលេខាតទៅ៕
ចែករំលែកព័តមាននេះ