ខេត្តបាត់ដំបង ៖ ប្រឡាយដែលជនទុច្ចរិតទើបប្រើគ្រឿងចក្រធ្វើសកម្មភាពលួចកាយថ្មីៗ ដើម្បីធ្វើជាព្រំហ៊ុមព័ទ្ធរំលោភយកដីព្រៃលិចទឹកនៅក្នុងតំបន់២ និងតំបន់៣ ដែលមួយខ្សែៗប្រវែងរាប់ពាន់ម៉ែត្រ ត្រូវបានកម្លាំងគណបញ្ជាការកងឯកភាពស្រុកមោងប្ញស្សី ចុះស្រាវជ្រាវរកឃើញ កាលពីព្រឹកថ្ងៃទី១៦ កុម្ភៈ នៅក្នុងភូមិសាស្ត្រ ភូមិអង្គ្រង ឃុំជ្រៃ តែគ្រឿងចក្រត្រូវបានគេជន្លៀមចេញផុត១ថ្ងៃ មុនពេលអាជ្ញាធរចុះទៅដល់ ដែលគេសង្ស័យអាចមានអ្នកផ្ដល់ដំណឹងជាមុន។
របាយការណ៍ចុះស្រាវជ្រាវរបស់អាជ្ញាធរស្រុកមោងប្ញស្សី ដែលកោះសន្តិភាពទទូលបាននៅព្រឹកថ្ងៃទី១៧ កុម្ភៈ គឺកម្លាំងចម្រុះរបស់គណបញ្ជាការកងឯកភាពស្រុក បានចុះទៅពិនិត្យនៅតាមភូមិសាស្ត្រីនានា ក្នុងភូមិអង្គ្រង ឃុំជ្រៃ ស្រុកមោងប្ញស្សី ហើយបានរកឃើញស្លាកស្នាមថ្មីៗបំផុត ដែលជនទុច្ចរុត បានប្រើប្រាសគ្រឿងចក្រឈួសកាយធ្វើជាប្រឡាយឬធ្វើព្រំ ដើម្បីហ៊ុមព័ទ្ធយកដីព្រៃលិចទឹកដោយខុសច្បាប់។
បើយោងលើរបាយការណ៍ដដែល ទីតាំងដែលពួកគេជនទុច្ចរិតកាយប្រឡាយធ្វើព្រំរំលោភយកដីព្រៃលិចទឹកនោះ មានដូចជានៅចំណុច «បឹងឡងទាក» គឺមានចំនួន០២ខ្សែ ដែលមួយខ្សែមានប្រវែងប្រមាណ២០០ម៉ ទទឹង២ម៉ និង ជម្រៅ១,៥ម៉ រីឯមួយខ្សែទៀតមានប្រវែងប្រមាណ១,១៤០ម៉ ទទឹង៣ម៉ និងជម្រៅ១,៥ម៉ ដែលទាំង២ខ្សែនេះស្ថិតនៅក្នុង«តមបន់ៗ»។ ដោយឡែកមួយខ្សែទៀត នៅចំណុច«បឹងកំភ្លាញ» មានប្រវែងប្រមាណ១,៣០០ម៉ ទទឹង៤ម៉ និង ជម្រៅ៤ម៉ ដែលស្ថិតនៅក្នុង«តំបន់៣»។
តំបន់ទាំង២នេះ សុទ្ធតែជាតំបន់ដែលត្រូវបានរាជរដ្ឋាភិបាល ហាមឃាត់ដាច់ខាតមិនឲ្យមានការកាប់រុករានរំលោភបំពានយកធ្វើជាដីកម្មសិទ្ធិធឯកជនឡើយ។ នាយករងរដ្ឋបាលស្រុកមោងប្ញស្សី លោក លី សាលីម ដែលដឹកនាំកិច្ចប្រតិបត្តិការនេះផ្ទាល់ បានប្រាប់កោះសន្តិភាពតាមទូរស័ព្ទថា ប្រឡាយៅទាំង០៣ខ្សែដែលក្រុមការងារចុះស្រាវជ្រាវរកឃើញខាងលើនេះ គឺសុទ្ធតែបានធ្វើរំលោភបំពានលើដីព្រៃលិចទឹកនៅក្នុងតំបន់ហាមឃាត់។
ជនទុច្ចរិតបានប្រើគ្រឿងចក្រឈួសឆាយដីព្រៃលិចទឹកនៅតំបន់២និងតំបន់៣ ដែលជាតំបន់ការពារដោយច្បាប់ ដើម្បីហ៊ុមព័ទ្ធយកដីធ្វើជាកម្មសិទ្ធិឯកជន។ លោកលី សាលីម បានបញ្ជាក់ថា នៅទីនោះយើងបានឃើញស្នាមជីកកកាយធ្វើប្រឡាយទឹកថ្មីៗ ដែលទំនងគ្រឿងចក្រនោះ បានដកចេញផុត១ថ្ងៃ មុនពេលកម្លាំងចម្រុះរបសលោកចុះទៅដល់។ ហើយការដកគ្រឿងចក្រយ៉ាងប្រផាប់ប្រភីងនេះ ទំនងអាចមានរនុកក្នុង នៅក្នុងជួរគណបញ្ជាការកងេកភាពស្រុកណាម្នាក់ជាអ្នកផ្ដល់ដំណឹងនេះជាមុន ទើបគ្រឿងចក្រនោះដកចេញមុនពេលកម្លាំងចុះទៅដល់។ ប៉ុន្តែយ៉ាងណា លោកលី សាលីម បានប្រាប់ថា ជំហានដំបូងនេះ យើងកំពុងធ្វើការស្រាវជ្រាវរកអត្តសញ្ញាណម្ចាស់គ្រឿងចក្រ និង អ្នកប្រព្រឹត្តបទល្មើសទាំងនោះហើយ។ ប៉ុន្តែចំណាត់ការបន្តបែបណានោះ គឺ ស្ថិតនៅលើគោលការណ៏របស់លោកអភិបាលស្រុកជាអ្នកសម្រេច។
សូមរំលឹកថា នៅតាមភូមិសាស្ត្រនានា ក្នុងទឹកដីឃុំជ្រៃ ស្រុកមោងប្ញស្សី នេះ កន្លងមកត្រូវគេរកឃើញថា មានការឈូសឆាយរំលោភយកដីព្រៃលិចទឹក នៅក្នុងតំបន់ហាមឃាត់ទាំងនោះរាប់ពាន់ហិចតា ដែលសមាសភាព នៃជនប្រព្រឹត្តភាពច្រើនត្រូវគេស្គាល់ថា សុទ្ធតែជាមន្ត្រីមានអំណាច មានលុយ និង បក្សពួក។ ក្រុមជនទុច្ចរិតដែលមានអំណាច មានលុយទាំងនោះក៏ត្រូវបានគេស្គាល់អត្តសញ្ញាណស្ទើរគ្រប់សមាសភាពទៀតផង។ ប៉ុន្តែអាជ្ញាធរខេត្ត ឬ ស្ថាប័នជំនាញដែលចុះអនុវត្តការងារនេះ ហាក់បានត្រិមតែធ្វើរបាយការណ៍ជូនកាលកុហក ជូនកាលត្រង់ រាយការណ៍ជូនថ្នាក់លើបានជ្រាបតែប៉ុណ្ណោះ តែការអនុវត្តច្បាប់សេរ៉ូតាប្លាក។
បើតាមការសង្កេតលើករណីនេះ រហូតមកដល់ពេលនេះ គេមិនទាន់ឃើញអាជ្ញាធរមានសមត្ថកិច្ច ឬ ថ្នាក់ដឹកនាំ អូសកជើងខ្លាំងខាងរំលោភបំពានដីរដ្ឋណាម្នាក់យកមកផ្តន្ទាទោសតាមច្បាប់នៅឡើយទេ បើទោះជាជនទុច្ចរិតទាំងនោះត្រូវបានគេស្គាល់យ៉ាងច្បាស់ក្ដី។ មិនតែប៉ុណ្ណោះ គេឃើញជនទុច្ចរិតទាំងនោះនៅតែបន្តកាប់ទន្ទ្រានរំលោភបំពានយកដីព្រៃលិចទឹកនៅតំបន់ទន្លេសាបដដែល៕
ចែករំលែកព័តមាននេះ