ខេត្តបន្ទាយមានជ័យ ៖ តាមព័ត៌មានចុងក្រោយថា ករណីនេះជនរងគ្រោះជាន់មីនផ្ទុះដាច់ជើងខាងស្តាំ និងជាពលករដែលតែងលួចចូលទៅរកការងារធ្វើនៅដីថៃ
ជិតៗព្រំដែន ដូចជាធ្វើជាកម្មករកាប់អំពៅ ឬដកដំឡូងជាដើម ។
ពលករម្នាក់ដែលវិលត្រឡប់ពីប្រទេសថៃ បានជួបគ្រោះអកុសលព្រោះតែលួចដើរផ្លូវកាត់ដោយសារចង់គេចពីសមត្ថកិច្ច ក៏ជាន់មីនផ្ទុះកក្រើកដាច់ជើងម្ខាង ។ហេតុការណ៍នេះ កើតឡើងកាលពីព្រលប់ថ្ងៃទី១៤ ខែកុម្ភៈ ឆ្នាំ២០២១ នៅតាមបន្ទាត់ព្រំដែន ក្នុងភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត ។ ជនរងគ្រោះឈ្មោះ យឿន រ៉ន ភេទប្រុស អាយុ៣៩ឆ្នាំ មានទីលំនៅក្នុងភូមិ សង្កាត់ខាងលើ ។
លោក ឆាយ សុជាតិ នាយប៉ុស្តិ៍ដើមកកោះនៃនគរបាលការពារព្រំដែនគោកលេខ៩១១ ថ្លែងថា ពលកររូបនេះបានព្យាយាមគេចវេះពីសមត្ថកិច្ច ដោយដើរផ្លូវកាត់ក៏ចូលចំចម្ការមីនទើបបណ្តាលឲ្យផ្ទុះកក្រើកនៅម៉ោងជាង៧យប់ ។ក្រោយពីឮសំឡេងផ្ទុះនៅតំបន់ស ចំណុចបន្ទាត់ព្រំដែន ហើយសំឡេងជនរងគ្រោះស្រែកដង្ហោយឲ្យជួយ លោកក៏សុំគោលការណ៍ទៅលោកមេបញ្ជាការវរៈ បន្ទាប់មកក៏ដោះមីនចូលទៅចំណុចកើតហេតុ និងបានជួបហើយជួយយកជនរងគ្រោះទៅកាន់មន្ទីរពេទ្យភ្លាមៗ ។
ប្រភពដដែលថា ដោយសាររបួសជនរងគ្រោះមានសភាពធ្ងន់ ខាងមន្ទីរពេទ្យបង្អែកក្រុងប៉ោយប៉ែតក៏បានបញ្ជូនបន្តទៅមន្ទីរពេទ្យមិត្តភាពកម្ពុជា-ជប៉ុន មង្គលបុរីទៀតនៅយប់ថ្ងៃដដែលនោះ ។ យ៉ាងណាក៏ដោយ លោកនាយប៉ុស្តិ៍ខាងលើមិនបានប្រាប់ពីប្រភេទគ្រាប់មីនដែលជនរងគ្រោះដើរជាន់នេះ ឬផលិតនៅប្រទេសណាឡើយ ប៉ុន្តែប្រាប់ថា អាចជាគ្រាប់មីនប្រឆាំងមនុស្សបន្សល់ទុកពីសម័យសង្គ្រាមក្នុងទសវត្សរ៍ឆ្នាំ១៩៨០ ។
ចែករំលែកព័តមាននេះ