ខេត្តប៉ៃលិន ៖ នាឱកាសបុណ្យចូលឆ្នាំចិនវៀតណាមនេះ គេសង្កេតឃើញមានភ្ញៀវទេសចរជាតិ អន្តរជាតិ បាននាំគ្នាដើរលេងកម្សាន្តនៅតាមរមណីយដ្ឋាននានា ក្នុងខេត្តប៉ៃលិន ។ តែបើប្រៀបធៀបទៅនឹងឆ្នាំ២០២០កន្លងទៅឃើញថា មានការធ្លាក់ចុះបន្តិច។
ទោះបីជាយ៉ាងណា ប្រជាពលរដ្ឋដែលលក់ដូរនៅតាមកន្លែងកម្សាន្តទាំងនោះមានការសប្បាយរីករាយ ខណ:ការលក់ដូរកាក់កប ។ បើយោងតាមរបាយការណ៍របស់លោក លឹម វាសនា ប្រធានមន្ទីរទេសចរខេត្ត អំពីស្ថានភាពភ្ញៀវទេសចរ តាមរមណីយដ្ឋានក្នុងខេត្តប៉ៃលិន នាឱកាសពិធីបុណ្យចូលឆ្នាំថ្មីប្រពៃណីជនជាតិ ចិន-វៀតណាម ចាប់ពីថ្ងៃទី១២-១៤ ខែកុម្ភ: ឆ្នាំ២០២១ បានឱ្យដឹងថា ៖ នៅតាមគោលដៅទេស ចរណ៍នានាដូចជា ៖ – រមណីយដ្ឋានភ្នំយ៉ាត -រមណីយដ្ឋានទឹកធ្លាក់អូរតាវ៉ៅ ហៅភ្នំខៀវ – រមណីយដ្ឋានចំការខ្នុរ – រមណីយដ្ឋាន ម្លប់សាវម៉ាវ – រមណីយដ្ឋាន ស្ទឹងត្រជាក់ចិត្ត – តំបន់ទេសចរណ៍ស្ទឹងប៉ៃលិន (ស្ទឹងតារាប) មានភ្ញៀវទេសចសរុបចំនួន ៖ ភ្ញៀវទេចរជាតិចំនួន១២,៦៩៦នាក់ និងភ្ញៀវទេសចរបរទេសចំនួន២១នាក់ ។
ប្រភពដដែលបន្តទៀតថា ចំនួនភ្ញៀវទេសចរ សរុបទាំងអស់មានចំនួន១២,៧១៧នាក់ បើប្រៀបធៀបទៅនឹងឆ្នាំ២០២០ កន្លងមក មានចំនួនភ្ញៀវចំនួន ១៥,៥៧៥នាក់ នេះរកឃើញថា មានការថយចុះជាងឆ្នាំមុនចំនួន១៨,៤៨% ។
លោកបញ្ជាក់ថា ទោះបីជាយ៉ាងណា ក៏អាជ្ញាធរខេត្តប៉ៃលិន ដឹកនាំដោយលោកជំទាវ បាន ស្រីមុំ អភិបាលខេត្តប៉ៃលិន កំពុងធ្វើការកសាងរមណីយដ្ឋានទឹកធ្លាក់ភ្នំខៀវ ឱ្យមានការទាក់ទាញ និងមានចំណាប់អារម្មណ៍ពីភ្ញៀវទេសចរ ដោយមានការស្ថាបនាផ្លូវរហូតដល់កន្លែងលេងកម្សាន្ត មិនមានការលំបាកដូចមុននោះឡើយ ។
ជាពិសេសកន្លែងទឹកជ្រោះត្រង់ជាន់ទី៣៦ ដែលខ្ពស់ជាងគេ ក៏មានផ្លូវឡើងទៅដល់ដែរ អាចឱ្យភ្ញៀវទេសចរណ៍ចុះងូតទឹកលេងយ៉ាងត្រជាក់ចិត្ត និងបំបាត់នូវ ក្តីកង្វល់ ព្រមទាំងនាំមកនូវអារម្មណ៍ភ្លឺថ្លាថែមទៀតផង ។
ជាពិសេសមានសង់ខ្យុសថ្មីៗ ដើម្បីឲ្យភ្ញៀវចូលទស្សនា អង្គុយលេង និងទទួលទានអាហារជួបជាក្រុមគ្រួសារ ៕
ចែករំលែកព័តមាននេះ