ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ពលករម្នាក់បានវិលត្រឡប់ពីថៃ ក៏ជួបគ្រោះអកុសលខណៈពេលដើរផ្លូវកាត់ ព្រោះតែសង្ស័យថា ពលកររូបនេះចង់គេចពីសមត្ថកិច្ច ស្រាប់តែជាន់ត្រូវមីនផ្ទុះឡើងកក្រើក បណ្តាលឱ្យដាច់ជើងម្ខាងនៅព្រលប់ថ្ងៃទី១៤ ខែកុម្ភៈ ឆ្នាំ២០២១ នៅចំណុចបន្ទាត់ព្រំដែនក្នុងភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
សេចក្តីរាយការណ៍បានឱ្យដឹងថា ជនរងគ្រោះក្នុងហេតុការណ៍ខាងលើនេះ ឈ្មោះយឿន រ៉ន ភេទប្រុស អាយុ៣៣ឆ្នាំ មានទីលំនៅក្នុងភូមិព្រៃគប់ សង្កាត់និងក្រុងកើតហេតុ។
បើតាមលោកឆាយ សុជាតិ មេប៉ុស្តិ៍ដើមកកោះនៃនគរបាលការពារព្រំដែនគោកលេខ៩១១ បានប្រាប់ថា ជនរងគ្រោះគឺជាពលករវិលត្រឡប់ពីថៃ ហើយសង្ស័យតែព្យាយាមគេចវេសពីសមត្ថកិច្ច ទើបដើរផ្លូវកាត់ចូលទៅចំចំការមីន បណ្តាលឱ្យផ្ទុះយ៉ាងកក្រើកនៅម៉ោងជាង៧យប់ថ្ងៃទី១៤នេះតែម្តង។
លោកនាយប៉ុស្តិ៍បន្តថា ក្រោយពេលសម្លេងផ្ទុះយ៉ាងកក្រើកនៅតំបន់.សនោះ ស្រាប់តែមានសម្លេងដង្ហោយស្រែកឲ្យជួយពីជនរងគ្រោះ លោកក៏សុំគោលការណ៍ទៅលោកមេបញ្ជាការវរ បន្ទាប់មកក៏ដោះមីនចូលទៅចំណុចកើតហេតុ និងបានជួប ហើយជួយជនរងគ្រោះយកទៅកាន់មន្ទីរពេទ្យភ្លាមៗផងដែរ។
ប្រភពដដែលបន្តថា ដោយសារតែជនរងគ្រោះមានសភាពធ្ងន់ធ្ងរពេក ព្រោះតែជនរងគ្រោះជាន់មីនត្រូវចំជើងខាងស្តាំបណ្តាលឱ្យដាច់ ទើបខាងមន្ទីរពេទ្យបង្អែកក្រុងប៉ោយប៉ែត ក៏បានបញ្ជូនបន្តទៅមន្ទីរពេទ្យមិត្តភាពកម្ពុជា-ជប៉ុនមង្គលបូរី នៅយប់ថ្ងៃដដែលនោះ។
យ៉ាងណាក៏ដោយ នាយប៉ុស្តិ៍ខាងលើមិនបានប្រាប់ពីប្រភេទមីនដែលជនរងគ្រោះដើរជាន់នេះថា ម៉ាកអ្វី ឬផលិតនៅប្រទេសណាឡើយ? ប៉ុន្តែបានប្រាប់ថា អាចជាគ្រាប់មីនដែលបន្សល់តាំងពីសម័យសង្គ្រាមម្ល៉េះ។
ពាក់ព័ន្ធនឹងករណីខាងលើនេះ យោងតាមការបំភ្លឺរបស់បងប្រុសបង្កើតជនរងគ្រោះឈ្មោះ យឿន រី ភេទប្រុស អាយុ៣៥ឆ្នាំ បានឲ្យដឹងថា ប្អូនប្រុសរបស់ខ្លួនតែងតែដើរចេញចូលឆ្លងកាត់ទៅប្រទេសថៃជារៀងរាល់មួយសប្តាហ៍ម្តង ដើម្បីទៅរកការងារធ្វើនៅទឹកដីថៃជិតៗព្រំដែន ដូចជាទៅកាប់អំពៅ និងដកដំឡូងនៅក្នុងប្រទេសថៃតាមច្រកព្រៃគប់។ លុះរហូតមកដល់ថ្ងៃកើតហេតុនេះ ប្អូនប្រុសខ្លួនក៏ចេញទៅតាមច្រករបៀងដូចសព្វមួយដងដែរ ស្រាប់តែថ្ងៃនេះក៏ជាន់មីន បណ្តាលឲ្យរងរបួសដាច់ជើងខាងស្តាំធ្ងន់ធ្ងរតែម្តង ។
អត្ថបទសរសេរ ដោយ
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ