យុទ្ធនាការចាក់វ៉ាក់សាំងកូវីដ១៩ នៅកម្ពុជា ចាប់ផ្តើមហើយ!
- ភ្នំពេញ
ភ្នំពេញ៖ កម្ពុជា ចាប់ផ្តើមយុទ្ធនាការចាក់វ៉ាក់សាំងកូវីដ១៩ នៅថ្ងៃទី១០ ខែកុម្ភៈនេះតទៅ។ ការចាក់វ៉ាក់សាំងនេះ ត្រូវធ្វើជាដំណាក់កាលៗ ទៅតាមចំនួនវ៉ាក់សាំង ដែលបាន ទទួលរួចហើយ…
ភ្នំពេញ៖ កម្ពុជា ចាប់ផ្តើមយុទ្ធនាការចាក់វ៉ាក់សាំងកូវីដ១៩ នៅថ្ងៃទី១០ ខែកុម្ភៈនេះតទៅ។ ការចាក់វ៉ាក់សាំងនេះ ត្រូវធ្វើជាដំណាក់កាលៗ ទៅតាមចំនួនវ៉ាក់សាំង ដែលបាន ទទួលរួចហើយ…
ភ្នំពេញ៖ កម្ពុជា ចាប់ផ្តើមយុទ្ធនាការចាក់វ៉ាក់សាំងកូវីដ១៩ នៅថ្ងៃទី១០ ខែកុម្ភៈនេះតទៅ។ ការចាក់វ៉ាក់សាំងនេះ ត្រូវធ្វើជាដំណាក់កាលៗ ទៅតាមចំនួនវ៉ាក់សាំង ដែលបាន ទទួលរួចហើយ និងវ៉ាក់សាំង ដែលអាចនឹងទទួលបាននៅក្នុងឆ្នាំ២០២១ នេះ។
ការចាក់វ៉ាក់សាំងកូវីដ-១៩ SINOPHARM ដែលកម្ពុជា ទទួលបានពីចិន ចំនួន ៦០ម៉ឺនដូស ត្រូវធ្វើឡើងនៅតាមមន្ទីរពេទ្យរដ្ឋ ចំនួន ៥ នៅភ្នំពេញ។ មន្ទីរពេទ្យ ៤ សម្រាប់ស៊ីវិល និងមន្ទីរពេទ្យ ១ សម្រាប់កងកម្លាំងប្រដាប់អាវុធ។
ចាប់ពីម៉ោង ៨ព្រឹក ថ្ងៃពុធ ទី១០កុម្ភៈ ក្រសួងសុខាភិបាល ចាប់ផ្តើមចាក់វ៉ាក់សាំង ៣០ម៉ឺនដូស នៅមន្ទីរពេទ្យរដ្ឋ ចំនួន ៤ រួមមាន៖ ១-នៅមន្ទីរពេទ្យកាល់ម៉ែត្រ សម្រាប់ឥស្សរជនជា ទេសរដ្ឋមន្ត្រី រដ្ឋមន្ត្រី រដ្ឋលេខាធិការ ឬមានឋានៈស្មើ។ ២-នៅមន្ទីរពេទ្យព្រះអង្គឌួង សម្រាប់ ឥស្សរជនជាអនុរដ្ឋលេខាធិការ ឬមានឋានៈស្មើ។ ៣-មន្ទីរពេទ្យមិត្តភាពខ្មែរ-សូវៀត សម្រាប់ ឥស្សរជន ជាអភិបាលរាជធានីខេត្ត។ ៤-នៅមន្ទីរពេទ្យកុមារជាតិ សម្រាប់ អ្នកសារព័ត៌មាន។
ការចាក់វ៉ាក់សាំងនេះ ត្រូវធ្វើដោយឥតគិតថ្លៃ ដោយស្ម័គ្រចិត្ត និងត្រូវចុះឈ្មោះជាមុន តាម ប្រព័ន្ធទូរស័ព្ទ ឬក៏នៅតាមមន្ទីរពេទ្យនីមួយៗ។
ដោយឡែក នៅមន្ទីរពេទ្យព្រះកេតុមាលា ឬមន្ទីរពេទ្យទាហាន នៅជិតវត្តភ្នំ នឹងចាប់ពីម៉ោង ២រសៀល ថ្ងៃទី១០ ខែកុម្ភៈ ឆ្នាំ២០២១ នឹងបើកចាក់វ៉ាក់សាំងកូវីដ ស៊ីណូហ្វាម ជូននាយទាហានជាន់ខ្ពស់ ថ្នាក់ដឹកនាំ ក្រសួងការពារជាតិ និងអគ្គបញ្ជាការដ្ឋាន នៃកងយោធពលខេមរភូមិន្ទ ដើម្បីបង្ហាញពីប្រសិទ្ធភាពវ៉ាក់សាំងវ៉ាក់សាំងចិន។
ដើម្បីឲ្យការចាក់វ៉ាក់សាំងនេះ ប្រព្រឹត្តិទៅតាមពិធីសារ ស្តីពី យុទ្ធនាការចាក់វ៉ាក់សាំងកូវីដ១៩ ក្រសួងសុខាភិបាល កាលពីថ្ងៃទី៩ ខែកុម្ភៈ បានណែនាំ ៩ចំណុច មានជាអាទិ៍៖ ក្នុងដំណាក់កាលទី១នេះ ចំនួនអ្នកដែលស្ម័គ្រចិត្ត ចាក់វ៉ាក់សាំងកូវីដ១៩ គឺនឹងត្រូវកំណត់មានចំនួនត្រឹមតែ ១៤៩ ៥០០នាក់ ដែលនឹងត្រូវប្រើប្រាស់វ៉ាក់សាំង ស៊ីណូ ហ្វាម ដែលបាន ទទួល ពីសាធារណរដ្ឋប្រជាមានិតចិន ហើយដែលបានប្រកាសចាប់ផ្តើមចាក់ ចាប់ពីថ្ងៃទី១០ ខែកុម្ភៈ ឆ្នាំ២០២១ តទៅ។
ក្រសួងសុខាភិបាល ក៏បានលើកឡើងថា ដោយអនុវត្តតាមអនុសាសន៍ណែនាំដ៏ខ្ពង់ ខ្ពស់របស់សម្តេចតេជោ នាយករដ្ឋមន្ត្រី ហ៊ុន សែន ក្នុងការផ្តល់នូវទំនុកចិត្ត ជូនដល់បងប្អូនប្រជាពលរដ្ឋ លើការចាក់វ៉ាក់សាំងនេះ ក្រុមមនុស្ស ដែលត្រូវបានអនុញ្ញាតឲ្យចាក់វ៉ាក់សាំង ខាងលើនេះ គឺមានថ្នាក់ដឹកនាំក្នុងជួររាជរដ្ឋាភិបាល និងបុត្រាបុត្រី ជាឥស្សរជនជាន់ខ្ពស់ អភិបាលរាជធានី-ខេត្ត ថ្នាក់ដឹកនាំក្រសួងសុខាភិបាល ក្រុមគ្រូពេទ្យជួរមុខទាំងអស់ អ្នកនាំពាក្យនៅតាមក្រសួងស្ថាប័ននានា និងអ្នកសារព័ត៌មាន ដែលមានអាយុពី ១៨ឆ្នាំ ដល់ ៥៩ឆ្នាំ ជាដំបូងគេ ទៅតាមទីកន្លែង ដែលបានប្រកាស កាលពីថ្ងៃទី៨ ខែកុម្ភៈ។
ចំណែកក្រុមមនុស្ស ដែលត្រូវបានអនុញ្ញាតឲ្យចាក់ជាបន្តបន្ទាប់ នៅពេលបន្តបន្ទាប់ទៀតនោះ គឺកម្លាំងជំនាញនៃមជ្ឈមណ្ឌលសកម្មភាពកំចាត់មីនកម្ពុជា អាជ្ញាធរថ្នាក់ក្រោមជាតិជួរមុខ រួមមាន ថ្នាក់ខេត្ត ស្រុក ខណ្ឌ សង្កាត់ ឃុំ ភូមិ និងកងកម្លាំងមានសមត្ថកិច្ច ប៉ូលិសជួរមុខ ដែលកំពុងសកម្មក្នុងការជួយអន្តរាគមន៍ នៅក្នុងការប្រយុទ្ធនឹងជំងឺកូវីដ១៩ និងប៉ូលិស ដែលនៅឈរជើងតាមព្រំដែន នឹងត្រូវចាក់ជូនដោយក្រសួងការពារជាតិ។
សម្រាប់ក្រុមមនុស្សអាទិភាព ដែលស្ម័គ្រចិត្តចាក់ផ្សេងៗទៀត ក្រសួង នឹងជូនព័ត៌មានតាមក្រោយៗទៀត នៅពេលដែលមានវ៉ាក់សាំង សម្រាប់ចាក់ជូន។
ក្នុងសេចក្តីប្រកាសដដែល ក្រសួងសុខាភិបាល ក៏បានបញ្ជាក់ថា បុគ្គលស្ម័គ្រចិត្ត ចាក់វ៉ាក់សាំង គឺក្នុងក្រុមអាយុចាប់ពី ១៨ឆ្នាំ ទៅ ៥៩ឆ្នាំ ត្រូវមានសុខភាពល្អ ហើយមិនស្ថិតនៅក្នុងស្ថានភាពមានជំងឺធ្ងន់ធ្ងរ ដែលមិនត្រូវមកទទួលវ៉ាក់សាំង ស៊ីណូ ហ្វាម ដូចជា មានអាការៈក្តៅខ្លួន មានជំងឺផ្លូវដង្ហើម ជំងឺហឺត ជំងឺរ៉ាំរ៉ៃធ្ងន់ធ្ងរ ជំងឺអាឡាក់ស៊ី ឬក៏មានជំងឺថ្លើម លើសឈាម ជាដើម។ ក្នុងនោះ អ្នកធ្លាប់កើតជំងឺកូវីដ១៩ ក៏មិនអាចចាក់វ៉ាក់សាំងនេះបានដែរ។
ទោះបីជាពេលនេះ កម្ពុជាមានវ៉ាក់សាំងក៏ដោយ ក៏ក្រសួងសុខាភិបាល នៅតែប្រកាស អំពាវនាវ ឲ្យប្រជាពលរដ្ឋ បន្តចូលរួមអនុវត្តវិធានការការពារខ្លួនឲ្យបានត្រឹមត្រូវ ដោយទោះជា បានចាក់វ៉ាក់សាំងរួចហើយក៏ដោយ ក៏នៅតែមានតម្រូវការឲ្យបន្តអនុវត្តវិធានការ ៣ការពារ គឺពាក់ម៉ាស់ លាងដៃ រក្សាគម្លាតសុវត្ថិភាពបុគ្គលយ៉ាងតិច ១កន្លះឡើងទៅ និង ៣កុំ គឺកុំទៅ កន្លែងដែលមានមនុស្សច្រើនកុះករច្រើន កុំទៅកន្លែងដែលបិទជិត ប្រើម៉ាស៊ីនត្រជាក់ ច្រើនពេក និងកុំចាប់ដៃគ្នា ឬកុំឱបគ្នា ឬកុំកៀកស្មាគ្នា នៅពេលជួបគ្នា។
ក្រសួងសុខាភិបាល ក៏បានប្រកាសជូនសាធារណជនថា ប្រសិនបើមានការវិវត្តន៍ ឬបញ្ហា ពាក់ព័ន្ធនឹងការងារវ៉ាក់សាំងកូវីដ១៩នេះ ហើយប្រសិនបើមានបញ្ហាសុខភាព ឬសង្ស័យករណីមានប្រតិកម្មទៅនឹងវ៉ាក់សាំងកូវីដ១៩ សូមហៅទៅលេខទូរស័ព្ទទាន់ហេតុការណ៍ ១១៥ ដោយឥតគិតថ្លៃ ឬទូរស័ព្ទលេខ 012 880 745 ឬ 012 830 588។
ដូច្នេះកម្ពុជា ចាប់ផ្តើមយុទ្ធសាស្ត្រការពារសុខភាពប្រជាជនកម្ពុជា តាមរយៈវ៉ាក់សាំង ដោយចេញមុនគេ គឺវ៉ាក់សាំងស៊ីណូហ្វាមរបស់ចិន។ តែកម្ពុជា ក៏រំពឹងថា នឹងទទួលបាន វ៉ាក់សាំងជាច្រើនទៀត រហូតដល់ ២០លានដូស ដែលអាចមានមកពីឥណ្ឌា អង់គ្លេស ឬក៏រុស្ស៊ី ជាដើម។
ចំពោះប្រសិទ្ធភាព ក៏គួរតែមិនមានការសង្ស័យទៀតនោះទេ ព្រោះថា លើកលែង តែសម្តេច តេជោ ហ៊ុន សែន និងថ្នាក់ដឹកនាំកំពូលៗ ដែលមានអាយុលើសពី ៦០ឆ្នាំ គឺមានឥស្សរជន ថ្នាក់ដឹកនាំ ទេសរដ្ឋមន្ត្រី រដ្ឋមន្ត្រី រដ្ឋលេខាធិការ អនុរដ្ឋលេខាធិការ អភិបាលរាជធានីខេត្ត ព្រមទាំងអ្នកសារព័ត៌មាន និងឧត្តមសេនីយ៍ ជាថ្នាក់ដឹកនាំកងកម្លាំងប្រដាប់អាវុធ អាយុក្រោម ៥៩ឆ្នាំ បានចាប់ផ្តើមចាក់វ៉ាក់សាំង ជាមួយនឹងកូនៗរបស់ថ្នាក់ដឹកនាំជាច្រើនទៀត ផងដែរ៕
ចែករំលែកព័តមាននេះ