វត្តមានវ៉ាក់សាំងចិន៖ អ្នកគួរចាក់ និងមិនគួរចាក់
- ភ្នំពេញ
ភ្នំពេញ៖ ទីបំផុតទៅ វ៉ាក់សាំងកូវីដ១៩ ស៊ីណូហ្វាម ( SINOPHARM ) ចំនួន ៦០ម៉ឺនដូស ក្នុងចំណោម…
ភ្នំពេញ៖ ទីបំផុតទៅ វ៉ាក់សាំងកូវីដ១៩ ស៊ីណូហ្វាម ( SINOPHARM ) ចំនួន ៦០ម៉ឺនដូស ក្នុងចំណោម…
ភ្នំពេញ៖ ទីបំផុតទៅ វ៉ាក់សាំងកូវីដ១៩ ស៊ីណូហ្វាម ( SINOPHARM ) ចំនួន ៦០ម៉ឺនដូស ក្នុងចំណោម ១លានដូស ដែលជាជំនួយរបស់រដ្ឋាភិបាលចិន ត្រូវបានដឹកតាមយន្តហោះពិសេស មកដល់កម្ពុជា នៅល្ងាចថ្ងៃអាទិត្យ ទី០៧ ខែកុម្ភៈ ឆ្នាំ២០២១ ដូចការគ្រោងទុក។
សម្តេចតេជោ នាយករដ្ឋមន្ត្រី ហ៊ុន សែន បានអញ្ជើញទៅទទួលវ៉ាក់សាំងកូវីដ១៩ ជា ជំនួយរបស់ចិន នៅអាកាសយានដ្ឋានអន្តរជាតិភ្នំពេញ។
សម្តេចតេជោ ហ៊ុន សែន បានប្រកាសថា វ៉ាក់សាំង ស៊ីណូ ហ្វាម របស់មិត្តចិន ដែលបានផ្តល់ឲ្យកម្ពុជា នាពេលនេះ គឺជាប្រភេទវ៉ាក់សាំង ដែលត្រូវបានទទួលស្គាល់ថា ជាវ៉ាក់សាំង ដែលមានប្រសិទ្ធភាព និងសុវត្ថិភាព។
ចំពោះឯកអគ្គរដ្ឋទូតចិន ប្រចាំកម្ពុជា ព្រមទាំងមន្ត្រីជាន់ខ្ពស់រាជរដ្ឋាភិលបាល និងដោយផ្សាយផ្ទាល់តាមទូរទស្សន៍ក្នុងស្រុក និងតាមហ្វេសប៊ុកជាច្រើនផង សម្តេចតេជោ ហ៊ុន សែន លើកឡើងថា «ខ្ញុំសូមគូសបញ្ជាក់ជាថ្មីម្តងទៀតថា វ៉ាក់សាំងស៊ីណូហ្វាម របស់មិត្តចិន ដែលត្រូវបានផ្តល់មកកម្ពុជានេះ គឺជាប្រភេទវ៉ាក់សាំង ដែលត្រូវបានទទួលស្គាល់ថា ជាប្រភេទវ៉ាក់សាំងមួយ ដែលមានសុវត្ថិភាព និងមានប្រសិទ្ធភាព សម្រាប់ស្រទាប់មនុស្សអាយុពី ១៨ឆ្នាំ ដល់ ៥៩ឆ្នាំ ហើយត្រូវបានបញ្ជាទិញ និងអនុម័តឲ្យប្រើប្រាស់ដោយប្រទេសជាច្រើននៅក្នុងតំបន់ និងនៅលើសកលលោក»។
សម្តេចតេជោ ហ៊ុន សែន បន្ថែមថា «សុភាសិតខ្មែរ ពោលថា មិត្តល្អ ជួយគ្នា ក្នុងគ្រាក្រ។ ក្នុងន័យនេះ ជំនួយវ៉ាក់សាំងនេះ គឺជាសក្ខីភាពថ្មីដ៏សំខាន់មួយ ដែលឆ្លុះបញ្ចាំងអំពីចំណងមិត្តភាពដែកថែប និងកិច្ចសហប្រតិបត្តិការដ៏រឹងមាំ រវាងប្រទេស និងប្រជាជនយើងទាំងពីរ កម្ពុជា-ចិន នៅក្នុងក្របខណ្ឌកិច្ចសហប្រតិបត្តិការជាយុទ្ធសាស្ត្រគ្រប់ជ្រុងជ្រោយ និងការកសាងសហគមន៍ វាសនារួមគ្នា»។
សម្តេចតេជោ ហ៊ុន សែន ក៏បានបន្តថា កម្ពុជាទទួលបានវ៉ាក់សាំងកូវីដ១៩ នៅពេលនេះ ដោយសារតែកម្ពុជា និងចិត្តមានកិច្ចសហប្រតិបត្តិការមិត្តភាពរឹងមាំនឹងគ្នា។ សម្តេចតេជោ ហ៊ុន សែន បានគូសបញ្ជាក់ថា «បើគ្មានចំណងមិត្តភាពរឹងមាំរវាងកម្ពុជា និងចិនទេ ថ្ងៃនេះ យើងគ្មានបានទទួលវ៉ាក់សាំង សម្រាប់ប្រជាជនយើងទេ»។
ដើម្បីបង្កើនទំនុកចិត្តលើការចាក់វ៉ាក់សាំងកូវីដរបស់ចិននេះ សម្តេចតេជោ ហ៊ុន សែន ដែលលើសអាយុ មិនអាចចាក់បាន តែសម្តេចបានប្រកាសអនុញ្ញាតឲ្យកូនៗរបស់សម្តេច រួមទាំងកូនអ្នកធំៗ រដ្ឋមន្ត្រីអាយុក្រោម ៥៩ឆ្នាំ និងឧត្តមសេនីយ៍ ចាក់វ៉ាក់សាំងកូវីដ១៩ នេះ ដោយមានផ្សាយផ្ទាល់តាមទូរទស្សន៍ក្នុងស្រុកផង។
វ៉ាក់សាំង ដែលមកដល់កម្ពុជាជាលើកដំបូងនេះ មានចំនួន ៦០ម៉ឺនដូស។ ក្នុងនោះ ចំនួន ៣០ម៉ឺនដូស សម្រាប់ក្រសួងសុខាភិបាល និង ៣០ម៉ឺនដូសទៀត សម្រាប់ក្រសួងការពារជាតិ។
ក្រសួងសុខាភិបាលកម្ពុជា បានបញ្ជាក់ថា មនុស្សអាយុ ៦០ឆ្នាំឡើង មិនអាចចាក់វ៉ាក់សាំង Sinopharm ដែលចិនផ្តល់ឲ្យនេះទេ។ អាយុពី ១៨ឆ្នាំ ដល់ ៥៩ឆ្នាំ គឺអាចចាក់បាន តាមការស្ម័គ្រចិត្ត ហើយរយ:ពេលចន្លោះ ១៤ថ្ងៃ ទៅ ២៨ថ្ងៃ សម្រាប់វ៉ាក់សាំង Sinopharm ចាក់ដូសទីពីរ។ ក្នុងម្នាក់ ត្រូវចាក់ពីរដូស។
ក្រសួងសុខាភិបាល ក៏បានប្រកាសថា ដំណើរការយុទ្ធនាការចាក់វ៉ាក់សាំងនេះ នឹងប្រព្រឹត្តិទៅ សម្រាប់តែអ្នក ដែលមានអាយុចាប់ពី ១៨ឆ្នាំ ទៅ ៥៩ឆ្នាំ ទៅតាមក្រុមអាទិភាព ដែលមានចែងនៅក្នុងពិធីសារ សម្រាប់យុទ្ធនាការចាក់វ៉ាក់សាំងកូវីដ១៩។
ក្រសួងសុខាភិបាល ក៏បានប្រកាស ទទួលចុះឈ្មោះអ្នកចាក់វ៉ាក់សាំងកូវីដ១៩ ដោយស្ម័គ្រចិត្ត ដែលការចុះឈ្មោះនេះ នឹងធ្វើឡើង តាមប្រព័ន្ធអនឡាញ ដែលនឹងត្រូវដាក់ឲ្យប្រើប្រាស់ នៅសប្តាហ៍ក្រោយនេះ។ ការចាក់វ៉ាក់សាំងនេះ នឹងប្រព្រឹត្តទៅនៅតាមមន្ទីរពេទ្យរដ្ឋ នៅថ្នាក់ជាតិ ខេត្ត និងស្រុក ទៅតាមពេលវេលា ដែលក្រសួងសុខាភិបាល នឹងជម្រាបជូនតាមក្រោយទៀត។
មុនវ៉ាក់សាំងមកដល់ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានលើកឡើងថា បុគ្គល ដែលមិនអាចចាក់វ៉ាក់សាំងកូវីដ១៩ បាន រួមមាន៖ អ្នកមានបញ្ហាអាឡែកហ្ស៊ី អ្នកមានជំងឺរលាកផ្លូវដង្ហើម អ្នកចេញប្រទាលតាអាក អ្នកស្ថិតក្នុងជំងឺធ្ងន់ធ្ងរ ក្តៅខ្លួនដោយសារជំងឺរ៉ាំរ៉ៃ ស្ត្រីមានផ្ទៃពោះ ស្ត្រីបំបោះដោះកូន និងស្ត្រី ដែលមានបំណងពពោះ ក្នុងរយៈពេល ៣ខែទៀត អ្នកមានជំងឺ ឆ្កួតជ្រូក អ្នកជំងឺស្ក័ន ដែលមិនអាចគ្រប់គ្រងបាន អ្នកមានជំងឺសរសៃប្រសាទ អ្នកមានជំងឺរលាកស្រោមខួរ អ្នកដែលពិនិត្យឃើញខ្វះភាពស៊ាំពីកំណើត អ្នកមានសុខភាពខ្សោយ អ្នកជំងឺអេដស៍ អ្នកមានជំងឺមហារីកកូនកណ្តុរ អ្នកមានជំងឺឈាមស ឬមានជំងឺភាពស៊ាំពីកំណើត អ្នកជំងឺផ្លូវដង្ហើមធ្ងន់ធ្ងរ អ្នកជំងឺបេះដូងសរសៃឈាមធ្ងន់ធ្ងរ អ្នកជំងឺតម្រង់នោមធ្ងន់ធ្ងរ អ្នកជំងឺដុះដុំសាច់មហារីកធ្ងន់ធ្ងរ អ្នកប្រើប្រាស់ថ្នាំប្រឆាំងមហារីកដុំសាច់ អ្នកកំពុងព្យាបាលមហារីក និងអ្នកធ្លាប់កើតជំងឺកូវីដ១៩។
ឯកសារបង្ហាញថា សព្វថ្ងៃ ចិន មានវ៉ាក់សាំងកូវីដ១៩ ចំនួន ២ គឺវ៉ាក់សាំងរបស់ក្រុមហ៊ុន Sinopharm និងរបស់ក្រុមហ៊ុន Sinovac។ មកទល់ខែកុម្ភៈនេះ មានប្រទេស យ៉ាងហោចចំនួន១៦ ដែលបានសម្រេចអនុម័តឲ្យប្រើប្រាស់វ៉ាក់សាំង COVID-19 ទាំង២ របស់ក្រុមហ៊ុនចិន។
ក្នុងនោះ វ៉ាក់សាំង Sinopharm ត្រូវបានអនុញ្ញាតឲ្យប្រើនៅអេមីរ៉ាត់អារ៉ាប់រួម បារ៉ែន ហុងគ្រី ស៊ែរប៊ី ប៉េរូ អ៊ីរ៉ាក់ ម៉ារ៉ុក អេហ្ស៉ីប ប៉ាគីស្ថាន និងកម្ពុជា។ រីឯវ៉ាក់សាំង Sinovac ត្រូវបានអនុញ្ញាតឲ្យប្រើនៅប្រេស៊ីល ឥណ្ឌូណេស៊ី តួកគី ឈីលី កូឡុំប៊ី និងអាស៊ែបៃហ្សង់។
វ៉ាក់សាំងកូវីដ១៩ របស់ចិន ត្រូវបានប្រទេសខ្លះទិញ ខ្លះទៀត ទទួលបានអំណោយពីរដ្ឋាភិបាលចិន។ ក្នុងបណ្តាប្រទេសទាំងនោះ ក៏បានចាក់ជាបន្តបន្ទាប់ ហើយក្នុងនោះ ប្រធានាធិបតីឥណ្ឌូនេស៊ី បានចាក់វ៉ាក់សាំងកូវីដរបស់ចិន មុនគេ មុននឹងចាក់ជូនប្រជាជនឥណ្ឌូនេស៊ី។
យ៉ាងណាក៏ដោយ សម្រាប់កម្ពុជា នៅពេលវ៉ាក់សាំងរបស់ចិន បានមកដល់កម្ពុជា ជាលើកដំបូង នៅពេលនេះ មានការសង្ស័យខ្លះ លើប្រសិទ្ធភាព ហើយអ្នកខ្លះ រាងរារែក ដោយខ្លាចថា ចិនយកវ៉ាក់សាំងនោះ មកចាក់ពិសោធន៍ ជាដើម។
ក៏ប៉ុន្តែសម្តេចតេជោ នាយករដ្ឋមន្ត្រី ហ៊ុន សែន ប្រកាសយ៉ាងម៉ឺងម៉ាត់រួចហើយ កាល ពីថ្ងៃទី១៥ ខែធ្នូ ឆ្នាំ២០២០ ហើយបន្តនៅពេលនេះទៀត គឺសម្តេច មិនអនុញ្ញាតដាច់ខាតឲ្យប្រទេសណាមួយ យកប្រជាជនកម្ពុជា ដើម្បីពិសោធន៍ថ្នាំវ៉ាក់សាំងណាមួយឡើយ។
ម្យ៉ាងទៀត ការដែលសម្តេច លុបចោលគម្រោងដាក់វ៉ាក់សាំង នៅថ្ងៃទី១០ ខែកុម្ភៈ ក៏ដោយ សារតែសម្តេចលើសអាយុ ដែលថ្នាំវ៉ាក់សាំងនេះ តម្រូវឲ្យចាក់បាន ត្រឹមតែអាយុចាប់ពី ១៨ឆ្នាំ ដល់ ៥៩ឆ្នាំប៉ុណ្ណោះ។
ក៏ប៉ុន្តែមុន ឬក្រោយ សម្តេចតេជោ ហ៊ុន សែន ក៏នឹងចាក់វ៉ាក់សាំងកូវីដ ព្រោះថា បន្ទាប់ពីកម្ពុជា ទទួលវ៉ាក់សាំងជំនួយរបស់ចិននេះ គឺនៅមានវ៉ាក់សាំងកូវីដ មកជាបន្តបន្ទាប់ទៀត ពីយន្តការ កូវ៉ាក់ របស់អង្គការសុខភាពពិភពលោក ចំនួន ៧លានដូស ជំនួយវ៉ាក់សាំងមកពីឥណ្ឌា ១សែនដូស ព្រមទាំងជំនួយវ៉ាក់សាំងពីអូស្ត្រាលី ចំនួន ៣លាន ដូសទៀត។
ក្រៅពីនោះ រាជរដ្ឋាភិបាលកម្ពុជា ក៏នឹងបន្តស្វែងរកជំនួយ និងទិញវ៉ាក់សាំង ឲ្យបានយ៉ាង ហោចណាស់ ៩លានដូសថែមទៀត ដើម្បីឲ្យគ្រប់ ២០លានដូស សម្រាប់ចាក់ជូនប្រជាជនកម្ពុជាយ៉ាងហោចណាស់ ១០លាននាក់។
ដូច្នេះនៅពេលនេះ វ៉ាក់សាំងរបស់ចិន បានមកមុនគេ ចំនួន ៦០ម៉ឺនដូស ដែលអាចចាក់ជូនប្រជាជនកម្ពុជា ៣០ម៉ឺននាក់។ អ្នកចាក់វ៉ាក់សាំងនេះ ដំបូង គឺក្រុមជួរមុខ ដែលរួមមាន គ្រូពេទ្យ កងកម្លាំងប្រដាប់អាវុធ មន្ត្រីរាជរដ្ឋាភិបាល ព្រមទាំងប្រជាជន ដែលស្ម័គ្រចិត្ត ចុះឈ្មោះតាមអនឡាញ ជាដើម។ តែប្រជាជនយើង ក៏មិនគួរភ័យខ្លាច ដោយសារតែការនិយាយបន្លាចតៗគ្នានោះទេ។ ចូរជឿលើសម្តេចតេជោ ហ៊ុន សែន ជឿលើរាជ រដ្ឋាភិបាលកម្ពុជា ពិសេសមហាយក្សចិន ដែលជាប្រទេសមហាអំណាច ពិភពលោក។ ចិន មិនអាចយកកេរ្តិ៍ មកចោលកណ្តាលវាលនោះឡើយ៕
ចែករំលែកព័តមាននេះ