ខេត្តបន្ទាយមានជ័យ ៖ ដៃម្ខាងបីកូន ដៃម្ខាងរើសអេតចាយជួយអូសរទេះ កូនស្ត្រីម្នាក់អះអាងថា រស់នៅប៉ោយប៉ែតតាំងពីតូច តែគ្មានប័ណ្ឌក្រីក្រ ហើយបច្ចុប្បន្នរស់អាស្រ័យលើរបររើសអេតចាយដោះស្រាយជីវភាព ។
ស្ត្រីខាងលើឈ្មោះ ធឿន សុផល អាយុ៣២ឆ្នាំ មានកូនប្រុសស្រី៤នាក់ ដោយកូនទី១ ភេទស្រី អាយុ១១ឆ្នាំ ,កូនទី២ ភេទស្រី អាយុ៧ឆ្នាំ, កូនទី៣ ភេទប្រុស អាយុ៥ឆ្នាំ និងកូនទី៤ភេទប្រុស អាយុ៧ខែ ។
ស្ត្រីរូបនេះបន្តថា គាត់មានប្តីដែរ តែមានសុខភាពមិនសូវល្អជួនឈឺ ជួនជា ហើយពេលជាក៏ចេញទៅរកទិញ និងរើសអេតចាយ ដើម្បីជួយគ្នាដោះស្រាយជីវភាពដ៏តោកយ៉ាកមួយនេះ ។ គាត់បន្តថា បានរស់នៅក្រុងប៉ោយប៉ែតតាំងពីតូច ប៉ុន្តែមិនមានដី ឬផ្ទះរស់នៅទេ គឺជួលផ្ទះគេស្នាក់នៅ ក្នុងភូមិក្បាលស្ពាន១ សង្កាត់ប៉ោយប៉ែត ជារៀងរហូតមក ។
គាត់ថាមុនសម័យកូវីដ គ្រួសាគាត់មិនសូវលំបាកដូចបច្ចុប្បន្នទេ ព្រោះអាចចេញចូលអូសរទេះនៅដីថៃបានប្រាក់កម្រៃដោះស្រាយជីវភាព និងថ្លៃផ្ទះលុះដល់សម័យកូវីដជីវភាពគ្រួសារគាត់កាន់តែលំបាក ដោយរើសអេតចាយ១ថ្ងៃ៣នាក់ ម្តាយកូនបានត្រឹមជាង១ម៉ឺនរៀល តែប៉ុណ្ណោះ ។ អ្វីដែលសំខាន់គាត់ថា កូនៗមិនបានចូលសាលារៀនសូត្រដូចកូនអ្នកដ៍ទៃឡើយ ព្រោះតែជីវភាពរកព្រឹកខ្វះល្ងាច ។
ពេលសួររឿងប្រាក់ឧបត្ថម្ភរបស់រាជរដ្ឋាភិបាលតាមរយៈអាជ្ញាធរគាត់ថា មិនបានទទួលទេ តែសម្រាប់ប័ណ្ឌក្រីក្រចូលព្យាបាលតាមមន្ទីរពេទ្យរដ្ឋមិនអស់ប្រាក់គាត់ ហើយបញ្ជាក់ថា កន្លងមកគាត់ និងប្តីបានទៅសួររឿងប័ណ្ឌក្រីក្រដែរតែអាជ្ញាធរថា ដោយសារគ្រួសារគាត់គ្មានសៀវភៅគ្រួសារ ឬសៀវភៅស្នាក់នៅ ម្យ៉ាងថាខាងក្រុមការងារសម្ភាសន៍ផ្តល់ប័ណ្ឌក្រីក្រគេមិនទាន់ចុះដល់ ។
គ្រួសាក្រីក្រខាងលើអំពាវនាវសុំសប្បុរសជនក្នុង និងក្រៅប្រទេសមេត្តាជួយផង ព្រោះចង់ឲ្យកូនៗបានចូលរៀន និងគេ ៕
ចែករំលែកព័តមាននេះ