កម្ពុជា ត្រូវប្រយ័ត្នខ្ពស់ ចំពោះកូវីដ១៩ ប្រភេទថ្មី ពីវៀតណាម
- ភ្នំពេញ
ភ្នំពេញ៖ មកដល់ថ្ងៃទី៥ ខែកុម្ភៈ ឆ្នាំ២០២១ ស្ថានភាពជំងឺកូវីដ១៩ នៅព្រំដែនប្រទេសថៃ បានធូរស្បើយច្រើន ដោយនៅសល់ពលករ មកពីថៃ តែ…
ភ្នំពេញ៖ មកដល់ថ្ងៃទី៥ ខែកុម្ភៈ ឆ្នាំ២០២១ ស្ថានភាពជំងឺកូវីដ១៩ នៅព្រំដែនប្រទេសថៃ បានធូរស្បើយច្រើន ដោយនៅសល់ពលករ មកពីថៃ តែ ៧នាក់ប៉ុណ្ណោះ ដែលកំពុងសម្រាកព្យាបាលជំងឺកូវីដ១៩។ ប៉ុន្តែអ្នកជំនាញ ក៏ដូចជាថ្នាក់ដឹកនាំ បង្ហាញការព្រួយបារម្ភខ្លាំងពីការឆ្លងរាលដាលជំងឺកូវីដ១៩ នៅប្រទេសវៀតណាម។ វៀតណាម ដែលឆ្លងរាលដាលដល់ទៅជាង ២០០នាក់ ក្នុង ១ថ្ងៃ ហើយរកឃើញមេរោគកូវីដប្រភេទថ្មីទៀតផង។
របាយការណ៍របស់ក្រសួងសុខាភិបាល បង្ហាញថា មកដល់ព្រឹកថ្ងៃទី៥ ខែកុម្ភៈ ឆ្នាំ២០២១ នៅទូទាំងប្រទេស រកឃើញអ្នកឆ្លងជំងឺកូវីដ១៩ សរុបចំនួន ៤៧០នាក់។ ក្នុងនោះ ជាសះស្បើយ ៤៥២នាក់ និងកំពុងសម្រាកព្យាបាល ចំនួន ១៨នាក់។
ក្នុងចំណោមអ្នកជំងឺកូវីដ១៩ សរុប ៤៧០នាក់ គឺមានពលករខ្មែរ ធ្វើដំណើរមកពីប្រទេសថៃ ចំនួន ៨៧នាក់។ ប៉ុន្តែមកដល់ព្រឹកថ្ងៃទី៥ ខែកុម្ភៈ ឆ្នាំ២០២១ មានពលករ មកពីថៃ ៨០នាក់ហើយ ត្រូវបានព្យាបាលជាសះស្បើយ។ ពោលគឺនៅសល់តែពលករ ៧នាក់ប៉ុណ្ណោះ នៅសម្រាកព្យាបាលនៅមន្ទីរពេទ្យខេត្តប៉ៃលិន ៣នាក់ និងនៅខេត្តបន្ទាយមានជ័យ ៤នាក់។
ក៏ប៉ុន្តែនៅព្រឹកថ្ងៃទី៤ ខែកុម្ភៈ ឆ្នាំ២០២១ លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងរបស់ក្រសួងសុខាភិបាល បានប្រកាសតាមក្រុមព័ត៌មានតេឡេក្រាមថា ព័ត៌មាន ដែលគួរឲ្យព្រួយបារម្ភពេលនេះ គឺនៅវៀតណាម។ វៀតណាម មួយថ្ងៃ រកឃើញអ្នកឆ្លងកូវីដ១៩ថ្មី ចំនួន ២៧៦ករណី ហើយមានជាង ១០ករណី ជា មេរោគ ប្រភេទថ្មី។
លោក លី សូវ៉ាន់ បន្ថែមថា ស្ថានភាពនៅវៀតណាម អាចអាក្រក់ជាងស្ថានភាពឆ្លងសហគមន៍ នៅប្រទេសថៃ ទៅទៀត។ ដូច្នេះសុំឲ្យបណ្តាខេត្ត នៅជាប់ព្រំដែនវៀតណាម យកចិត្តទុកដាក់ឲ្យខ្លាំងមែនទែន។ ទាំងការរឹតបន្តឹងតាមច្រកព្រំដែនផ្លូវការ និងច្រករបៀង ពិសេសការឆ្លងដែនខុសច្បាប់ ត្រូវទប់ស្កាត់ឲ្យបាន និងពិសេសការធ្វើចត្តាឡីស័ក ត្រូវរឹតបន្តឹង ឲ្យខ្លាំងមែនទែនដែរ។
ការព្រួយបារម្ភខ្លាំងពីការឆ្លងរាលដាលជំងឺកូវីដ១៩ នៅប្រទេសវៀតណាម ជាប់ព្រំដែនកម្ពុជា ក៏ត្រូវបានសម្តេចតេជោ ហ៊ុន សែន ប្រកាសផ្ទាល់មាត់ កាលពីថ្ងៃទី៤កុម្ភៈ ហើយសម្តេច បានចេញបទបញ្ជាឲ្យអាជ្ញាធរសមត្ថកិច្ចជាប់ព្រំដែនវៀតណាម ចាប់ពីខេត្តកំពត ដល់ខេត្តរតនគិរី ត្រូវបង្កើនការប្រុងប្រយ័ត្ន និងទប់ស្កាត់ការឆ្លងដែនរបស់ប្រជាជនកម្ពុជា និងវៀតណាម ព្រមទាំងរៀបចំមណ្ឌលចត្តាឡីស័ក នៅតាមព្រំដែន ពិសេសបើមានការឆ្លងកាត់ព្រំដែន ត្រូវធ្វើចត្តាឡីស័ក រយៈពេល ១៤ថ្ងៃ ដោយហ្មត់ចត់បំផុត ដើម្បីទប់ស្កាត់ការឆ្លងរាលដាលជំងឺកូវីដ១៩ ឆ្លងដែនចូលកម្ពុជា។
ក្រសួងសុខាភិបាល តាមរយៈលោករដ្ឋមន្ត្រី ម៉ម ប៊ុនហេង កាលពីថ្ងៃទី៤ ខែកុម្ភៈ ក៏បានចេញលិខិត ណែនាំដល់អភិបាលខេត្តជាប់ព្រំដែន ឲ្យបង្កើនការប្រុងប្រយ័ត្ន និងចាត់វិធានការប្រកបដោយប្រសិទ្ធភាពខ្ពស់ ទប់ស្កាត់ និងបង្ការការនាំចូលវីរុសកូវីដ១៩ តាមច្រកព្រំដែនកម្ពុជា-វៀតណាម ដើម្បីការពារការចម្លងវីរុសកូវីដ១៩ ចូលមកកម្ពុជា។
កាលពីថ្ងៃទី២៨ ខែមករា ឆ្នាំ២០២១ ក្រសួងសុខាភិបាលវៀតណាម បានប្រកាសពីការរកឃើញអ្នកឆ្លងជំងឺខូវីដ១៩ ចំនួន ៨១នាក់ ដែលធ្លាប់ប្រាស្រ័យទាក់ទងជាមួយនឹងអ្នកជំងឺកូវីដ១៩ ចំនួន ២នាក់។ ដូច្នេះ នេះជាករណីឆ្លងនៅក្នុងសហគមន៍ជាថ្មីម្ដងទៀត នៅប្រទេសវៀតណាម បន្ទាប់ពីស្ងប់ស្ងាត់អស់រយៈពេលជិត ២ខែ។ ភ្លាមៗ អាជ្ញាធរវៀតណាម ក៏បានចាត់វិធានការ ស្វែងរកអ្នកសង្ស័យទាំងអស់ មកពិនិត្យ និងធ្វើចត្តាឡីស័ក។
ក្នុងចំណោមអ្នកឆ្លងថ្មី នៅប្រទេសវៀតណាម គឺមានម្នាក់ជាបុគ្គលិក ធ្វើការនៅព្រលានយន្តហោះ ដែលឆ្លងពីអ្នកដំណើរបរទេស ពេលគាត់ដឹកជញ្ជូនពួកគេ ទៅមណ្ឌលចត្តាឡីស័ក។ ម្នាក់ទៀត ជាកម្មកររោងចក្រ ដែលធ្លាប់ប្រាស្រ័យទាក់ទងជាមួយជនជាតិវៀតណាមម្នាក់ ដែលធ្វើដំណើរចេញ-ចូលប្រទេសជប៉ុន។ ក្រោយមក អ្នកធ្វើដំណើរទៅជប៉ុននោះ ធ្វើតេស្តវិជ្ជមានមេរោគខូវីដ១៩ ប្រភេទថ្មី ដែលមានប្រភពនៅអង់គ្លេស។
ករណីឆ្លងកូវីដ១៩ នៅក្នុងសហគមន៍ នៅប្រទេសវៀតណាម នាពេលនេះ បានកើតឡើងតែប៉ុន្មានសប្ដាហ៍ប៉ុណ្ណោះ មុនពេលប្រទេសវៀតណាម រៀបចំបុណ្យចូលឆ្នាំថ្មី។ នោះជាពេលដែលមនុស្សជួបជុំគ្នានៅក្នុងទ្រង់ទ្រាយធំ ដែលអាចបង្កការឆ្លងជំងឺនេះ កាន់តែខ្លាំងនៅក្នុងសហគមន៍ បើគ្មានការទប់ស្កាត់ឲ្យបានទាន់ពេលវេលា។ ដូច្នេះ រដ្ឋាភិបាលវៀតណាម បានបញ្ជាទៅអាជ្ញាធរគ្រប់មូលដ្ឋានទាំងអស់ ត្រូវបង្កើនការត្រួតពិនិត្យ និងគ្រប់គ្រងជំងឺនេះ ប្រកបដោយប្រសិទ្ធភាពខ្ពស់។
ជាវិធានការ អាជ្ញាធរវៀតណាម បានដំឡើងប្រព័ន្ធតាមដាន នៅក្នុងខេត្តចំនួន២ ដែលជាទីកន្លែងរកឃើញអ្នកឆ្លងកូវីដ១៩ នៅក្នុងសហគមន៍។ នៅតំបន់ខ្លះ អាជ្ញាធរបានដាក់បារ៉ាស់បិទច្រកចេញចូលទាំងស្រុង។ រដ្ឋាភិបាលវៀតណាម បានកំណត់ពេលដប់ថ្ងៃ ត្រូវតែកាត់ផ្ដាច់ការឆ្លងនៅក្នុងសហគមន៍ឲ្យបាន។
គួរកត់សម្គាល់ថា ប្រទេសវៀតណាម ឆ្លងកាត់ការឆ្លងកូវីដ១៩ នៅក្នុងសហគមន៍ ៣ដង រួចមកហើយ។ លើកទី១ នៅទីក្រុងដាណាង កាលពីខែមេសា ឆ្នាំ២០២០ លើកទី២ នៅទីក្រុងហូជីមិញ កាលពីខែធ្នូ ឆ្នាំ២០២០ និងលើកទី៣ នៅខេត្តហៃឌឿង (Hai Duong) និងកួងនីញ (Quang Ninh) នៅពេលនេះ។
ព្រឹត្តិការណ៍ឆ្លងសហគមន៍នៅក្នុងប្រទេសវៀតណាម គឺជាអ្វីដែលកម្ពុជាយើង ត្រូវបង្កើនវិធានការប្រុងប្រយ័ត្ន និងយកចិត្តទុកដាក់ ពិសេសនៅតាមបណ្តាខេត្តជាប់ព្រំដែនវៀតណាម រួមមាន៖ ខេត្តរតនៈគិរី មណ្ឌលគិរី ក្រចេះ ត្បូងឃ្មុំ ខេត្តព្រៃវែង ខេត្តស្វាយរៀង ខេត្តកណ្តាល ខេត្តតាកែវ និងខេត្តកំពត។
ករណីឆ្លងសហគមន៍ នៅខេត្តសាមុតសាខន ក្នុងប្រទេសថៃ កាលពីថ្ងៃទី២០ ខែធ្នូ ឆ្នាំ២០២០ ត្រូវបានរាជរដ្ឋាភិបាលកម្ពុជា តាមរយៈសម្តេចតេជោ ហ៊ុន សែន បានប្រកាសចេញនូវ វិធានការរឹតបន្តឹងការឆ្លងដែនភ្លាមៗ។ វិធានការរបស់កម្ពុជា មានប្រសិទ្ធភាព ដែលមកដល់ពេលនេះ បានទប់ស្កាត់ មិនឲ្យកូវីដឆ្លងដែនពីប្រទេសថៃ ចូលផ្ទៃក្នុងប្រទេសកម្ពុជាយើង ឡើយ។ នោះគឺអ្នកដំណើរទាំងអស់ ពិសេសពលករខ្មែរ មកពីប្រទេសថៃ តម្រូវឲ្យត្រួតពិនិត្យសុខភាព ធ្វើតេស្ត និងធ្វើចត្តាឡីស័ក ឲ្យគ្រប់ ១៤ថ្ងៃ នៅតាមមណ្ឌល ចត្តាឡីស័ក នៅខេត្តជាប់ព្រំដែនទាំងនោះ។
ករណីនៅបណ្តាខេត្តជាប់ព្រំដែនវៀតណាម ក៏ត្រូវប្រកាន់យកវិធានការដ៏មានប្រសិទ្ធភាព ដែលរាជរដ្ឋាភិបាល បានដាក់ចេញរួចហើយ ដើម្បីទប់ស្កាត់កូវីដឆ្លងដែនពីប្រទេសថៃ នាពេលនេះផងដែរ។
ជាវិធានការទប់ស្កាត់ការឆ្លងរាលដាលជំងឺកូវីដ១៩ ឆ្លងដែនចូលពីក្រៅប្រទេស គឺរាជរដ្ឋាភិបាលកម្ពុជា បានរឹតបន្តឹងការធ្វើដំណើរឆ្លងដែន តាមរយៈការតម្រូវឲ្យពិនិត្យសុខភាព ធ្វើតេស្តរកកូវីដ ហើយអ្នកដំណើរទាំងនោះ ត្រូវតែធ្វើចត្តាឡីស័កដាច់ខាតឲ្យគ្រប់ ១៤ថ្ងៃ ឲ្យបានហ្មត់ចត់បំផុត នៅតាមមណ្ឌលចត្តាឡីស័ក ដែលរៀបចំ មិនថា នៅភ្នំពេញ ឬនៅតាមខេត្តជាប់ព្រំដែនថៃនោះឡើយ។
ក្រៅពីការរឹតបន្តឹងតាមផ្លូវគោក និងនៅច្រកព្រំដែនផ្លូវការ គឺការឆ្លងដែនតាមច្រករបៀង និងចេញចូលខុសច្បាប់ ពិសេសតាមផ្លូវទឹក ដែលបងប្អូនវៀតណាម ចូលចិត្តឆ្លងដែនចូលទឹកកម្ពុជាយើង ក៏ទាមទារឲ្យមានការគិតគូរឲ្យបានហ្មត់ចត់ផងដែរ ក្នុងអំឡុងពេលនៃការឆ្លង រាលដាលជំងឺកូវីដ១៩ នៅក្នុងសហគមន៍ ក្នុងប្រទេសវៀតណាម ជារលកទី៣ នៅពេលនេះ។
ពិសេសនៅពេលនេះ ជិតដល់ថ្ងៃចូលឆ្នាំចិន-វៀតណាម ដែលនៅកម្ពុជាយើង មានបងប្អូនវៀតណាមរស់នៅច្រើន ហើយក៏អាចមានការឆ្លងដែនចេញចូលរវាងប្រទេសទាំងពីរ ក្នុងអំឡុងពេលបុណ្យចូលឆ្នាំប្រពៃណីចិនវៀតណាម ចាប់ពីថ្ងៃទី១១ ដល់ថ្ងៃទី១៤ ខែកុម្ភៈខាងមុខនេះ ផងដែរ។
បើសិនជាអាជ្ញាធរខេត្តជាប់ព្រំដែនវៀតណាមទាំងអស់ ក្រោមការត្រួតពិនិត្យរបស់ ក្រសួងសុខាភិបាល អនុវត្តយ៉ាងហ្មត់ចត់ ដូចបណ្តាខេត្តជាប់ព្រំដែនថៃកន្លងមក នោះកម្ពុជាយើង ពិតជាអាចទប់ស្កាត់ការឆ្លងរាលដាលជំងឺកូវីដ១៩ ឆ្លងដែនពីប្រទេសជិតខាង។
ទន្ទឹមនឹងនេះ ករណីឆ្លងសហគមន៍ជាថ្មីនៅវៀតណាម ពេលនេះ ក៏ជាសញ្ញាជួង គោះប្រាប់ដល់ប្រជាជនកម្ពុជាយើងទាំងអស់ថា កុំប្រញាប់ភ្លេចកូវីដ! នៅកម្ពុជា យើង ទើបតែបញ្ចប់ករណីឆ្លងសហគមន៍ ក្នុងព្រឹត្តិការណ៍ថ្ងៃ២៨វិច្ឆិកា នៅអំឡុងចុងខែធ្នូ ឆ្នាំ២០២០ ប៉ុណ្ណោះ។ ពោលគឺទើបតែជាង ១ខែទេ ខណៈដែលនៅវៀតណាម ស្ងប់ស្ងាត់ការឆ្លងសហគមន៍នេះ បានជិត ២ខែ ក៏បានផ្ទុះឡើងជាថ្មីនូវការឆ្លងរាលដាលកូវីដពីម្នាក់ ទៅម្នាក់ គួរឲ្យព្រួយបារម្ភ។
ដូច្នេះនៅពេលដែលអាជ្ញាធរសមត្ថកិច្ចកម្ពុជាយើង ចាត់វិធានការរឹតបន្តឹងលើអ្នកដំណើរចេញចូលកម្ពុជា ឆ្លងដែន ដើម្បីទប់ស្កាត់ការឆ្លងរាលដាលជំងឺកូវីដ១៩ គឺប្រជាពលរដ្ឋទាំងអស់ សូមបន្តអនុវត្តនូវវិធានការសាមញ្ញៗ ដូចជា លាងសម្អាតដៃឲ្យបានញឹកញាប់ ជៀសវាងការជួប ជុំមនុស្សច្រើន ត្រូវពាក់ម៉ាស់ក្នុងករណីចាំបាច់ និងបន្តរក្សាគម្លាតសុវត្ថិភាពពីម្នាក់ទៅម្នាក់ យ៉ាងតិច ១ម៉ែត្រកន្លះ ជាដើម។
ក្នុងអំឡុងពេលចូលឆ្នាំចិន នៅសប្តាហ៍ក្រោយនេះ យើងក៏កុំទាន់អាល់ជួបជុំគ្នាច្រើន ពិសេសនៅពេលទទួលទានអាហារ ផឹកស៊ី ជាដើម។ បើមានពិធីសែន ធ្វើត្រឹមតែ គ្រួសារនិមួយៗ ហើយត្រូវបន្តរក្សាគម្លាតសុវត្ថិភាព ជាដើម។ល៕
ចែករំលែកព័តមាននេះ